ជំងឺស្ទះសរសៃឈាមក្នុងខួរក្បាលគឺជាជំងឺមួយដែលកើតមានឡើង ដោយសារបរិមាណឈាមទៅចិញ្ចឹមខួរក្បាលមានការថយចុះ ឬក៏បាត់បង់ទាំងស្រុង។ ចំពោះកត្តាដែលធ្វើឱ្យបរិមាណឈាមនៅក្នុងខួរក្បាលមានការថយចុះ គឺអាចបណ្ដាលមកពីកត្តា សរសៃឈាមមានការរួមតូច ដោយដុំកំណកខ្លាញ់ ឬក៏ស្ទះសរសៃឈាមជិតឈឹង ដោយសារកំណកឈាម។
យោងតាមប្រសាសន៍ វេជ្ជបណ្ឌិត ភួង សុភ័ក្រ្ត ជាគ្រូពេទ្យឯកទេសបេះដូង នៅមន្ទីរសម្រាកព្យាបាល ហេមេត និងជាគ្រូពេទ្យផ្នែកសង្គ្រោះបន្ទាន់ និងឆ្លុះសរសៃឈាមបេះដូងបម្រើការនៅមន្ទីរពេទ្យមិត្តភាពខ្មែរសូវៀត នឹងធ្វើការបកស្រាយជុំវិញ លើកត្តាបង្ក និងរោគសញ្ញានៃជំងឺស្ទះសរសៃឈាមខួរក្បាល។
វេជ្ជបណ្ឌិតភួង សុភ័ក្ត្រ បានលើកឡើងអំពីមូលហេតុនាំឳ្យកើតជំងឺស្ទះសរសៃឈាមខួរក្បាលមាន៣៖
-ជំងឺបេះដូងដែលបង្កឳ្យមានដុំកំណកឈាម ដូចជា: ជំងឺវិបត្តិចង្វាក់បេះដូង (Atrial fibrillation), ជំងឺខូចប្រឹសបេះដូង (Mitral stenosis), ជំងឺខ្សោយបេះដូង (Advance heart failure)
-បញ្ហាកំណកខ្លាញ់ធ្វើឳ្យប្រហោងសរសៃឈាមរួមតូច (Atherosclerosis)
-Unknown cause។
លោកវេជ្ជបណ្ឌិតបានបន្តថា សម្រាប់រោគសញ្ញាសំខាន់ដែលយើងគួរកត់សម្គាល់រួមមាន៖
-អ្នកជំងឺអាចមានរោគសញ្ញា បាត់បង់លំនឹង ឈរលែងកើត មានអាការៈធីងធោង។
-ភ្នែកមើលទៅខុសប្រក្រតី មើលទៅស្រវាំង ឬក៏មើលលែងឃើញ ឬក៏អាចមើលរបស់អ្វីមួយបែកជា២ ឬក៏ត្របកភ្នែករបស់អ្នកជំងឺគឺមានការធ្លាក់ បិទមិនជិតជាដើម។
-មុខផ្នែកខាងណាមួយរបស់អ្នកជំងឺគឺមានការខ្សោយ (មុខធ្លាក់មួយចំហៀង ស្ពឹកមុខ)
-អវយវៈដៃជើង ២ផ្នែកនេះ អាចមានផ្នែកណាមួយខ្សោយ ដូចជាការស្ពឹក មិនដឹងឈឺ មិនដឹងក្ដៅ មិនដឹងត្រជាក់។
-ការនិយាយ គឺអ្នកជំងឺអាចនិយាយលែងកើតភ្លាមៗ និយាយស្ដាប់មិនបាន ខុសប្រក្រតីនេះក៏ចាត់ជាសញ្ញានៃជំងឺស្ទះសរសៃឈាមខួរក្បាលដូចគ្នា។
បន្ថែមលើសពីនេះ បណ្ឌិតភួង សុភ័ក្រ្ត ក៏បានផ្ដាំផ្ញើថាប្រសិនណាបងប្អូនមានសញ្ញាណាមួយកើតមានឡើងលើខ្លួនឯង ឬអ្នកនៅជុំវិញខ្លួន ដូចបានរៀបរាប់ខាងលើ សូមប្រញាប់បញ្ចូនមកជួបពេទ្យឯកទេសឱ្យបានលឿន ដើម្បីឱ្យគ្រូពេទ្យពិនិត្យ ធ្វើរោគវិនិច្ឆ័យ និងព្យាបាលឱ្យបានត្រឹមត្រូវតាមវេជ្ជសាស្ត្រ។ ដំណាក់កាលនៃការព្យាបាល ត្រូវឳ្យបានឆាប់រហ័ស តាមវេជ្ជសាស្ត្រត្រឹមត្រូវ ទើបអាចសង្គ្រោះជីវិតអ្នកជំងឺបាន ព្រោះថាជំងឺស្ទះសរសៃឈាមខួរក្បាល គឺអាចគ្រោះថ្នាក់អាយុជីវិត និងប្រឈមពិការភាពផងដែរ បើយើងធ្វើប្រហែសយឺតយ៉ាវ ឬព្យាបាលមិនបានត្រឹមត្រូវ។
ជាចុងក្រោយលោក ប្រសិនណាបងប្អូនមានចម្ងល់ពាក់ព័ន្ធជំងឺស្ទះសរសៃឈាមខួរក្បាល បងប្អូនអាចមកពិគ្រោះជាមួយ លោកវេជ្ជបណ្ឌិត ភួង សុភ័ក្រ្ត ផ្ទាល់ឬលេខទូរស័ព្ទ 078 89 69 19 (24 ម៉ោង) ឬមកកាន់មន្ទីរពេទ្យផ្ទាល់ ហេមេត បានរយៈហ្វេសបុកផេកផ្ទាល់ HEMAT Heart & Maternity Clinic៕
អត្ថបទដោយ៖ ប៉ែត ធីតា(petthida)
