ពេលប្រជាជនខ្មែរយើងខ្វះការយល់ដឹងពីរបៀបថែសុខភាព នាំកើតជំងឺច្រើនមុខណាស់។ យោងតាមអង្គការសុខភាពពិភពលោក(WHO) បានធ្វើការស្ទង់មតិនៅស្រុកខ្មែរតាមជនបទកាលពីឆ្នាំ ២០០៥ បានបញ្ជាក់ថា អត្រានៃអ្នកជំងឺទឹកនោមផ្អែមចន្លោះពី ៥% ទៅ ១០% ជាមនុស្សមានវ័យ ២៥ឆ្នាំជាង។ នេះជាចម្លើយគួរឱ្យភ្ញាក់ផ្អើលមែនទែន ចំពោះប្រជាជនខ្មែរមួយចំនួន មានការលើសគីឡូ បើប្រៀបធៀបជាមួយប្រទេសដទៃទៀត។
តាមលោកវេជ្ជបណ្ឌិត Raymond Francis បញ្ជាក់ថា រាល់ជម្ងឺទាំងអស់របស់មនុស្សមានការទាក់ទងនឹងជាតិស្ករកែច្នៃ។ នៅក្នុងនោះមានជំងឺទឹកនោមផ្អែម និងមហារីកដែរ។” ព្រោះប្រជាជនខ្មែរយើងភាគច្រើន ជាក់ស្តែងយុវជន និងមនុស្សចាស់មួយចំនួនធំ ចូលចិត្តអាហារ និងភេសជ្ជៈជាតិស្ករលើសកម្រិត មានទឹកក្រឡុក មានទឹកសេរ៉ូ និងគ្រឿងកំប៉ុងផ្សេងៗទៀត សុទ្ធតែមានជាតិស្ករមិនតិចមួយស្លាបព្រានោះទេ ជាហេតុនាំអ្នកឱ្យកើតជំងឺទឹកនោមផ្អែម កើតរោគធាត់ និងកើតរោគបេះដូងជាដើម។” យោងតាមសមាគមបេះដូងអាមេរិចបានណែនាំឱ្យបុរសទទួលទានជាតិស្ករមិនលើសពី ៣៧ក្រាម (៩ស្លាបព្រាកាហ្វេ) និងស្ត្រីទទួលទានមិនលើសពី ២៥ក្រាម (៦ស្លាបព្រាកាហ្វេ) ក្នុងមួយថ្ងៃ។
តាមលោកវេជ្ជបណ្ឌិត Chris Steele មានអាយុ ៧៨ឆ្នាំ អ្នកជំនាញផ្នែកវេជ្ជសាស្ត្រ សញ្ជាតិអង់គ្លេស បានបញ្ជាក់បន្ថែមថា “ផ្លែប៉ោម ជាប្រភពជាតិសរសៃដ៏អស្ចារ្យដែលមានសារធាតុចិញ្ចឹមកាត់បន្ថយហានិភ័យជំងឺបេះដូង និងជំងឺទឹកនោមផ្អែមប្រភេទទី២។” សូម្បីអ្នកឧកញ៉ាវេជ្ជបណ្ឌិត គួច ម៉េងលី បានប្រាប់ក្រុមការងារចាបបៃតង កាលសម្ភាសរយៈពេលជិត ២ម៉ោង នៅឆ្នាំ២០២១ ថា “ខ្ញុំតែងហូបផ្លែប៉ោមមួយផ្លែជាប្រចាំថ្ងៃ បើថ្ងៃណាគ្មានផ្លែប៉ោមទេ ខ្ញុំហូបចេកជំនួសវិញ។ ព្រោះផ្លែប៉ោមមានឥទ្ធិពលក្នុងការទប់ស្កាត់ កុំឱ្យកោសិកាខូច និងពង្រឹងប្រព័ន្ធរាងកាយ កុំឱ្យចុះខ្សោយ។”
តាមគេហទំព័រ Healthline បានបញ្ជាក់ឱ្យដឹងថា នៅក្នុងផ្លែប៉ោមមានសារធាតុបី ទីមួយ Quercetin អាចកាត់បន្ថយល្បឿនជាតិស្ករពីអាហារកាបូអ៊ីដ្រាត ឬស្រូបជាតិស្ករចេញពីអាហារ។ ទីពីរ Chlorogenic acid ជួយឱ្យរាងកាយប្រើប្រាស់ជាតិស្ករមានប្រសិទ្ធភាពជាងមុន។ ទីបី Phlorizin ជួយកាត់បន្ថយជាតិស្ករបែបគីមី ឬពីអាហារកែច្នៃ ហើយជួយបន្ថែមជាតិស្ករធម្មជាតិដល់ចរន្តឈាមឡើងវិញផងដែរ។
សម្រាប់អ្នកជំងឺទឹកនោមផ្អែម និងមិនទាន់មានវិញ ការញ៉ាំផ្លែប៉ោម ជួយកាត់បន្ថយជាតិស្ករក្នុងរាងកាយមានប្រសិទ្ធភាព។ ហើយអ្នកត្រូវបញ្ចូលទម្លាប់មួយចំនួនទៀត ដូចជាការហាត់់ប្រាណ និងមានរបបអាហារបែបធម្មជាតិ ដូចជាត្រី បន្លែ និងផ្លែឈើ ជួយកាត់បន្ថយ និងការពារជំងឺទឹកនោមផ្អែម៕ អត្ថបទដោយ៖ ទ្រ សុភាព
