ជារៀងរាល់យប់រាងកាយរបស់យើង បានគេងអស់ជាច្រើនម៉ោង​ ដោយបុគ្គលខ្លះ​៨ម៉ោង ​ចំណែកអ្នកខ្លះទៀត១០ក៏មាន ហើយក្រពះរបស់យើងក៏ត្រូវបានទុកចោលយូរគ្មានសូម្បីតែទឹក ដូច្នេះបើមិនញុំាអាហារចូលនៅពេលព្រឹកទៀត សុខភាពរាងកាយយើងនឹងងាយទ្រុឌទ្រោមមិនខាន។ មួយវិញទៀត ចំពោះរបបអាហារពេលព្រឹកដែលត្រូវញុំាជាប្រចាំនោះ តើអ្នកទាំងអស់គ្នាមានដឹងទេថា គួរជ្រើសយកអាហារប្រភេទណាមកញុំា ដើម្បីឱ្យបានផលដល់រាងកាយខ្ពស់​?

ជាមួយគ្នានេះដែរ ក្រុមការងារចាបបៃតង សូមលើកយកប្រភេទអាហារពេលព្រឹកដែលល្អបំផុតសម្រាប់សុខភាពនាពេលព្រឹកព្រលឹមដោយយោងតាមប្រភពចេញផ្សាយ Healthline ៖

១. កាហ្វេ៖ សម្រាប់បងប្អូនដែលចូលចិត្តញុំាកាហ្វេពិតជាត្រូវចិត្តហើយ កាហ្វេគឺជាភេសជ្ជៈមួយដែលពេញនិយមទូទាំងពិភពលោក ជាទូទៅប្រជាជនអាមេរិក៨៥% ញុំាកាហ្វេជាប្រចាំថ្ងៃ។ កាហ្វេសម្បូរដោយជាតិកាហ្វេអ៊ីន ប្រសិនណាបើយើងជ្រើសញុំានាពេលព្រឹក គឺអាចធ្វើឱ្យអារម្មណ៍ប្រសើរឡើង ទាំងសមត្ថភាពផ្លូវកាយ និងផ្លូវចិត្ត​​ ជួយបង្ការជំងឺបេះដូង ជំងឺធាត់ ជំងឺថ្លើម នឹងជំងឺមហារីកផ្សេងៗទៀត។

២. ស៊ុត៖​​ ញុំាស៊ុតពេលព្រឹក គឺល្អសម្រាប់សុខភាពខ្លាំងណាស់ ព្រោះស៊ុតសម្បូរទៅដោយ ប្រូតេអ៊ីនខ្ពស់។ មួយវិញទៀត ស៊ុតលឿងមានផ្ទុកដោយសារជាតិ lutein និង zeaxanthinដែលសារធាតុទាំងនេះជួយប្រឆាំងអុកស៊ីតកម្ម ជួយការពារជំងឺភ្នែក ដូចជាជំងឺភ្នែកឡើងបាយផងដែរ។ ទន្ទឹមនឹងនេះទៀតសោត ស៊ុតក៏ជាប្រភពដ៏ល្អបំផុតនៃសារធាតុ Choline ដែលជាសារធាតុចិញ្ចឹមដ៏សំខាន់សម្រាប់សុខភាពខួរក្បាល និងថ្លើម។

៣. ទឹកដោះគោជូរ៖ ទឹកដោះគោជូរ គឺសម្បូរទៅដោយសារធាតុចិញ្ចឹមមានប្រយោជន៍ជាច្រើន ដូចជា កាល់ស្យូម វីតាមីន B12 ស័ង្កសី ប៉ូតាស្យូម ផូស្វ័រ​ ប្រូបាយអូទិច។ ហេតុនេះ ការញុំាទឹកដោះគោជូរនាពេលព្រឹក នឹងជួយដល់ប្រព័ន្ធរំលាយអាហារដំណើរការបានយ៉ាងល្អពេញមួយថ្ងៃ។

៤. ផ្លែឈើ៖ ផ្លែក្រូច ស្វាយ​ ល្ហុង​ ផ្លែប៉ោម... ពិតជាមានអត្ថប្រយោជន៍សំខាន់ណាស់ វាសម្បូរដោយវីតាមីន សារធាតុរ៉ែល្អៗ ជាតិសរសៃខ្ពស់...។ ការញុំាផ្លែឈើជាប្រចាំ ជួយការពារជំងឺជាច្រើនដូចជា ហានិភ័យនៃជំងឺបេះដូង មហារីក អត្រានៃការធ្លាក់ទឹកចិត្ត សុខភាពផ្លូវចិត្តខ្សោយ ភាពចាស់ និងជួយឱ្យសុខភាពពោះវៀនកាន់តែប្រសើរ។​​ ដោយឡែក បើញុំាផ្លែឈើគួរជ្រើសច្រើនប្រភេទកុំញុំាតែ១មុខព្រោះផ្លែឈើមានពណ៌ខុសៗគ្នាជាហេតុធ្វើឱ្យអត្ថប្រយោជន៍ផ្សេងៗ តែបើញុំាច្រើនប្រភេទគុណប្រយោជន៍ក៍បានច្រើនផងដែរ។

ជាចុងក្រោយ តើអាហារទាំងអស់ខាងលើនេះ មួយណាដែលអ្នកទាំងអស់គ្នាមានទម្លាប់ញុំាជាប្រចាំ ​ឬក៏ញុំាអាហារផ្សេងពីនេះ។ ប៉ុន្តែប្រសិនណាបើបងប្អូនមិនដឹងថា គួរញុំាអ្វីល្អ សាកល្បងជ្រើសនូវក្រុមអាហារទាំងប៉ុន្មានមុខខាងលើនេះ ពីព្រោះថា វាពិតជាល្អពិសេសសម្រាប់រាងកាយពិតមែន៕

អត្ថបទដោយ៖​ប៉ែត ធីតា