ស្បូនគឺជាសរីរាង្គសំខាន់១សម្រាប់មនុស្សស្រី ស្បូនគឺជាក៏ងាយនឹងប្រឈមជាមួយគ្រោះថ្នាក់ខ្លាំងណាស់ងាយឆ្លងមេរោគ បាក់តេរីដែលបង្កជាបញ្ហារោគស្រ្តីដូចជា ធ្លាក់សរមាស់ ក្រហាយ មានក្លិន ឬក៏អាចប្រឈមនឹងជំងឺស្រុតស្បូនឡើងមក ដែលជំងឺនេះជាគ្រោះថ្នាក់សំខាន់១សម្រាប់មនុស្សស្រី។

ជាការពិតណាស់ យោងតាមរយៈការចែករំលែករបស់មន្ទីរពេទ្យកាលម៉ែត បានចែករំលែកថា ជំងឺស្រុតស្បូនជាជំងឺមួយដែលជួបញឹកញាប់ជាងគេ និងមានប្រមាណ៣០%នៃស្ត្រី ជាពិសេសស្ត្រីវ័យចំណាស់ និងអស់រដូវ។ ជំងឺនេះបង្កឲ្យមានផលវិបាកធ្ងន់ធ្ងរដល់សុខភាព និងមានផលរំខានដល់ប្រព័ន្ធបង្ហូរទឹកនោមខាងក្រោម សុខភាពផ្លូវភេទ និងការបន្ទោរបង់

រោគសញ្ញាជំងឺស្រុតស្បូនមានដូចជា៖

- មានផលរំខានលើមុខងារបង្ហូរទឹកនោម

- អ្នកជំងឺជ្រាបទឹកនោម នៅពេលប្រឹង ក្អក សើច ឬលើករបស់ធ្ងន់ ។ល។

- អ្នកជំងឺមានអារម្មណ៍ថា ហាក់ដូចជាមានដុំតឹងណែនរំខាននៅក្នុងទ្វារមាស

- អ្នកជំងឺមានផលរំខានក្នុងការបន្ទោរបង់លាមក

- អ្នកជំងឺអាចជ្រាបលាមក ឬលេចផោម ដោយឯកឯង

- ឈឺនៅអាងត្រគាក មានធ្លាក់ស រលាកទ្វារមាស

- ផលរំខានក្នុងការរួមភេទ

- ក្នុងករណីធ្ងន់ធ្ងរ អ្នកជំងឺមានលៀនចេញនូវសរីរាង្គមួយចំនួនដូចជា ផ្លោកនោម ស្បូន ទ្វារលាមក តាមទ្វារមាសចេញមកក្រៅ។

ចំពោះមូលហេតុដែលបង្កជំងឺស្រុតស្បូននេះមានដូចជា៖

- ភាពចុះខ្សោយប្រព័ន្ធទម្រអាងត្រគាក (Défaillance du système d’amarrage)

- ភាពមិនធម្មតារបស់ឆ្អឹងអាងត្រគាក ដែលមានពីកំណើត (anomalie osseuse)

- ភាពចុះខ្សោយ ស្វិត និងយារ របស់សាច់ដុំអាងត្រគាក

- ស្ត្រីធ្លាប់សម្រាលកូនច្រើន ដែលធ្វើឲ្យចុះខ្សោយសាច់ដុំអាងត្រគាក

- មានជំងឺទល់លាមកញឹកញាប់

- ធ្វើការធ្ងន់ ឬលើករបស់របរធ្ងន់ៗ

- ស្ត្រីឆាប់អស់រដូវ ដោយសារកង្វះអរម៉ូន

- ស្ត្រីដែលធ្លាប់មានការវះកាត់ជំងឺស្បូន និងជំងឺទ្វារលាមក។

វិធីការពារជំងឺស្រុតស្បូន៖នេះបើយោងតាមរយៈគេហទំព័រ voicesforpfd គេបានបញ្ជាក់ថា ដើម្បីការពារជំងឺស្រុតស្បូនស្រ្តីគប្បីអនុវត្តក្បូនដូចជា៖

-ធ្វើលំហាត់ប្រាណសាច់ដុំអាងត្រគាក៖ ការធ្វើសាច់ដុំអាងត្រគាកនេះ មិនមែនបានន័យថា អាចជួយ១០០ភាគរយឱ្យស្រ្តីលែងមានបញ្ហាស្រុតស្បូនឬក៏ស្រុតស្បូនហើយហាត់ប្រាណបែបនេះជានោះទេ គឺគ្រាន់ជាចំណែកមួយជួយកាត់បន្ថយហានិភ័យនៃជំងឺនេះ ឬក៏ស្រ្តីដែលកំពុងមានបញ្ហាហាត់ទៅអាចជួយបន្ធូរអាការរបស់គាត់ឱ្យប្រសើរជាងមុន។ចំពោះរៀបហាត់អាចជ្រើសយកក្បាច់ squat ៖របៀបហាត់ ឈរឱ្យត្រង់ហើយដាក់កែងជើងឱ្យស្មើរនឹងស្មារ ញែកចុងជើងចេញក្រៅ១៥ដឺក្រេ ស្រូបខ្យល់ចូល ហើយបិតដង្ហើម ប្រឹងក្បាលពោះ ចាប់ផ្ដើមទម្លាក់គូទចុះ​ ធ្វើយ៉ាងណាកុំឱ្យជង្គង់លើសចុងជើង ងើបឱ្យត្រង់ឱ្យវិញ ហើយផ្លុំខ្យល់ចេញតាមមាត់។ ធ្វើឱ្យបាន១០ដង ក្នុងមួយជុំ អាចធ្វើបាន៥ជុំក្នុង១ថ្ងៃ។

បញ្ជាក់នៅមានក្បាច់ជាច្រើនទៀត អ្នកអាចជ្រាវជ្រាវបន្ថែមដោយខ្លួនឯងចូលចិត្តហាត់១ណាអាចហាត់មួយនឹងបាន ​គ្រាន់តែលំហាត់ប្រាណដែលយើងបានណែនាំគឺស្រួលហាត់នឹងបានផលល្អ។

-រក្សាគីឡូ៖ ស្រ្តីលើសទម្ងន់គឺប្រឈមជាមួយជំងឺស្រុតស្បូន ដូច្នេះការរក្សាគីឡូមិនឱ្យលើសខ្លាំងពេក ឬក៏ស្គមពេកពិតជាប្រយោជន៍សម្រាប់ស្រ្តីខ្លាំងណាស់ ព្រោះអាចកាត់បន្ថយហានិភ័យបានខ្លះ។

-ពិនិត្យសុខភាព៖ ប្រសិនណាអ្នកជាមនុស្សឧស្សាហ៍ទល់លាមក ឬក៏ឧស្សាហ៍ក្អករុំារ៉ៃ សូមឧស្សាហ៍ទៅពិនិត្យសុខភាពស្បូនរកមើលជំងឺស្រុតស្បូនឱ្យបានត្រឹមត្រូវ ព្រោះកត្តាទាំងនេះអាចជះឥទ្ធិពលធ្វើឱ្យស្រ្តីងាយមានបញ្ហាស្រុតស្បូនទាំងមិនដឹងខ្លួន។

ជាចុងក្រោយប្រសិនណាអ្នកមានរោគសញ្ញាដូចបានរៀបរាបខាងលើគួរតែមកពិគ្រោះយោបលជាមួយគ្រូពេទ្យជំនាញឱ្យបានត្រឹមត្រូវ បើរកឃើញអាចងាយស្រួលក្នុងការព្យាបាលជាមួយគ្រូពេទ្យជំនាញឱ្យបានទាន់ពេលវេលា៕