អ្នកកើតជំងឺទឹកនោមផ្អែមមានកត្តាច្រើនយ៉ាងជាពិសេសអ្នកផឹកស្រា។ ព្រោះស្រាមានជាតិស្ករខ្ពស់ បើអ្នកទទួលទានក្នុងបរិមាណច្រើនជាប្រចាំថ្ងៃអាចប្រឈមមុខនឹងការលើសអាស៊ីត លើសជាតិខ្លាញ់និងលើសជាតិស្ករ និងមួយវិញទៀតផឹកភេសជ្ជៈផ្អែមៗ និងអាហារប្រៃផ្អែមច្រើនក៏ជាកត្តាជម្រុញឱ្យបុគ្គលម្នាក់កាន់តែប្រឈមជាមួយនឹងការកើតជំងឺទឹកនោមផ្អែមប្រភេទទី២លឿនដែរ។ កុំឱ្យស្តាយក្រោយពេលកើតជំងឺទឹកនោមផ្អែម អ្នកត្រូវដឹងពីសញ្ញាឈាមដែលលើសកម្រិតជាតិស្ករជាមុនសិន កុំអាងថាក្មេងមិនអី ព្រោះឥឡូវនេះក្មេងក៏អាចប្រឈមនឹងជំងឺទឹកនោមផ្អែមដែរ។

បើយោងតាមលោកវេជ្ជបណ្ឌិត មិញ ចាន់ភក្ដី ជាគ្រូពេទ្យឯកទេសព្យាបាលជំងឺទឹកនោមផ្អែមនិងជំងឺទូទៅនៅមន្ទីរពេទ្យ Sky Family Clinic បានរៀបរាប់ថា តាមមជ្ឈមណ្ឌលបង្ការជំងឺ (US CDC) បានចុះផ្សាយថានៅអាមេរិកក្នុងចំណោមមនុស្សបីនាក់មានម្នាក់ បានត្រៀមកើតជំងឺទឹកនោមផ្អែមរួចជាស្រេចហើយ អ្នកជំងឺដែលត្រៀមកើតទឹកនោមផ្អែម ជាបុគ្គលដែលធាត់លើសគីឡូគ្មានលំហាត់ប្រាណ ញ៉ាំអាហារផ្អែមៗ ក្លាយជាទម្លាប់ធម្មតារបស់គាត់ ហើយជាបុគ្គលតែងតែចូលចិត្តផឹកស្រា ជក់បារី និងគេងយប់ជ្រៅពេកធ្វើឱ្យជាតិស្ករក្នុងឈាមចេះតែកើនឡើង។ ហើយសញ្ញាអ្នកត្រៀមកើតជំងឺទឹកនោមផ្អែមនេះ គឺឈាមរបស់គាត់ចាប់លើសពី​១០០ ទៅ​១២៥​មិល្លីក្រាម​/ដេស៊ីលីត្រ គឺបូមសឈាមនៅពេលព្រឹកជាពេលគេមិនទាន់ហូបអាហារចូលពោះដើម្បីដឹងពីកម្រិតជាតិស្ករ។ បើអ្នកលើសជាតិស្ករក្នុងឈាមបែបនេះជាសញ្ញាបញ្ជាក់ថារយៈពេល ៣ទៅ៥ឆ្នាំខាងមុខទៀត អ្នកកើតប្រឈមនឹងជំងឺទឹកនោមផ្អែមហើយ បើមិនព្រមព្យាយាមកែទម្លាប់ខាងលើទេនោះ”។

ហើយលោកគ្រូពេទ្យ ចាន់ភក្ដី បានបញ្ជាក់បន្ថែមទៀតថា ការពិនិត្យសុខភាពរយៈពេលមួយឆ្នាំម្តងឬពីរម្តងសម្រាប់ប្រជាជនយើងដើម្បីដឹងពីអាការៈជំងឺរយៈពេល៥ឆ្នាំខាងមុន ហើយយើងអាចការពារជំងឺទុកជាមុន។ ព្រោះការពិនិត្យសុខភាពជួយការពារជំងឺទឹកនោមផ្អែមទុកជាមុនយ៉ាងល្អថាយើងលើសកម្រិតជាតិស្ករនិងខ្លាញ់កម្រិតណា? ឬមួយទៀតដឹងថា យើងកើតជំងឺទឹកនោមផ្អែមកម្រិតស្រាល ឬកម្រិតធ្ងន់ធ្ងរ? ហើយគួរហូបអាហារបែបណាល្អសុខភាព និងធ្វើលំហាត់ប្រាណដើម្បីបញ្ចុះជាតិស្ករក្នុងឈាមជាដើម”។ ចំណែកអ្នកជំងឺមិនអាចគ្រប់គ្រងជាតិស្ករ ព្រោះតែគ្មានការព្យាបាល និងលេបថ្នាំឱ្យបានត្រឹមត្រូវវេជ្ជបញ្ជារបស់ពេទ្យជាហេតុនាំឱ្យស្ថានភាពជំងឺទឹកនោមផ្អែមរបស់គាត់កាន់តែធ្ងន់ឡើងពីមួយថ្ងៃទៅមួយថ្ងៃ។

ដូចនេះហើយ ប្រសិនបើអ្នកធ្វើតេស្តឈាមហើយមានសញ្ញាលើសកម្រិតជាតិស្ករ ១០០មិល្លីក្រាម/ដេស៊ីលីត្រ កុំភ័យព្រួយអី គ្រាន់តែអ្នកប្តូរទម្លាប់តាមលោកគ្រូពេទ្យ ចាន់ភក្ដី មានប្រសាសន៍ចុងក្រោយថា អ្នកនៅតែអាចការពារជំងឺទឹកនោមផ្អែមបានទាន់ពេលវេលាដែរ គឺថា អ្នកត្រូវតែព្យាយាមហាត់ប្រាណជាប្រចាំថ្ងៃ (មួយសប្តាហ៍៤ថ្ងៃរយៈពេល៣០នាទី) របបអាហារអ្នកត្រូវតែព្យាយាមកាត់បន្ថយជាតិស្ករដោយជំនួសមកវិញនៅបន្លែ ផ្លែឈើ ត្រី កុំផឹកស្រា កុំជក់បារី គេងឱ្យបានគ្រប់ កុំស្រ្តេសច្រើន ជាពិសេសតាមដានពិនិត្យសុខភាព រកមើលជាតិស្ករឱ្យបានទៀងទាត់ ដើម្បីដឹងពីវិធីការពារទុកមុន​អាចជួយអ្នកពន្យារការកើតជំងឺទឹកនោមផ្អែមបានច្រើន”។ ពេលអ្នកបញ្ចូលទម្លាប់ល្អដោយហូបអាហារល្អ គេងបានគ្រប់គ្រាន់ និងហាត់ប្រាណទៀតពេលនោះ សុខភាពរបស់អ្នកកម្រកើតជំងឺណាស់ហើយមានអាយុវែងទៀតផង៕ អត្ថបទដោយ៖ ទ្រ សុភាព

វេជ្ជបណ្ឌិត មិញ ចាន់ភក្ដី នេះជាតេលេក្រាមរបស់គាត់ផ្ទាល់៖ 012 400 554​ តាមFacebooksលោកគ្រូពេទ្យ៖ Pheakdey Chan