អាហារពេលព្រឹក គឺអាហារមិនដែលគ្រប់គ្នាមិនគួរខ្វះឬមើលរំលង។ ឥទ្ធិពលមិនល្អនៃសុខភាព ដូចជាឈឺក្រពះពោះវៀន ឈឺក្បាល គ្មានកម្លាំងកំហែង ជាពិសេសខួរក្បាលមិនសូវដំណើរការបានល្អ ភ្លេចភ្លាំងច្រើន​​គិតអ្វីមួយមិនងាយចេញ សុទ្ធសឹងតែកើតឡើងនិងរួមចំណែកពីការមិនទទួលទានអាហារពេលព្រឹក។ ទន្ទឹមនឹងនេះ ទៀតសោធប្រសិនបើអ្នកជ្រើសរើសអាហារពេលព្រឹក មិនបានត្រឹមត្រូវវាក៏អាចបង្កជាបញ្ហាសុខភាពនៅថ្ងៃខាងមុខដល់អ្នកផងដែរ។

ផ្អែកតាមគេហទំព័រeatthis បានណែនាំថា ពេលព្រឹកជាពេលបើកទំព័រនៃថ្ងៃថ្មីរបស់អ្នកហេតុនេះគួរជ្រើសរើសប្រភេទអាហារដែលមានសារធាតុចិញ្ចឹមគ្រប់គ្រាន់ ដែលអាចធ្វើឱ្យអ្នកមានអារម្មណ៍ល្អពេញមួយថ្ងៃ ហើយមិនបង្កហានិភ័យជំងឺនៅថ្ងៃក្រោយ។ ប្រសិនបើអ្នកចង់បានសុខភាពល្អ សម្រកគីឡូ ឬរក្សាទម្ងន់របស់អ្នក អាហារ៤មុខខាងក្រោមនេះជាជម្រើសល្អបំផុត។

១ ទឹក៖ អ្នកមិនគួររំលងឡើយការទទួលទានទឹកនៅពេលព្រឹក។ អ្នកជំនាញចំណីអាហារនិងអាហាររូបត្ថម្ភ អ្នកស្រី Courtney D'Angelo, MS, RD បានឱ្យដឹងថា ការផឹកទឹក១កែវពេលព្រឹក ក្រោកពីគេង ជួយឱ្យមានជាតិទឹកក្នុងខ្លួន មានថាមពល រាងកាយដំណើរការបានល្អ។ ទឹកក៏អាចជួយកាត់ជាតិស្ករ និងកាឡូរី កាត់បន្ថយចំណង់នៃការញ៉ាំច្រើន និងជួយសម្រួលការរំលាយអាហារបានផងដែរ។ ហេតុនេះទឹកជាអាហារទី១ដែលល្អបំផុត មិនគួររំលងឡើងពេលក្រោកពីគេង។

២ អាហារប្រូតេអ៊ីន៖ អ្នកស្រី Courtney D'Angelo, MS, RD បានលើកឡើងថា ប្រូតេអ៊ីនមានសារៈសំខាន់សម្រាប់ការកសាងសាច់ដុំ និងកាត់បន្ថយជាតិខ្លាញ់ ហើយវាជាអាហារដែលស័ក្តិសមសម្រាប់អ្នកដែលព្យាយាមសម្រកទម្ងន់ ជាពិសេសសម្រកនៅជុំវិញចង្កេះ។ ការទទួលទានប្រូតេអ៊ីនឱ្យបានគ្រប់គ្រាន់ ជួយឱ្យអ្នកមានអារម្មណ៍ឆ្អែតបានយូរ អាចកាត់បន្ថយចំណង់ ក្នុងការទទួលទានអាហារផ្អែម ឬអាហារសម្រន់មិនល្អផ្សេងទៀត បន្ទាប់ពីអាហារពេលព្រឹកហើយ។ ក្រុមអាហារសម្បូរប្រូតេអ៊ីន មាន ស៊ុត ទឹកដោះគោ យ៉ាអ៊ួរ(បើអាចយ៉ាអ៊ួរប្រូបាយអូទិក) ឈីស(cottage cheese) ក្រុមសណ្ដែក ដូចជាសណ្ដែកខ្មៅ និងអាចជ្រើសរើសប្រភេទអាហារ oatmeal ឬបន្ថែមប្រភេទម្សៅប្រតូអ៊ីន១ស្លាបព្រា បានប្រសិនបើមាន។

៣ អាហារជាតិស្ករទាប៖ ចង់បានចង់សុខភាពល្អរាងស្អាត ត្រូវកាត់បន្ថយជាតិស្ករឱ្យបានច្រើនតាមដែលអាចធ្វើទៅបាន។ អាហារសម្បូរជាតិស្ករ និងការឡូរី ច្រើនមាននៅពពួកជាតិម្សៅ ដូចជាបាយ គុយទាវ មី មីសួរ និងពពួកអាហារមួយចំនួនធំទៀតដែលផ្សំពីម្សៅ។ ទទួលទានអាហារទាំងនេះច្រើន ព្រមទាំងបន្ថែមជាតិផ្អែមពីលើទៀតនោះ មិនត្រឹមតែធ្វើឱ្យឡើងគីឡូទេ តែអាចធ្វើឱ្យអ្នកងាយនឹងកើតជំងឺទឹកនោមផ្អែមប្រភេទទី២ផងដែរ។ អ្នកអាចជ្រើសប្រភេទមានជាតិស្ករទាប ដូចជាគ្រាប់ធញ្ញជាតិជាមួយទឹកដោះគោ ក្រុមផ្លែប័ររី និងផ្លែប័រជាដើម។

៤ អាហារធ្វើពីធញ្ញជាតិ៖ គ្រាប់ធញ្ញជាតិអាចកាត់បន្ថយកាឡូរីបាន ហេតុនេះបើអ្នកមានទម្លាប់ញ៉ាំនំបុ័ងស ឬនំផ្អែមៗនៅពេលព្រឹក គួរតែប្តូរមកទទួលទាននំបុ័ងស្រូវសាលីវិញល្អជាង។ ក្រៅពីនោះអ្នកអាចស្វែងរកប្រភេទអាហារពេលព្រឹកដែលផ្សំពីគ្រាប់ធញ្ញជាតិមានលក់នៅតាមទីផ្សារនានាបាន ដើម្បីងាយស្រួលរកញ៉ាំពេលព្រឹកគ្រាន់តែលាយជាមួយទឹក ឬទឹកដោះគោ អាចញ៉ាំបានភ្លាមៗ។

ជាសរុបរួមមកវិញ ប្រសិនបើអ្នកចង់បានសុខភាពល្អ រាងស្អាត ចង្កេះតូច គួរទទួលទានទឹកឱ្យបានច្រើន(កុំលើសពី៤ឬ៥លីត្រក្នុង១ថ្ងៃ) ពិសេសទឹក១កែវពេលក្រោកពីគេង ញ៉ាំអាហារសម្បូរប្រូតេអ៊ីន កាត់បន្ថយជាតិស្ករ និងទទួលទានប្រភេទគ្រាប់ធញ្ញជាតិឱ្យបានច្រើន៕

អត្ថបទដោយ៖ Senghong