១. ចេះគ្រប់គ្រងអារម្មណ៍៖ កុមារជាច្រើនអាចពូកែក្នុងការសិក្សា ប៉ុន្តែឆាប់ខឹង ឆាប់ភ័យ និងងាយយំពេលជួបបញ្ហា។ អារម្មណ៍មិនមែនជាអ្វីដែលគួរឱ្យខ្លាច បើកុមារមិនស្គាល់ និងមិនអាចគ្រប់គ្រងវា នោះពួកគេនឹងក្លាយជាមនុស្សដែលត្រូវបាន អារម្មណ៍គ្រប់គ្រង។ ដូច្នេះឪពុកម្តាយគួរជួយកូនឱ្យចេះពីរបៀបគ្រប់គ្រងអារម្មណ៍របស់ពួកគេ ហើយឱ្យពួកគេដឹងថាវាជារឿងធម្មតាដែលមនុស្សគ្រប់រូបតែងតែមានអារម្មណ៍ សោកសៅ ភ័យខ្លាច និងរំភើប។ វិធីបង្រៀនងាយៗ ចាប់ផ្ដើមឱ្យពួកគេរៀនធ្វើសាមាធិ ដកដង្ហើមចេញចូលវែងៗ ឬឱ្យពួកគេចែករំលែកអារម្មណ៍ក្នុងចិត្តមកកាន់ ហើយអ្នកត្រូវជាធ្វើអ្នកស្ដាប់ដែលល្អបំផុត។ ជំនាញបែបនេះធ្វើឱ្យកុមាររីកចម្រើនឡើងជាមនុស្សមាន EQ ខ្ពស់ និងមានភាពរឹងមាំ។ 

២. ជំនាញទំនាក់ទំនង៖ កុមារច្រើនមានពិន្ទុល្អ តែខ្លាចក្នុងការនិយាយ មិនប្រាកដខ្លួនឯងពេលបញ្ចេញមតិ ឬមិនដឹងពីរបៀបធ្វើការងារជាក្រុម។ នេះធ្វើឱ្យពួកគេស្ទាក់ស្ទើរ និងបាត់បង់ឱកាសសំខាន់នៅសាលារៀន និងអនាគតការងាររបស់ពួកគេ។ឪពុកម្តាយគួរលើកទឹកចិត្តកូនឱ្យនិយាយ បញ្ចេញមតិ សួរសំណួរ និងប្រាប់អ្វីដែលពួកគេមិនចូលចិត្ត។ បង្កើតបរិកាសកក់ក្ដៅមួយនៅក្នុងគ្រួសារឱ្យកូនមានអារម្មណ៍ថាពួកគេសុវត្ថិភាពក្នុងការបញ្ចេញមតិរបស់ពួកគេ។ 

៣. ការគិតដោះស្រាយបញ្ហា៖ ជីវិតពោរពេញទៅដោយបញ្ហាដែលគ្មានចម្លើយឆ្លើយតែម្ដង។ ដូច្នេះកុមារត្រូវរៀនសង្កេត កំណត់បញ្ហា ព្យាយាមដំណោះស្រាយ និងទទួលស្គាល់កំហុស។ កុមារដែលរៀនចេះដោះស្រាយបញ្ហាតាំងពីតូច នឹងក្លាយជាមនុស្សហ៊ានប្រឈមមុខនឹងភាពលំបាក រឹងមាំ និងមិនងាយបោះបង់ ព្រោះពួកគេយល់ថាភាពបរាជ័យគ្រាន់តែជាផ្នែកនៃមេរៀនជីវិតប៉ុណ្ណោះ។ 

៤. ចេះគ្រប់គ្រងពេលវេលា និងមានវិន័យ៖ ប្រាជ្ញាអាចជួយកុមារចាប់ផ្តើមបានល្អ ប៉ុន្តែវិន័យហើយការរក្សាទម្លាប់ល្អគឺជាអ្វីដែលនាំឱ្យពួកគេចូលរួមប្រកួតប្រជែងជាអ្នកឈ្នះនៅពេលអនាគត។ ឪពុកម្តាយអាចបង្កើតទម្លាប់នេះតាមរយៈការ កំណត់ម៉ោងសិក្សា ម៉ោងលេង ពេលសម្រាក ឬសុំឱ្យកូនធ្វើរឿងមួយឱ្យចប់មុនពេលទៅធ្វើរឿងថ្មី។ បើកូនអ្នកយល់ពីតម្លៃនៃវិន័យ និងអាចគ្រប់គ្រងពេលវេលាបាន ដំណើរនាពេលអនាគតរបស់ពួកគេនឹងកាន់តែងាយស្រួល។

៥. សមត្ថភាពសម្របខ្លួន៖ កុមារដែលអាចសម្របខ្លួនបានល្អ នឹងងាយស្រួលប្រឈមមុខនឹងបរិយាកាសថ្មី ពូកែទប់ទល់ជាមួយការផ្លាស់ប្តូរ និងរៀនបានលឿនជាងមនុស្សទូទៅ។ ឪពុកម្តាយអាចជួយកូនរៀនសម្របខ្លួនដោយនាំពួកគេចេញស្វែងរកបទពិសោធន៍ថ្មីៗ ឱ្យពួកគេចូលរួមសកម្មភាពផ្សេងៗ ពេលពួកគេចេញក្រៅច្រើន ជួបមនុស្សច្រើនពួកគេនឹងអាចសម្របខ្លួនបានងាយជាមួយនឹងបរិកាសជុំវិញ ហើយពួកគេនឹងកាន់តែរឹងមាំ និងមានការយល់ដឹងកាន់តែទូលំទូលាយ៕

អត្ថបទដោយើង៖ សារួ