កាលពីសម័យកាលលោកតាលោកយាយរបស់ពួកយើង មានតែមនុស្សចាស់ទេ ដែលងាយប្រឈមមុខនឹងជំងឺ ប៉ុន្តែមកដល់បច្ចុប្បន្ននេះ មនុស្សវ័យក្មេងៗជាច្រើន បែរជាមានសុខភាពខ្សោយ មានជំងឺជាប់ខ្លួនទៅហើយ។ ទម្លាប់រស់នៅបែបសមញ្ញៗ របស់ចាស់ៗពីដើម ពួកគាត់ទទួលទានតែបន្លែ ផ្លែឈើ ត្រី សាច់ ចំណីចំណុកដែលបានផលពីធម្មជាតិ គ្មានឬមានតិចតួចនូវពពួកអាហារសម្រេចរូបឬអាហារកែច្នៃដូចសព្វថ្ងៃនេះទេ។ ហេតុនេះប្រសិនបើអ្នក ចង់បានអាយុវែង សុខភាពរឹងមាំ សម្រស់នៅក្មេងបានយូរ ដំបូងបំផុតត្រូវរស់នៅឱ្យមានផាសុកភាព នឹងចាប់ផ្ដើមផ្លាស់ប្តូរទម្លាប់ពីអាហារពេលព្រឹកទៅ។

ផ្អែកតាមការចែករំលែកពីលោក Deepti Lokesappa ជាអ្នកស្រាវជ្រាវចំណីអាហារនិងអាហារូបត្ថម្ភ និងជាទីប្រឹក្សាជាន់ខ្ពស់ឯកទេសអាហាររូបត្ថម្ភនៅមន្ទីរពេទ្យMotherhood បានថ្លែងប្រាប់គេហទំព័រHealthshots ថាអាហារពេលព្រឹកសំខាន់ណាស់ក្នុងការផ្ដល់ថាមពលដល់រាងកាយពេញមួយថ្ងៃ។ បើអ្នកទទួលអាហារពេលព្រឹកខុស នឹងធ្វើឱ្យអ្នកមានអារម្មណ៍ល្វើយ ងងុយ គ្មានកម្លាំងថាមពល ហេតុនេះអ្នកគួរចៀងវាងប្រភេទអាហារដែលជាជាតិផ្អែមខ្ពស់ មានជាតិម្សៅច្រើន សម្បូរកាបូនអុីដ្រានច្រើនពេក និងសារធាតុរក្សាទុកបានយូរ។

ក្នុងអាហារពេលព្រឹក១ចាន មិនត្រឹមតែធ្វើឱ្យអ្នកឆ្អែតបានយូរទេ គួរតែរើសអាហារដែលផ្ដល់សារធាតុចិញ្ចឹម ប្រូតេអុីនគ្រប់គ្រាន់ មានជាតិកាកសរសៃ និងខ្លាញ់ល្អផងដែរ។ ខាងក្រោមនេះជាអាហារពេលព្រឹកដ៏អស្ចារ្យសម្រាប់សុខភាព៤ក្រុម ដែលអ្នកគួរតែទទួលទាន៖

១ ស៊ុត៖ អាហារងាយស្រួលធ្វើ តម្លៃសមរម្យ ចំណេញពេលវេលាដែលល្អសម្រាប់សុខភាព។ អ្នកអាចស្ងោរស៊ុត២គ្រាប់ញ៉ាំនៅពេលព្រឹក ឬប្តូររបៀបចំអិនទៅជាចំហុយ ឆាឬចៀនជាមួយបន្លែផ្សេងៗដើម្បីកុំឱ្យមានអារម្មណ៍ថាត្រលាន់ ប៉ុន្តែសូមកុំបន្ថែមជាតិស្ករខ្លាំងពេក បើអាចមិនដាក់កាន់តែល្អ។

២ នំបុ័ងស្រូវសាឡី៖ ញ៉ាំស្រូវសាឡីពេលព្រឹកព្រោះវាមានជាតិសរសៃ និងកាបូអុីដ្រាតស្មុគស្មាញ ដែលរំលាយយឺតៗ មិនបណ្តាលឱ្យមានការកើនឡើងកម្រិតជាតិស្ករក្នុងឈាមភ្លាមៗនោះទេ។ អ្នកអាចធ្វើនំសាំងវិចជាមួយផ្លែឈើ ឬស៊ុត ដើម្បីធ្វើឱ្យវាកាន់តែមានរសជាតិកាន់តែឆ្ងាញ់។

៣ គ្រាប់ជី៖ វាអាចជួយឱ្យស្រកគីឡូ ពីព្រោះនៅក្នុងគ្រាប់ជីវាសម្បូរទៅដោយ កាបូនអុីដ្រាត ជាតិសរសៃខ្ពស់ ទប់ស្កាត់ចំណង់អាហារ ធ្វើឱ្យអ្នកដែលផឹកមានអារម្មណ៍ថាឆ្អែតបានយូរ និងមិនងាយឃ្លានអាហារផ្តេសផ្តាស។ គួរទទួលទានជាមួយទឹកដោះគោស្រស់ ឬក្រឡុកលាយជាមួយផ្លែឈើដើម្បីបង្កើនរសជាតិ ក្នុង១ថ្ងៃអ្នកគួរទទួលទានគ្រាប់ជីត្រឹមបរិមាណ២ស្លាបព្រាតូចល្មមបានហើយ(គិតពីចំនួនគ្រាប់ជីដែលមិនទាន់បានត្រាំទឹក)។

៤ សាឡាដបន្លែ៖ ការរួមបញ្ចូលគ្នានៃបន្លែបៃតងនិងបន្លែពណ៌ផ្សេងទៀត ញ៉ាំនៅពេលព្រឹក ផ្តល់នូវវីតាមីនសំខាន់ៗ ខ្លាញ់ និងប្រូតេអ៊ីនដែលមានសុខភាពល្អ ហើយដូច្នេះពួកវាគឺជាប្រភពនៃជាតិសរសៃល្អបំផុត។ បងប្អូនអាចជ្រើសរើសរើសប្រភេទសាឡាដ ប៉េងប៉ោះ ផ្កាខាត់ណាខៀវ ពោត ដំឡូងផ្អែម គ្រាប់ធញ្ញជាតិ ផ្លែឈើ ឬអាចបន្ថែមបន្លែផ្សេងៗទៀតទៅតាមចំណូលចិត្ត លាយចម្រុះគ្នា ដើម្បីបង្កើតសោភ័ណ្ឌភាពនិងរសជាតិឱ្យកាន់តែប្រសើរឡើងថែមទៀត៕

អត្ថបទដោយ៖ Senghong