យោងតាមសមាគមឧកញ៉ាកម្ពុជាបានឱ្យដឹងថា ឧកញ៉ា កែវ សម្បត្តិ ប្រធានក្រុមប្រឹក្សាភិបាលនៃក្រុមហ៊ុន Visionary Alliance for Educations និងជាសមាជិក នៃសមាគមឧកញ៉ាកម្ពុជា បានប្រារព្ធពិធីសម្ពោធជាផ្លូវការនូវយីហោ សាលា ប្រូមស៍ក្រូវ ដែលមានមូលដ្ឋាននៅចក្រភពអង់គ្លេសមកដំណើរការនៅក្នុងព្រះរាជាណាចក្រកម្ពុជា។

កម្មវិធីសម្ពោធនេះដែលក៏មានការអញ្ជើញចូលរួមពី សំណាក់ ឯកឧត្តម Marc Thayre ដែលជាអនុប្រធានបេសកកម្មទទួលបន្ទុកផ្នែកអប់រំនៅកម្ពុជា និងជាតំណាងដ៏ខ្ពង់ខ្ពស់របស់ស្ថានទូត នៃចក្រភពអង់គ្លេស និងលោក Martin នាយកប្រតិបត្តិនៃសភាពាណិជ្ជកម្មរបស់ចក្រភពអង់គ្លេស ព្រមទាំងភ្ញៀវកិត្តិយសជាច្រើនរូបទៀតផងដែរ។

ឧកញ៉ា កែវ សម្បត្តិ បានលើកឡើងពីការប្តេជ្ញាចិត្តយ៉ាងមុតមាំក្នុងការប្រឹងប្រែងទាំងកម្លាំងកាយ និងកំលាំងចិត្តដើម្បីនាំយកនូវគុណភាពនៃការសិក្សាលំដាប់ពិលោកមកបម្រើដល់កុលបុត្រកុលធីតាកម្ពុជាដែលជាការចូលរួមជាមួយនឹងរាជរដ្ឋាភិបាលក្នុងការបណ្តុះបណ្តាលនូវធនធានមនុស្សប្រកបដោយគុណភាព និងសមត្ថភាពខ្ពស់ដើម្បីជាសរសរទ្រូងដ៏រឹងមាំក្នុងការជ្រោមជ្រែងកសាងប្រទេសជាតិ។

សាលានឹងចាប់ផ្តើមសិក្សាថ្មីដំបូងរបស់សាលានឹងចាប់ផ្តើមចូលរៀននៅខែសីហា ឆ្នាំ២០២៥ ខាងមុខនេះហើយ ដោយចាប់ផ្តើមទទួលចុះឈ្មោះសិស្សក្នុងពេលឆាប់ៗខាងមុខនេះព្រមទាំងមានការផ្តល់ជូនជាពិសេសដល់ក្រុមគ្រួសារដែលបានចុះឈ្មោះមុនគេផងដែរ។

សូមបញ្ជាក់ថា សាលានឹងមានទទួលសិស្សានុសិស្សឱ្យចូលសិក្សាចាប់ពីអាយុ ២ឆ្នាំឡើងទៅរហូតដល់សិស្សថ្នាក់ទី១២តែម្តងដោយសាលាបានបំពាក់ទៅដោយបរិក្ខាយ៉ាងសំបូរបែបដែលជាការចាំបាច់គាំទ្រដល់កម្មវិធីសិក្សារបស់ប្រូមស៍ក្រូវ។សម្រាប់ព័ត៌មានលម្អិត សូមទាក់ទងមកកាន់សាលាដោយផ្ទាល់តាមរយៈទូរសព្ទលេខ 012 718 555 ឬ 016 718 555