តើនរណាខ្លះមានបំណងចង់ពត់ធ្មេញ? ជាការពិតណាស់ការពត់ធ្មេញគឺមានសារសំខាន់ខ្លាំង សម្រាប់ជីវិតមនុស្ស ធ្មេញគឺជាសរីរាង្គមួយដែលមិនអាចខ្វះបានឡើយ។ ការថែទាំធ្មេញឱ្យមានសុខភាពល្អ រឹងមាំ ចៀសវាងជំងឺពុកធ្មេញ និងការបាត់បង់ធ្មេញ បានជួយលើកកម្ពស់សុខភាពមាត់ធ្មេញ រួមទាំងសុខភាពទូទៅ និងសុខភាពផ្លូវចិត្តផងដែរ។
តាមការចែករំលែករបស់ទន្តបណ្ឌិត លីម លីនណា ឯកទេសពត់ធ្មេញតាមរយៈកិច្ចសម្ភាសន៍ផ្ទាល់ បានចែករំលែកចំណេះដឹងខ្លះៗ ទៅកាន់ប្រជាពលរដ្ឋដែលមានបំណងចង់ពត់ធ្មេញឱ្យបានដឹង។ ទន្តបណ្ឌិត លីម លីនណាបាន បញ្ជាក់ថាការពត់ធ្មេញ គឺត្រូវធ្វើឡើងបានដោយសារបញ្ហាសំខាន់ៗ ដូចខាងក្រោម៖
-ទី១. ការពត់ធ្មេញត្រូវធ្វើឡើងក្នុងករណីជួយកែតម្រូវធ្មេញប្រជ្រួសគ្នា ធ្មេញពយលើក្រោយ ធ្មេញបិទមាត់មិនជិតចន្លោះ ឬក៏ជួយកែតម្រូវភាពលូតលាស់មិនប្រក្រតីនៃឆ្អឹងថ្គាម សម្រាប់ក្មេងដែលកំពុងលូតលាស់។
-ទី២. ការពត់ធ្មេញបានជួយឱ្យសុខភាពមាត់ធ្មេញកាន់តែប្រសើរ ដោយហេតុថាជួយកាត់បន្ថយ ភាពរញ៉េរញ៉ៃ នៃជួរធ្មេញ ចន្លោះធ្មេញ ឱ្យមានភាពរៀបរយប្រសើរឡើងវិញ។ ដើម្បីធ្វើឱ្យមានភាពងាយស្រួលក្នុងការដុសសម្អាតធ្មេញ ជួយការពារជំងឺរលាកអញ្ចាញធ្មេញ និងរោគពុកធ្មេញបាន ជាហេតុនាំឱ្យជួយកាត់បន្ថយការបាត់បង់ធ្មេញមុនអាយុកាលបាន។
-ទី៣. ការពត់ធ្មេញក៏បានជួយកែតម្រូវកំណាំធ្មេញមិនត្រឹមត្រូវមកល្អវិញ។ គឺជួយកាត់បន្ថយការឈឺឆ្អឹងសន្លាក់ថ្គាមនៅថ្ងៃក្រោយបាន។ តួយ៉ាងការពត់ធ្មេញក៏ជាការកែសម្ផស្សបែបធម្មជាតិមួយផងដែរ អាចផ្ដល់ឱ្យអ្នកនូវស្នាមញញឹមស្អាត ល្អប្រសើរជាងមុន។
-ទី៤.ការពត់ធ្មេញក៏ជាវិធី១ជួយកែតម្រូវ បន្ធូរបន្ថយ សម្ពាធសាច់ដុំមាត់ធ្មេញ អណ្ដាត ជាពិសេស គឺអាចជួយសម្រួលការគេងរបស់អ្នកផងដែរ។
ផ្សាភ្ជាប់ជាមួយគ្នានេះដែរ មូលហេតុត្រូវពត់ធ្មេញខាងលើនេះ ទន្តបណ្ឌិត លីម លីនណា បានរៀបរាប់ថា ការពត់ធ្មេញទៅរួចបានលុះត្រាតែ ដោះស្រាយបញ្ហាដែលមាននៅក្នុងមាត់ធ្មេញជាមុនសិន ដូចជា សម្អាតធ្មេញ ប៉ះធ្មេញ ព្យាបាលធ្មេញពុក និងរលាកអញ្ចាញ ឱ្យរួចរាល់មុនសិនទើបចាប់ផ្ដើមពត់ធ្មេញ។ ចំពោះរយៈពេលនៃការពត់ធ្មេញវិញ មិនដូចគ្នាឡើយ គឺអាស្រ័យលើប្រភេទធ្មេញមនុស្សម្នាក់ៗអាចមានរយៈពេល៦ខែឬក៏ឈានដល់៤ឆ្នាំក៏មានដែរ។
គូសបញ្ជាក់ឱ្យដឹងថា ទន្តបណ្ឌិតចង់ផ្ដាំផ្ញើទៅកាន់ប្រជាជនទាំងអស់ឱ្យបានដឹងថា សម្រាប់អ្នកនៅខេត្តឆ្ងាយៗមានបញ្ហាធ្មេញឈឺសូមទៅព្យាបាលជាមួយទន្តបណ្ឌិតមានជំនាញត្រឹមត្រូវ ហើយហាមដាច់ខាតកុំព្យាយាមប្រើទឹកអាស៊ីត ដាក់ក្នុងធ្មេញដើម្បីបំបាត់ការឈឺចាប់នៅពេលឈឺធ្មេញ ។ ពីព្រោះទឹកអាស៊ីតមានជាតិពុលឬក៏សារធាតុពុលអាចគ្រោះថ្នាក់ដល់អាយុជីវិតបានដែលអាចបង្កជាជំងឺ មហារីកឆ្អឹងថ្គាម ឬរលាកអញ្ចាញធ្មេញធ្ងន់ធ្ងរ កើតឡើង សូមព្យាយាមពិនិត្យធ្មេញឱ្យបានទៀងទាត់យ៉ាងហោចណាស់៦ខែឬក៏១ឆ្នាំម្ដង៕
អត្ថបទដោយ៖ ប៉ែត ធីតា
