ទល់លាមកគឺជារឿងមួយដែលមនុស្សគ្រប់រូបតែងជួបប្រទះមិនអត់នោះទេ។ តែការទល់លាមករុំារ៉ៃអាចបង្កជាបញ្ហាបាន ប្រសិនណាទុកយូរអាចបង្កជាការប្រេះរន្ធគូទព្រោះពេលបន្ទោរបង់ម្ដងៗលាមកដែលរឹងអាចកកិតនឹងរន្ធគូទនឹងអាចប្រឈមប្រេះរន្ធគូទឡើងមកបាន ហើយរោគសញ្ញាទល់លាមកញឹកញាប់នេះក៏អាចប្រឈមជាមួយនឹងជំងឺឬសដូងបាតដូចគ្នា។
អាស្រ័យហេតុនេះហើយដើម្បីជៀសវាងការទល់លាមក ឬក៏ចៀសវាងពីជំងឺឬសដូងបាន ប្រភព បានធ្វើការណែនាំរបបអាហារ១ក្រុមដែលអាចជួយបំបាត់ និងកាត់បន្ថយបញ្ហានេះបានច្រើនបំផុតឱ្យតែញុំាបានទៀតទាត់ និងគ្រប់គ្រាន់។
ខាងក្រោមនេះគឺជារបបអាហារដែលអាចជួយការពារកុំឱ្យទល់លាមកមិនឈប់នេះបើយោងតាមរយៈគេហទំព័រ pharmeasy។
-សណ្ដែកសៀង៖ យោងតាមរយៈប្រភព Academy of Nutrition and Dietetics គេបានបញ្ជាក់ឱ្យដឹងថាបុរសស្រ្តីដែលអាចទទួលទានជាតិសរសៃប្រចាំថ្ងៃបានប្រមាណ៣៨ក្រាមឬ២៥ក្រាមក្នុង១ថ្ងៃទំនងជាមានសុខភាពល្អ មិនមានបញ្ហាទល់លាមក ឬក៏លាមកវាវខ្លាំងនោះទេ។ រួមទាំងធ្វើឱ្យសុខភាពរបស់ប្រព័ន្ធរំលាយអាហាររបស់អ្នកផងដែរ។ ដូច្នេះប្រសិនណាអ្នកកំពុងតែមានបញ្ហាទល់លាមក សូមពិសារអាហារសម្បូរជាតិសរសៃឱ្យបានគ្រប់គ្រាន់។
-ផ្លែឈើនិងបន្លែស្រស់៖ ពពួកក្រុមបន្លែឈើស្រស់ៗគឺមានប្រយោជន៍ខ្លាំងមែនទែនសម្រាប់ជួយទប់ស្កាត់និងកាត់បន្ថយការទល់លាមក។ មានដូចជាខាត់ណាខៀវ ផ្លែចេក ផ្លែដូង ផ្លែប៉ោម ផ្លែឪឡឹកជាដើម គឺអាចជួយសុខភាពក្រពះពោះវៀនបានច្រើន។ ដូច្នេះរបបអាហារ មានបន្លែផ្លែឈើគឺមានប្រយោជន៍ខ្លាំងណាស់ សម្រាប់សុខភាពទូទៅផងដែរក្រៅពីក្រពះពោះវៀន។
-អាហារសម្បូរប្រូបាយអូទិក៖ ប្រសិនណាអ្នកកំពុងតែមានបញ្ហាក្រពះពោះវៀនមិនល្អ រួមទាំងកំពុងមានបញ្ហាទល់លាមករុំារ៉ៃមិនបាត់។ កុំទុកយូរគួរតែឧស្សាហ៍ញុំារបបអាហារដែលសម្បូរដោយប្រូបាយអូទិក ព្រោះអាហារទាំងនោះ មានប្រយោជន៍ជាច្រើនជួយដល់មុខងារបស់ក្រពះពោះវៀនឱ្យដំណើរការល្អ រួមទាំងមានសុខភាពល្អផងដែរ។
ជាចុងក្រោយ ប្រសិនណាអ្នកចង់កាត់បន្ថយអាការទល់លាមកគួរតែឧស្សាហ៍ញុំាអាហារមានជាតិសរសៃឱ្យបានច្រើនជាពិសេសទម្លាប់ផឹកទឹកឱ្យបានគ្រប់គ្រាន់ជាប្រចាំថ្ងៃព្រោះអាចជួយកាតបន្ថយការអាការនៃការទល់លាមកបានច្រើនណាស់ និងអាចជួយដល់សុខភាពផ្នែកផ្សេងៗទៀត៕
អត្ថបទដោយ៖ ធីតា