ទឹកជាភេសជ្ជៈងាយស្រួលញ៉ាំ ចំណាយលុយតិចក្នុងការទិញ បើប្រៀបជាមួយភេសជ្ជៈផ្សេងៗទឹកគឺមានអត្ថប្រយោជន៍ខ្លាំងបំផុតចំពោះរាងកាយ មិនប៉ះពាល់សុខភាព សូន្យកាល់ឡូរី ដែលមនុស្សគ្រប់គ្នាគួរតែងាកមួយយកចិត្តទុកដាក់ផឹកឱ្យបានត្រឹមត្រូវជារៀងរាល់ថ្ងៃ។

បើតាមការបញ្ជាក់ពីវេជ្ជបណ្ឌិត អុឹង ម៉េងលាង ឯកទេស ផ្នែកវះកាត់ជំងឺក្រួសតម្រងនោម នៅមន្ទីរពេទ្យព្រះអង្គឌួង បានប្រាប់ថា ជំងឺក្រួសនៅក្នុងតម្រងនោម(ក្រលៀន) ខូចតម្រងនោម គឺកើតឡើងមិនកំណត់អាយុចាស់ ឬក៏ក្មេងឡើយ។ ​ចាប់ពីវ័យមនុស្សមនុស្សចេះញុំាអាហារចេះផឹកទឹក​គឺអាចនឹងបង្កជាជំងឺនេះឡើងមកហើយ​បើមិនប្រយ័ត្ន ពិសេសគឺអ្នកដែលមានទម្លាប់ផឹកទឹកតិច។

ជាការពិតណាស់ យោងតាមការចុះផ្សាយលើគេហទំព័រ NHS បានបញ្ជាក់ថា ទឹកមាននាទីគ្របដណ្តប់និងការពារសរីរាង្គកាយរបស់មនុស្សដូចជា ជួយរក្សាសីតុណ្ហភាពរាងកាយ ធ្វើជារំអិលទៅដល់សន្លាក់ ការពារខួរឆ្អឹងខ្នង កម្ចាត់កាកសំណល់ចេញពីរាងកាយ តាមរយៈការនោម ញើស និងចលនាពោះវៀន។ មិនតែប៉ុណ្ណោះការផឹកទឹកបានគ្រប់គ្រាន់២.៥លីត្រទៅ៣លីត្រក្នុងមួយថ្ងៃ គឺវាដើរតួនាទីយ៉ាងសំខាន់ក្នុងការគ្រប់គ្រងសុខភាពតម្រងនោម ការពារជំងឺតម្រងនោម ការពារការកើតក្រួសតម្រងនោម...ជាដើម។ ទឹក មានតួនាទីជួយទៅដល់រាងកាយ និងតម្រងនោម ច្រើនរាប់មិនអស់ ចុះប្រសិនបើ១ថ្ងៃៗអ្នកមិនញ៉ាំទឹក ឬញ៉ាំទឹកតិចខុសកម្រិត តើសរីរាង្គទាំងអស់ក្នុងរាង្គកាយ ជាពិសេសតម្រងនោម ដែលត្រូវការទឹកដើម្បីការពារនឹងទៅជាយ៉ាងណា?

ទន្ទឹមនឹងនេះដែរ ប្រសិនជាអ្នកស្រឡាញ់សុខភាព មិនចង់ឈឺ មិនចង់កើតក្រួសតម្រងនោម ឬខ្សោយក្រលៀនទាំងវ័យក្មេង ដាច់ខាតអ្នកត្រូវបង្កើនទម្លាប់ញ៉ាំទឹកឱ្យបានចាប់ពី២ទៅ៣លីត្រក្នុងមួយថ្ងៃ ហើយត្រូវញ៉ាំតាមពេលកំណត់ដូចខាងក្រោម៖

១. ផឹកទឹក ៣០០មីលីលីត្រពេលភ្ញាក់ពីគេង៖ នៅអំឡុងពេលងើបពីគេងរាងកាយអាចនឹងបាត់បង់ជាតិទឹក និងអេឡិចត្រូលីត។ ហេតុនេះ ការញ៉ាំទឹកឱ្យបាន១កែវបន្ទាប់ពីភ្ញាក់ពីគេង គឺអាចបំពេញជាតិទឹកនៅក្នុងសរីរាង្គវិញ លើសពីទៅទៀត ការញ៉ាំទឹកបែបនេះ ក៏ជួយកាត់បន្ថយអាស៊ីតក្នុងក្រពះនាពេលព្រឹកព្រលឹម និងការពារតម្រងនោមផងដែរ។

២.​ ផឹកទឹក២៥០មីលីលីត្រមុនញ៉ាំអាហារពេលថ្ងៃ៖ ដើម្បីគ្រប់គ្រងទម្លាប់នៃការញុំាអាហារច្រើន ការផឹកទឹកមួយកែវមុនពេលអាហារ អាចជួយឱ្យមានអារម្មណ៍ថា ញុំាអាហារឆាប់ឆ្អែតក្នុងបរិមាណតិច និងថែមទាំងជួយសម្រួលដល់ប្រព័ន្ធរំលាយអាហារបានល្អថែមមួយកម្រិត។

៣. ផឹកទឹក២៥០មីលីលីត្រក្រោយអាហារថ្ងៃ៖ ការផឹកទឹកបន្ទាប់ពីស្រស់ស្រូបអាហាររួច នឹងជួយដំណើរនៃចលនារំលាយអាហារឱ្យងាយស្រួលក្នុងការប្រតិបត្តិការ ដោយបម្លាស់ទីអាហារនៅក្នុងប្រព័ន្ធរំលាយអាហារបានល្អ និងជួយសម្រួលដល់ការបន្ទោរបង់បានទៀងទាត់។

៤. ផឹកទឹក៥០០មីលីត្រនៅពេលរសៀលចន្លោះម៉ោង១ដល់ម៉ោង២៖ ថ្ងៃរសៀល គឺជាពេលដែលរាងកាយឆាប់បាត់បង់ជាតិទឹកលឿនជាងគេ ដោយសារអាកាសធាតុកើតឡើងកម្តៅបណ្ដាលរាងកាយក៏ត្រូវបាត់បង់ជាតិទឹក។ ដូច្នេះការផឹកទឹកច្រើននៅកំឡុងពេលនេះ គឺល្អសម្រាប់បំពេញជាតិទឹកក្នុងសារពាង្គកាយ និងផ្តល់ថាមពលដល់សរីរាង្គទាំងមូល។

៥. ផឹកទឹក២៥០មីលីលីត្របន្ទាប់ពីទទួលទានអាហារសម្រន់ ឬភេសជ្ជៈផ្សេងៗ៖ ក្រោយពីញ៉ាំអាហារសម្រន់ ឬភេសជ្ជៈមួយចំនួនដូចជាគ្រឿងកំប៉ុង កាហ្វេជាដើម អ្នកគួរតែញ៉ាំទឹក ដើម្បីឱ្យវាទៅលាងនៅសារធាតុមិនល្អដែលតោងជាប់នៅក្នុងប្រដាប់លំដាប់រំលាយអាហារ។

៦. ផឹកទឹក២៥០មីលីលីត្រមុនអាហារល្ងាច៖ ដើម្បីគ្រប់គ្រងទម្លាប់នៃការញុំាអាហារច្រើន ការផឹកទឹកមួយកែវមុនពេលអាហារ អាចជួយឱ្យមានអារម្មណ៍ថា ញុំាអាហារឆាប់ឆ្អែតក្នុងបរិមាណតិច និងថែមទាំងជួយសម្រួលដល់ប្រព័ន្ធរំលាយអាហារបានល្អថែមមួយកម្រិត។

៧. ផឹកទឹក៣០០មីលីលីត្រក្រោយអាហារល្ងាច៖ ជួយដំណើរនៃចលនារំលាយអាហារឱ្យងាយស្រួលក្នុងការរំលាយ។

៨. ផឹកទឹក៤០០មីលីលីត្រ២ម៉ោងមុនចូលគេង៖ ទម្លាប់នៃការទទួលទឹក រយៈពេល២ម៉ោងមុនចុលគេងវាក៏អាចជួយរក្សាជាតិទឹកនៅក្នុងរាងកាយឱ្យមានតុល្យភាព រហូតដល់ភ្ញាក់ពីដំណេកនាពេលព្រឹក ​និងជួយ​រក្សា​ជាតិ​ទឹក​ក្នុង​ខ្លួន ធ្វើឱ្យសន្លាក់​មាន​ជាតិ​រំអិល បំបែក​កាក​សំណល់ សម្អាតជាតិពុលក្នុងរាងកាយ ជួយគ្រប់គ្រងសីតុណ្ហភាពរាងកាយ...ផងដែរ។

គូសបញ្ជាក់ផងដែរថា ប្រសិនជាអ្នកអាចផឹកទឹកទៅតាមការកំណត់ខាងលើគឺក្នុងមួយថ្ងៃ ២៥០០មីលីលីត្រ ទៅ៣០០០មីលីត្រ ស្មើនឹង២.៥លីត្រទៅ៣លីត្រ ហើយផឹកទៅតាមពេលវេលាកមណត់ដូចខាងលើ រាងកាយរបស់អ្នកនឹងមានជាតិទឹកគ្រប់គ្រាន់ មិនងាយឈឺសន្លាក់ ការពារជំងឺច្រើនមុខ ជាពិសេសគឺជួយឱ្យតម្រងនោមុខភាពល្អ៕

អត្ថបទដោយ៖ មឿន គន្ធា