លោក វេជ្ជបណ្ឌិត លឹម តាំងឡូត ដែលជាវេជ្ជបណ្ឌិតឯកទេសជំងឺទឹកនោមផ្អែម ក្រពេញ និង អ័រម៉ូន មកពីគ្លីនិកខេអេស បានពន្យល់ថា​ ជំងឺទឹកនោមផ្អែមកើតឡើងដោយសារលើសជាតិស្ករនៅក្នុងចរន្តឈាមលើសពីកម្រិតធម្មតា ដែលសរីរាង្គពុំអាចចាប់យកជាតិស្ករមកប្រើប្រាស់ឬស្តុកទុកបាន។ នៅពេលណាដែលជាតិស្ករកើនឡើងច្រើនលើសលប់ វាធ្វើឱ្យលេចសារធាតុផ្អែមតាមទឹកនោម។​

ក្នុងករណីអ្នកជំងឺកើតឡើងជាតិស្ករក្នុងកម្រិតតិចតួចវាមិនបង្ហាញរោគសញ្ញាអ្វីឱ្យឃើញទាំងអស់ ប៉ុន្តែនៅពេលមានការកើនឡើងលើសលប់អ្នកជំងឺនឹងចាប់ផ្ដើមមានអាការ បត់ជើងតូចច្រើន អស់កម្លាំង ល្ហិតល្ហៃ ស្រកគីឡូ ជាដើម។ លោកវេជ្ជបណ្ឌិតបន្តថា ប្រសិនបើមានករណីសង្ស័យថាខ្លួនឯងមាន អាការជំងឺទឹកនោមផ្អែម ចូរចាំរឿង៣យ៉ាង ដែលគួរធ្វើទី១ត្រូវទៅជួបគ្រូពេទ្យដើម្បីធ្វើរោគវិនិច្ឆ័យនិងគោរពតាមវេជ្ជបញ្ជា ទី២ត្រូវធ្វើលំហាត់ប្រាណ ទី៣ត្រូវធ្វើរបបអាហារឱ្យបានត្រឹមត្រូវ។

ចំពោះរបបអាហារ បើមិនចង់ឱ្យជំងឺកាន់តែវិវត្តទៅមុខ អ្នកជំងឺត្រូវយល់ដឹងពី ក្រុមអាហារ៣ប្រភេទ គឹអាហារមានសន្ទុះជាតិស្ករទាប អាហារមានសន្ទុះជាតិស្ករមធ្យម អាហារមានសន្ទុះជាតិស្ករខ្ពស់។​ អាហារមានសន្ទុះជាតិស្ករទាប មានដូចជាក្រុមផ្លែឈើ សណ្ដែកក្រហម ការ៉ុត...។ ចំណែកអាហារមានសន្ទុះជាតិស្ករមធ្យម មានដូចជាចេក ម្នាស់ ទំពាំងបាយជូរ ទឹកឃ្មុំជាដើម។ រីឯអាហារមានសន្ទុះជាតិស្ករខ្ពស់ មានដូចជាបាយ មី គុយទាវ លោតឆា មីឆា នំបុ័ង ដំឡូង និងភេសជ្ជៈប៉ូវកម្លាំងមួយចំនួន។

ប្រសិនបើអ្នកជំងឺបរិភោគអាហារសន្ទុះជាតិស្ករខ្ពស់ ជាតិស្ករនឹងឡើងលើសលប់ក្នុងចរន្តឈាម រាងកាយមិនមានលទ្ធភាពគ្រប់គ្រងជាតិស្ករនោះទេ។ ជាទូទៅគ្រូពេទ្យណែនាំឱ្យអ្នកជំងឺបរិភោគអាហារ៣ពេល ដែលមានទាំងបាយ(ត្រឹម១កូនចានចង្កឹះ) បន្លែ(ទទួលទានឱ្យច្រើនតាមដែលអាចធ្វើបាន) សាច់គ្រប់ប្រភេទ(ចៀសវាងសាច់ជាប់ខ្លាញ់)។ អ្នកជំងឺគួរចៀសវាងការទទួលទានរបបអាហារស្ករ២មុខចូលគ្នា ឧទាហរណ៍ ដូចជាការបរិភោគបបរគ្រឿង ហើយមិនគួរថែមឆាខ្វៃ ឬគុយទាវ ទៀតឡើយ។ អ្នកជំងឺគួរជ្រើសរើសយកអាហារសម្រន់ជាប្រភេទ ផ្លែឈើវិញ ហើយផ្លែឈើទៀសសោត គួរញ៉ាំជាក្លែប ទាំងសាច់ទាំងទឹក មិនគួរគៀបយកតែទឹកផឹកទទេនោះទេ។

បើអ្នកជំងឺទឹកនោមផ្អែមនៅតែបន្តទទួលទានអាហារសន្ទុះជាតិស្ករខ្ពស់ នឹងបង្កជាផលវិបត្តិដល់សរសៃឈាមបាតភ្នែកអាចឈានដល់ពិការ សរសៃឈាមខួរក្បាលអាចពិការមួយចំហៀងខ្លួន សរសៃឈាមបេះដូងអាចស្លោកសាច់បេះដូង អាចប្រឈមនិងខូចតម្រងនោមអាចឈានដល់ការលាងឈាម និងស្ពឹកស្រពោនដៃជើងជាដើម។

ជំងឺទឹកនោមផ្អែកមិនមែនកើតតែលើមនុស្សចាស់នោះទេ វាក៏អាចកើតលើមនុស្សវ័យក្មេងផងដែរ ហេតុនេះប្រសិនបើមានអាការសង្ស័យគួរឆាប់ប្រញាប់ទៅជួបគ្រូពេទ្យ។ ឬប្រសិនបើកើតហើយគួរធ្វើតាមការណែនាំរបស់គ្រូពេទ្យ រើសញ៉ាំរបបអាហារឱ្យបានត្រឹមត្រូវ ដើម្បីកុំឱ្យបង្កគ្រោះថ្នាក់ធ្ងន់ធ្ងរដល់សុខភាព៕ 

អត្ថបទដោយ៖ Senghong