ជំងឺទឹកនោមផ្អែមជាប្រភេទជំងឺមួយដែលអាចកើតទៅលើមនុស្សគ្រប់វ័យទាំងអស់មិនថា វ័យចាស់ វ័យកណ្តាល ឬកុមារនោះទេ។ កន្លងមកជឿថាបងប្អូនភាគច្រើនធ្លាប់តែឃើញមនុស្សវ័យកណ្តាលឬវ័យចំណាស់ដែលមានអាយុចាប់ពី៤០ឆ្នាំឡើងកើតទឹកនោមផ្អែម ទើបមានការយល់ច្រលំថាជំងឺទឹកនោមផ្អែមកើតតែលើមនុស្សចាស់ប៉ុណ្ណោះ។ ប៉ុន្តែតាមពិត កុមារក៏ជាវ័យមួយដែលប្រឈមមុខខ្លាំង ជាមួយជំងឺទឹកនោមផ្អែមប្រសិនជាឪពុកម្តាយមិនបានយកចិត្តទុកដាក់ទៅលើសុខភាព និងការហូបចុករបស់កូន។
ជាការពិតណាស់ បើតាមការណែនាំពីគេហទំព័រ indiatimes បានបញ្ជាក់ឱ្យដឹងថា កុមារប្រមាណជា ៩៧០០០នាក់ក្នុងប្រទេសឥណ្ឌាបានកើតជំងឺទឹកនោមផ្អែមប្រភេទទី១ ហើយក្រុមអ្នកស្រាវជ្រាវបានរកឃើញថា ជារៀងរាល់ឆ្នាំ ចំនួនកុមារដែលកើតជំងឺទឹកនោមផ្អែមប្រភេទទី១នេះបានកើនឡើង ៣% ទៅ៥% រៀងរាល់ឆ្នាំ។
បន្ថែមពីលើនេះទៀត យោងតាមប្រសាសន៍របស់ លោកវេជ្ជបណ្ឌិត V Sri Nagesh អ្នកជំនាញផ្នែក endocrinologist មនុស្សពេញវ័យ និងកុមារ និងជាគ្រូពេទ្យជំងឺទឹកនោមផ្អែមម្នាក់ បានឱ្យដឹងថា ជំងឺទឹកនោមផ្អែមប្រភេទទី១ ជាជំងឺពាក់ព័ន្ធជាមួយប្រព័ន្ធការពារដោយស្វ័យប្រវត្តិ មានន័យថា កុមារដែលមានប្រព័ន្ធការពាររាងកាយចុះខ្សោយ គឺធ្វើឱ្យកោសិកាផលិតអាំងស៊ុយលីនរបស់កុមារឈប់ធ្វើការ បណ្តាលឱ្យកុមារឈានដល់ដំណាក់កាលកើតជំងឺទឹកនោមផ្អែមដំណាក់កាលទី១ទាំងវ័យនៅក្មេង។
មូលហេតុដែលនាំឱ្យប្រព័ន្ធការពាររាងកាយរបស់កុមារចុះខ្សោយគឺអាចបណ្តាលមកពីកត្តាច្រើនដូចជា៖ កត្តាហ្សែនតំណពូជពីឪពុកម្តាយ កត្តាចំណីអាហារគ្មានជីវជាតិគ្រប់គ្រាន់ គេងមិនគ្រប់គ្រាន់ ឈឺញឹកញាប់...ជាដើម។
ទន្ទឹមនឹងនេះដែរ ឪពុកម្តាយដែលមានកូនៗ ជាពិសេសកុមារក្រោមអាយុ២ឆ្នាំ ឬលើសនេះគួរតែយកចិត្តទុកដាក់ថែទាំសុខភាពកូន ហើយចៀសវាងដាច់ខាតកុំឱ្យកូនបរិភោគអាហារដែលមានហានិភ័យខ្ពស់វិវត្តទៅជាជំងឺទឹកនោមផ្អែម។ ដែលក្រុមអាហារទាំងនោះមានដូចខាងក្រោម៖
- ទឹកសូដា និងភេសជ្ជៈផ្អែមផ្សេង
- ឈីស នំខូគី និងអាហារសម្រន់មិនល្អផ្សេងទៀតដែលលើសជាតិខ្លាញ់ លើសជាតិផ្អែម
- នំប៉័ងពណ៌ស អង្ករប៉ាស្តា
- អាហារបំពង និងកែច្នៃផ្សេងៗ
- សាច់ក្រហមមានជាតិខ្លាញ់៖ ដូចជាសាច់គោ សាច់ក្របី សាច់ចៀម សាច់ជ្រូក...កុំឱ្យកូនញ៉ាំញឹកពេក
- ផលិតផលទឹកដោះគោមានជាតិខ្លាញ់ គួរចៀសវាង។
គូសបញ្ជាក់ផងដែរថា ជំងឺទឹកនោមផ្អែមជាជំងឺដែលពិបាកក្នុងការព្យាបាលបំផុត មិនថាប្រភេទទី១ឬទី២នោះទេ។ ដូច្នេះហើយឪពុកម្តាយនិងអាណាព្យាបាលគ្រប់រូបត្រូវយកចិត្តទុកដាក់ឱ្យមែនទែនក្នុងការថែទាំសុខភាពកូន ផ្តល់អាហារល្អៗសម្រាប់កូន និងទម្លាប់ឱ្យកូនរស់នៅស្អាត មានអនាម័យផងដែរ។
អត្ថបទដោយ៖ មឿន គន្ធា