អ្នកឆ្ងល់ទេថា ប្រទេសជប៉ុន និងអ្នករស់នៅតំបន់កោះអាយុវែងអូគីណាវ៉ា មានចំនួនអ្នកកើតជំងឺមហារីកតិច និងសម្បូរមនុស្សរស់នៅអាយុវែងច្រើនជាងគេ។ ព្រោះពួកគេមានភេសជ្ជៈមួយ ដែលពួកគេហៅថា “ភេសជ្ជៈទិព្វការពារជំងឺ ហើយបន្តអាយុវែង” គឺភេសជ្ជៈតែបៃតងដ៏មានឥទ្ធិពលនេះឯង។

បើយោងតាមសមាគមជំងឺមហារីកអាមេរិក(CDC) បញ្ជាក់ថា រយៈពេល ១៥ឆ្នាំចុងក្រោមមកនេះ អត្រាជំងឺមហារីកថ្លើមចេះតែកើនឡើងច្រើនជាង ៤០%។ រៀងរាល់ឆ្នាំ នៅទូទាំងពិភពលោក មានអ្នកកើតជំងឺមហារីកចំនួនថ្មី ៨០០.០០០នាក់ ហើយមានការស្លាប់ប្រហែល ៧០០.០០០នាក់ដែរ។ តើតែបៃតងអាចជួយជំងឺមហារីកថ្លើមដោយរបៀបណ?

តាមវេជ្ជបណ្ឌិតលោក Fung Lung Chung សញ្ជាតិជប៉ុនបានធ្វើការស្រាវជ្រាវនៅសាកលវិទ្យាល័យ Georgetown និងជាអ្នកជំនាញផ្នែកជំងឺមហារីក មានប្រសាសន៍ថា ខ្ញុំអត់ដឹងថា ម្តាយខ្ញុំនិយាយត្រូវ ឬខុសនោះទេថា តែបៃតងជួយការពារជំងឺមហារីកនោះ។ ហើយខ្ញុំចាប់ផ្តើមធ្វើការពិសោធលើតែបៃតងនេះ។ តាមការពិសោធន៍លើសត្វកណ្តុរ បានបង្ហាញថា សារធាតុ Biomarker Y-OHPdG ជាប្រភេទនាំឱ្យខូចខាតជាលិកា DNA មិនអាចប្រឆាំងនឹងជំងឺមហារីកថ្លើម។ ហើយវាកើតឡើងមកពីការជក់បារី ការផឹកសា្រ និងកត្តាអាហារមួយចំនួន។ ហើយអ្នកវះកាត់ជំងឺមហារីកថ្លើមរួច គេធ្វើការព្យាបាលដោយយកសារធាតុ polyphenol ដែលចម្រាញ់ចេញពីតែបៃតង។ តាមគេប៉ាន់ប្រមាណមានប្រសិទ្ធភាពប្រហែល ៧០%ទៅ៨០% ជំងឺមហារីកថ្លើមរបស់មនុស្ស។ 

តាមវេជ្ជបណ្ឌិតលោកស្រី Aiwu Ruth He ជាជំនួយការរបស់លោក Chung ក៏បានបន្ថែមថា ខ្ញុំសិក្សាមានពីរដំណាក់កាល ទី១. ខ្ញុំត្រូវធានាសុវត្ថិភាពក្នុងការសារធាតុចម្រាញ់តែបៃតង និងកំណត់បរិមាណចំនួនដូសផ្តល់ឱ្យមនុស្ស និងទី២. ជាការវាយតម្លៃថា តើការចម្រាញ់តែបៃតងអាចជួយកាត់បន្ថយកម្រិតនៃ Y-OHPdG នៅក្នុងថ្លើមរបស់មនុស្សក្នុងកម្រិតណាដែរ”។

នៅប្រទេសចិន និងឥណ្ឌា សម័យបុរាណ គ្រូពេទ្យតែងប្រើតែបៃតងជាថ្នាំរំញោច ថ្នាំបញ្ចុះទឹកនោម ថ្នាំបំបាត់ការឈឺចាប់ (គ្រប់គ្រងការហូរឈាម និងជួយព្យាបាលរបួស) និងធ្វើឱ្យសុខភាពបេះដូងប្រសើរឡើង។ មានវេជ្ជបណ្ឌិត និងអ្នកស្រាវជ្រាវច្រើន មិនទាន់ធានាទទួលស្គាល់ថា តៃបៃតងនេះ ជួយការពារជំងឺមហារីកថ្លើម និងជំងឺមហារីកផ្សេងបាន ១០០%នោះទេ ប៉ុន្តែតាមការពិសោធគេរកឃើញថា វាមានប្រសិទ្ធភាពជាវិជ្ជមាន និងប្រើបានផលតាមកម្រិតប្រភេទជំងឺមហារីកថ្លើម។ ជាពិសេសអ្នកមិនទាន់មានជំងឺទេ ការផឹកតែបៃតងជួយការពារអ្នកកុំឱ្យកើតជំងឺមហារីក និងជំងឺធ្ងន់ៗ ផ្សេងឯទៀតដែរ៕ អត្ថបទដោយ៖ ទ្រ សុភាព