លោក Dale បានសរសេរក្នុងសៀវភៅ How to Stop Worrying and Start Living បានលើកសាច់រឿងមួយថា មានបុរសម្នាក់ មានកូនតូចបានស្លាប់ ធ្វើឱ្យបុរសនេះខូចចិត្តយ៉ាងខ្លាំង។ ហើយបុរសនោះបានប្រាប់ថា ដើម្បីបំបាត់ទុក្ខលំបាកក្នុងចិត្តរបស់ខ្ញុំ មានកូនប្រុសម្នាក់ទៀត មានអាយុ ៥ឆ្នាំ បានសុំធ្វើឱ្យគាត់ធ្វើកូនទូកតូចមួយ។ ពេលគាត់ចេះតែធ្វើៗ ទៅស្រាប់តែបានកូនទូកមួយ ដែលគាត់បានចាយពេលអស់ ៣ម៉ោង ធ្វើឱ្យគាត់ចាប់អារម្មណ៍ថា ខ្លួនគាត់ឈប់ពិបាកចិត្តទៀតហើយ។ គាត់ក៏បន្តធ្វើកិច្ចការផ្សេងៗ ដោយភាពច្នៃប្រឌិតច្រើនបំផុត។ ហើយនៅទីបញ្ចប់គាត់បាននិយាយថា បើគ្មានកិច្ចការអស់ទាំងនេះទេ ជីវិតរបស់ខ្ញុំនឹងបាក់ទឹកចិត្ត គ្មានគោលដៅជីវិត ហើយអាចស្លាប់ព្រោះតែក្តីទុក្ខនេះផងមើលទៅ!

តាមចច ប៊័រណាត សួរ៍ បានលើកឡើងថា “មូលហេតុមនុស្សមានក្តីទុក្ខព្រោះតែពួកគេមានពេលទំនេរច្រើន បណ្តោយឲ្យចិត្តមកសួររំខានខ្លួនឯងថា តើអ្នកមានសេចក្តីសុខដែរ?” ពេលអ្នកមានបញ្ហារឿងអ្វីមួយ ហើយទុកឱ្យខ្លួននៅទំនេរ ខួរក្បាលរបស់អ្នកចេះបណ្តុះគ្រាប់នៃក្តីទុក្ខកាន់តែច្រើនរហូត។

និយាយទៅ! មនុស្សយើងសុទ្ធតែមានរឿងលំបាកចិត្តគ្រប់គ្នា បើយើងធ្វើរឿង ១នេះដូចជាបុរសខាងលើគឺត្រូវរកអ្វីមួយមកធ្វើឱ្យមានកិច្ចការមមាញឹកជាប្រចាំឬកុំទុកខ្លួនឱ្យនៅទំនេរ។ តាមលោកគ្រូពេទ្យ រីឆាដ ស៊ី ខេបូត ជានិពន្ធសៀវភៅ what Men live គាត់បានសរសេរថា ធ្វើជាគ្រូពេទ្យម្នាក់ ខ្ញុំមានចិត្តរីករាយបំផុតពេលឃើញខ្លួនមានកិច្ចការច្រើនជួយមនុស្សជាច្រើនឱ្យជាសះស្បើយពីជំងឺផ្លូវចិត្តដែលមានដើមហេតុមកពីទុក្ខកង្វល់ ភាពស្ទាក់ស្ទើរ ការសម្រេចចិត្តមិនដាច់ស្រេច និងការភ័យខ្លាចនេះឯង។ ការមានកិច្ចការយ៉ាងមមាញឹកនឹងជួយលើកផ្លូវចិត្ត និងជួយ បង្កើនទំនុកចិត្តចំពោះខ្លួនឯងថែមទៀត”។

សូមអ្នកកុំទុកខ្លួនឱ្យនៅទំនេរ!... ចូររកអ្វីមួយមកធ្វើ!... នេះគឺជាថ្នាំដែលមានតម្លៃថោកជាងគេបំផុតហើយក៏ជាថ្នាំដែលមានប្រសិទ្ធភាពបំផុតជួយព្យាបាលផ្លូវចិត្តរបស់អ្នកដែរ។ បើអ្នកចង់ជម្រុះនិស្ស័យចូលចិត្តឱបទុក្ខ ចូរអ្នកធ្វើតាមរឿងមួយនេះសូមអ្នកកុំទុកខ្លួននៅទំនេរ! ពេលខំធ្វើកិច្ចការអ្វីមួយ ចិត្តអ្នកគ្មានពេលវេលាមកគិតពីរឿងលំបាកចិត្ត រឿងខូចបន្ត...នោះទេ ហើយពេលធ្វើការ មានលទ្ធផលចិត្តរបស់អ្នកកាន់តែសប្បាយ និងរីករាយផងដែរ៕ អត្ថបទដោយ៖ ទ្រ សុភាព