ជំងឺទឹកនោមផ្អែម នាពេលបច្ចុប្បន្ននេះ​កើនឡើងនៅទូទាំងពិភពលោក ដូច្នេះ ហើយគ្រូពេទ្យរួមទាំងអ្នកជំនាញជាច្រើន បាន ខំប្រឹងផ្សព្វផ្សាយពីវិធីការពារ និងទប់ស្កាត់ជំងឺទឹកនោមផ្អែម កុំឱ្យកើនឡើងច្រើន ។ អាស្រ័យហេតុនេះហើយ ដើម្បីការពារទប់ស្កាត់ជំងឺទឹកនោមផ្អែម បាន ទាល់តែបងប្អូន ដឹងពីមូលហេតុបង្កជាជំងឺនេះឡើង កាលណាដឹងហើយ បងប្អូន ប្រាកដជាដឹងពីវិធីចៀសសវាងបានមិនខានឡើយ។

ខាងក្រោមនេះគឺជាក្បួនការពារ និងវិធីញុំាអាហារប្រភេទអាហារដែលជួយទប់ស្កាត់ជំងឺទឹកនោមផ្អែមរបស់វេជ្ជបណ្ឌិត។

ជាការពិតណាស់បើយោងតាម លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យ ក្រសួងសុខាភិបាល និងជាប្រធានគណកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) ថ្ងៃទី១៤ ខែវិច្ឆិកា ឆ្នាំ២០២២ បានធ្វើការចែករំលែកពីការអនុវត្តទម្លាប់ក្នុងការរស់នៅប្រចាំថ្ងៃ ដែលយើងទាំងអស់គ្នាត្រូវប្រកាន់យកដើម្បីបង្ការជំងឺទឹកនោមផ្អែម ដែលមានដូចជា៖ កុំពិសារប្រៃពេក កុំពិសារផ្អែមពេក កុំពិសារខ្លាញ់ពេក និងធ្វើលំហាត់ប្រាណ ជាប្រចាំ គឺជាមធ្យោបាយដ៏ល្អសម្រាប់ការចូលរួមការពារជំងឺទឹកនោមផ្អែម ជំងឺលើសសម្ពាធឈាម និងជំងឺមិនឆ្លងផ្សេងៗទៀត ជាដើម។ ការត្រួតពិនិត្យជាតិស្ករក្នុងឈាម ជាជំនួយក្នុងការរុករកបានទាន់ពេលនូវហានិភ័យនៃការកើតឡើងជំងឺទឹកនោមផ្អែម ដែលអាចឈានទៅរកការព្យាបាលបានទាន់ពេលផងដែរ។

មួយវិញទៀតតាមរយៈកិច្ចសម្ភាសន៍របស់ក្រុមការងារចាបបៃតង ជាមួយវេជ្ជបណ្ឌិតព្យាបាលជំងឺទឹកនោមផ្អែម មិញ ចាន់ភក្ដី ឯកទេសជំងឺ ទឹកនោមផ្អែម និងជំងឺទូទៅ លោកវេជ្ជបណ្ឌិតធ្វើការបកស្រាយពីជំងឺ ជំងឺទឹកនោមផ្អែមដោយបញ្ជាក់ថាប្រឈម កើតមិនគិតអាយុឡើយ ឱ្យតែ មិនហាត់ប្រាណ លេបថ្នាំផ្ដេសផ្ដាស ញុំាអាហារគ្មានជីវជាតិ ស្រ្តេសច្រើន ជាពិសេសមានគ្រួសារមានប្រវិត្តកើតជំងឺទឹកនោមផ្អែមនេះ គឺអាចប្រឈមខ្លាំង។

តួយ៉ាងបើយោងតាម ឯកឧត្តមវេជ្ជបណ្ឌិត ប៊ុន សុជាតិ ចំពោះវិធីការពារបានពន្យល់ថា ផ្លាស់ប្តូររបៀបជីវិត ក្នុងការរស់នៅជាឱសថដ៏ស័ក្តសិទ្ធបំផុត។

ទី១៖ ត្រូវបញ្ចុះទម្ងន់ចន្លោះពី ៥ទៅ៧ភាគរយនៃទម្ងន់បច្ចុប្បន្ន ហើយគ្រប់គ្រងទម្ងន់ ដែលបញ្ចុះបាននេះកុំឲ្យឡើងវិញ។

ទី២៖ ត្រូវឆ្លាតវ៉ៃក្នុងការទទួលទាន ដោយកាត់បន្ថយអាហារដែលសម្បូរជាតិស្ករខ្ពស់ ពពួកម្សៅ មានដូចជាបាយ ដំឡូង មី គុយទាវ នំបញ្ចុកជាដើម ស្ករ ទឹកឃ្មុំ ទឹកសេរ៉ូ ទឹកដោះគោខាប់ ទឹកអំពៅ ភេសជ្ជៈប៉ូវកម្លាំង គ្រឿងស្រវឹង ផ្លែឈើដូចជា ទុរេន សាវម៉ៅ មាន ខ្នុរ ដោយឡែកនំមានដូចជា នំប៉័ង នំធុង នំខេកជាដើម។ គួរបង្កើនការទទួលទានបន្លែ ត្រី សាច់ និងផ្លែឈើដែលមានជាតិស្ករទាប សម្បូរទៅដោយជាតិសរសៃខ្ពស់ ។

ទី៣៖ ត្រូវបង្កើនសកម្មភាពរាងកាយឱ្យបានច្រើន ហាត់ប្រាណចន្លោះ៣០ទៅ៤៥នាទីក្នុងមួយថ្ងៃ។

ទន្ទឹមនឹងនេះ អ្នកឧកញ៉ា វេជ្ជបណ្ឌិត គួច ម៉េងលី ក៏បានលើកថា មូលហេតុដែលធ្វើឱ្យមនុស្សពេលធំឡើងកើតជំងឺទឹកនោមផ្អែមប្រភេទទី២ ភាគច្រើនដោយសារការរស់នៅមិនសូវមានសកម្មភាព(មិនធ្វើលំហាត់ប្រាណ) និងការញ៉ាំអាហារមានជាតិខ្លាញ់ អាហារនិងភេសជ្ជៈផ្អែមៗច្រើន។ លោកវេជ្ជ បណ្ឌិត បានបន្ថែមទៀតថា អ្នកដែលចូលចិត្តញ៉ាំអាហារដែលចម្រាញ់អស់ៗ គ្មានជាតិសរសៃ អាហារសម្បូរកាបូហាយដ្រេតច្រើន ជាតិម្សៅច្រើន ដូចជាបាយអង្ករស នំបុ័ងធ្វើពីម្សៅដែលមិនមែនជាអង្ករសម្រូប ពពួកមី គុយទាវ បាញ់សុង ជាដើម។ ទទួលទានអាហារទាំងអស់នេះច្រើនពេក សុទ្ធតែអាចបង្កគ្រោះថ្នាក់ដល់សុខភាព។

អត្ថបទដោយ៖ ប៉ែត ធីតា