កាហ្វេជាភេសជ្ជៈដែលជួយប្រឆាំងអុកស៊ីតកម្មដ៏ល្អបំផុតនៅក្នុងរបបអាហារ វាក៏ជាប្រភពនៃប៉ូតាស្យូម វីតាមីន B និង riboflavin ជួយកាត់បន្ថយហានិភ័យនៃជំងឺដូចជាជំងឺទឹកនោមផ្អែមប្រភេទទី 2 ជំងឺថ្លើម និងប្រភេទមួយចំនួននៃជំងឺមហារីកផងដែរ ប្រសិនជាផឹកត្រូវតាមបរិមាណកំណត់។ ប៉ុន្តែប្រសិនជាអ្នក ចូលលក្ខណៈញៀនការហ្វេ ផឹកលើសបរិមាណកំណត់វានឹងក្លាយទៅជាភេសជ្ជៈបំផ្លាញសុខភាពវិញជាពិសេសគ្រឿងក្នុង។

ជាការពិតណាស់ យោងតាមការឱ្យដឹងពីគេហទំព័រ Eat This, Not That បានបញ្ជាក់ថា ជាធម្មតាកាហ្វេខ្មៅគឺគេណែនាំឱ្យផឹកក្នុងបរិមាណ ៣ទៅ៤ពែងក្នុង១ថ្ងៃមិនប៉ះពាល់អ្វីនោះទេគឺវាថែមទាំង ជួយកាត់បន្ថយហានិភ័យនៃជំងឺតម្រងនោមរុំារ៉ៃបានរហូតដល់២៣%ទៀតផង។ ប៉ុន្តែបើអ្នកផឹកកាហ្វេថែមទឹកដោះគោ ស្ករ ឬគ្រីម គឺគេណែនាំឱ្យអ្នកផឹកតែ២ពែងប៉ុណ្ណោះក្នុងមួយថ្ងៃ។

ករណីអ្នកព្យាយាមផឹកលើសបរិមាណនេះ ផឹកទៅតាមចិត្តចង់ ផឹកទៅតាមការស្រេក ផឹកគ្មានម៉ោងកំណត់ មិនដឹងយប់ថ្ងៃ នោះសារធាតុ៣យ៉ាងនៅក្នុងការហ្វេ ដែលមានដូចជាជាតិកាហ្វេអ៊ីនជាដើមនោះ វានឹងបំផ្លាញតម្រងនោមរបស់អ្នកបន្តិចម្តងៗរហូតដល់អ្នកទៅជាកើតជំងឺតម្រងនោមរ៉ាំរ៉ៃ។

មួយវិញទៀត ក្រៅពីផឹកកាហ្វេឱ្យត្រូវបរិមាណ អ្នកផឹកកាហ្វេទាំងអស់ត្រូវដឹងម៉ោងល្អសម្រាប់ផឹកកាហ្វេ មិនមែនចេះតែផឹកទៅតាមចិត្តចង់នោះទេ៖

ចន្លោះម៉ោង ៩ព្រឹកចុះក្រោម (មិនសូវល្អ)

ម៉ោង ៩កន្លះព្រឹក ដល់ ម៉ោង១១កន្លះ (ល្អ)

ម៉ោង ១២ថ្ងៃត្រង់ ដល់ ម៉ោង០១រសៀល (មិនល្អ)

ម៉ោង ០១រសៀល ដល់ ០៥ល្ងាច (ល្អ) ចំពោះអ្នកមានបញ្ហាដំណេកផឹកត្រឹមម៉ោង៣រសៀលបានហើយ

ចាប់ពីម៉ោង ៥ល្ងាចទៅ(មិនល្អ)។

គូសបញ្ជាក់ផងដែរថា បន្ទាប់ពីបានអានអត្ថបទនេះរួចអ្នកគួរងាកទៅសម្គាល់ខ្លួនឯងវិញថា រាល់ថ្ងៃអ្នកផឹកកាហ្វេក្នុងបរិមាណណា តែងតែផឹកនៅបរិមាណណា? បើរាល់ថ្ងៃអ្នកផឹកកាហ្វេច្រើនលើសបរិមាណកំណត់ អ្នកគួរកាត់បន្ថយវិញ បើផឹកខុសម៉ោង គឺគួរតែប្តូរទម្លាប់មកផឹកឱ្យត្រូវម៉ោងវិញ។ ពីព្រោះថា កាហ្វេរាល់ថ្ងៃមិនមែនយើងអាចផលិតបានខ្លួនឯងដោយមិនយកលុយទៅទិញនោះទេ ដូច្នេះអ្នកផឹកត្រូវឆ្លាត ចំណាយលុយឱ្យចំគោលដៅ កុំឱ្យចំណាយលុយហើយមិនបានផលប្រយោជន៍ពីកាហ្វេ តែបែរជាទាញជំងឺពីកាហ្វេវិញ៕

អត្ថបទដោយ៖ មឿន គន្ធា