យោងតាមមជ្ឈមណ្ឌលគ្រប់គ្រង និងការពារជំងឺ (CDC) អាមេរិកមនុស្សជាង៣០លាននាក់ ត្រូវបានគេធ្វើរោគវិនិច្ឆ័យថាមានជំងឺទឹកនោមផ្អែមនៅក្នុងសហរដ្ឋអាមេរិក។ ខណៈមជ្ឈមណ្ឌលជំងឺបានអះអាងថា ជំងឺទឹកនោមផ្អែម អាចការពារបានយ៉ាងទូលំទូលាយដោយការផ្លាស់ប្តូររបៀបរស់នៅមួយចំនួនដូចជា៖រក្សាទម្ងន់ឱ្យស្ថិតក្រោមការគ្រប់គ្រង ធ្វើលំហាត់ប្រាណឲ្យបានទៀងទាត់ ទទួលទានរបបអាហារដែលមានសុខភាពល្អ។
តាមការស្រាវបង្ហាញថា របបអាហារដែលមានជាតិស្ករខ្ពស់អាចនាំឱ្យធាត់ រលាករ៉ាំរ៉ៃ និងកម្រិតទ្រីគ្លីសេរីតខ្ពស់។ ខណៈភាពធាត់គឺជាកត្តាហានិភ័យបំផុតសម្រាប់ជំងឺទឹកនោមផ្អែម ដែលប្រភេទអាហារមួយចំនួនអាចនាំឱ្យធាត់ ប្រសិនបើយើងទទួលទានជាប្រចាំក្នុងរយៈពេលយូរ។ នេះជាអាហារ១០មុខដែលគួរចៀសវាងពេលអ្នកកំពុងព្យាយាមសម្រកទម្ងន់ និងបន្ថយហានិភ័យនៃជំងឺទឹកនោមផ្អែមមានដូចជា៖ ដំឡូងបារាំងបំពង និងដំឡូងបំពង នំប៉័ង ស្ករគ្រាប់ ភេសជ្ជៈប៉ូវកម្លាំងគ្រឿងកំប៉ុង ទឹកផ្លែឈើ នំខេក ខូឃី ភេសជ្ជៈមានជាតិអាល់កុល ការ៉េម ភីហ្សា ភេសជ្ជៈកាហ្វេដែលមានកាឡូរីខ្ពស់ជាដើម។
ដោយឡែកមានអាហារ៤ប្រភេទ ដែលជួយរក្សាទម្ងន់មិនឲ្យធាត់សុខភាពល្អ ដែលការញ៉ាំអាហារដែលមានសុខភាពល្អអាចជួយការពារករណីភាគច្រើននៃជំងឺទឹកនោមផ្អែម។ ខាងក្រោមនេះគឺជារបបអាហារចំនួន៤ដែលអាចកាត់បន្ថយហានិភ័យជំងឺទឹកនោមផ្អែម៖
១. ញ៉ាំគ្រាប់ធញ្ញជាតិ៖ យើងត្រូវជ្រើសរើសគ្រាប់ធញ្ញជាតិ និងផលិតផលគ្រាប់ធញ្ញជាតិទាំងមូលដើម្បីបរិភោគដែលវាល្អជាងធញ្ញជាតិចម្រាញ់ និងកាបូអ៊ីដ្រាតកែច្នៃខ្ពស់ផ្សេងទៀត។
២. ផឹកទឹកឱ្យបានច្រើន៖ យើងគួរតែរំលងភេសជ្ជៈដែលមានជាតិស្ករ ហើយគួរតែងាកទៅរកទឹក កាហ្វេ ឬតែផឹកជំនួសវិញ។
៣. ជ្រើសរើសខ្លាញ់ដែលមានសុខភាពល្អ៖ ចៀសវាងខ្លាញ់អាក្រក់ដែលច្រើនតែមានក្នុងអាហាររហ័ស អាហារខ្ចប់ ចូលយើងបរិភោគ ផ្លែបឺរ សណ្តែកដី គ្រាប់ធញ្ញជាតិ និងត្រីជំនួសវិញដើម្បីទទួលបានខ្លាញ់ល្អ។
៤.កំណត់សាច់ក្រហម និងសាច់កែច្នៃ៖ ចូរយើងកំណត់ការបរិភោគសាច់ក្រហមមានដូចជា (សាច់គោ សាច់ចៀម សាច់ជ្រូក) ហើយគួរតែកាត់បន្ថយសាច់ក្រហមកែច្នៃមានដូចជា (bacon, hot dogs, deli meats) ជំនួសមកវិញនៅការបរិភោគសាច់មាន់ សាច់ត្រី ទឹកដោះគោមានជាតិខ្លាញ់ទាប។
ជារួមមកវិញការជ្រើសរើសអាហារដែលមានសុខភាពល្អមិនត្រឹមតែបន្ថយហានិភ័យនៃ ស្ថានភាពសុខភាពរ៉ាំរ៉ៃដូចជាជំងឺទឹកនោមផ្អែម ប៉ុណ្ណោះទេ ប៉ុន្តែវាក៏ជួយឲ្យសុខភាពយើងកាន់តែរឹងមាំល្អចៀសឆ្ងាយពីជំងឺផ្សេងៗទៀតបានយ៉ាងមានប្រសិទ្ធភាព ៕
អត្ថបទដោយ៖ ស្រីណុច