ខួរក្បាលជាសរីរាង្គរាងសំខាន់មួយ ដែលវាទ្រទ្រង់សរសៃប្រសាទលើរាងកាយទាំងមូល។ កាលណាដែលខួរក្បាលមានបញ្ហា ខ្សោយមានការភ្លេចភ្លាំងច្រើន មានការប៉ះទង្គិចនានាលើខួរក្បាល ឬមានជំងឺ វាមិនមែនជារឿងតូចតាចដែលអាចមិនអើពើរបាននោះទេ។ មានទម្លាប់ជាច្រើនដែលមនុស្សគ្រប់គ្នានិយមធ្វើ ទាំងមិនបានចាប់អារម្មណ៍ថាវាប៉ះទង្គិចសុខភាពខួរក្បាលរបស់ខ្លួនឯងឱ្យខ្សោយចុះយ៉ាងណាឡើយ។

វេជ្ជបណ្ឌិត Than Thi Minh Trung អនុប្រធាននាយកដ្ឋានសរសៃប្រសាទ មជ្ឈមណ្ឌលសរសៃប្រសាទ មន្ទីរពេទ្យ Tam Anh នៅទីក្រុងហូជីមិញ បានឱ្យដឹងថា ការដែលទទួលទានអាហារ និងមានសកម្មភាពរាងកាយល្អ នឹងជួយបំប៉នខួរក្បាលជំនួយការចងចាំ។ ជាមួយគ្នានោះ ទម្លាប់មិនល្អមួយចំនួន ក៏បំផ្លាញសុខភាពខួរក្បាលរបស់អ្នកយ៉ាងឆាប់រហ័សផងដែរ។ ទម្លាប់មិនល្អគួរកែចេញទាំងនោះរួមមាន៖

១ អង្គុយច្រើន៖ ការអង្គុយយូរពេកអាចរារាំងដល់សកម្មភាពនៃប្រព័ន្ធសរសៃប្រសាទ sympathetic ដែលត្រូវបានផ្សារភ្ជាប់ជាមួយនឹងការកើនឡើងនៃភាពអស់កម្លាំង។ ទម្លាប់អង្គុយយូរៗនេះ មានមនុស្សជាច្រើនណាស់ដែលកំពុងធ្វើជាប្រចាំ គួរណាតែក្រោកដើរ ធ្វើសកម្មភាពរៀងកាយឱ្យបានច្រើន រៀងរាល់២០ ទៅ៣០នាទីម្ដង ដើម្បីជម្រុញសរសៃឈាមទៅខួរក្បាល ពង្រឹងនិងជម្រុញប្រព័ន្ធប្រសាទកណ្ដាល។

២ ញ៉ាំអាហាររហ័សនិងផឹកភេសជ្ជៈផ្អែមលើស៖ ការផឹកភេសជ្ជៈផ្អែមជាប្រចាំថ្ងៃនឹងធ្វើឱ្យបរិមាណខួរក្បាលតូច ការចងចាំខ្សោយចុះ កើនហានិភ័យនៃជំងឺភ្លេចភ្លាំង។ ការញ៉ាំអាហារលឿនៗ ដែលសម្បូរដោយជាតិស្ករ ជាតិខ្លាញ់ច្រើន ក៏បានបំផ្លាញសុខភាពបេះដូង និងខួរក្បាលផងដែរ។

៣ នៅម្នាក់ឯង មិនសូវចូលសង្គមខាងក្រៅ៖ ការដែលផ្តេចទំនាក់ទំនងពីខាងក្រៅ ផ្សារភ្ជាប់គ្នាជាមួយនឹងការខ្សោយចុះនៃការយល់ដឹង។ ហេតុនេះអ្នកជំនាញណែនាំឱ្យជួបមនុស្សថ្មីៗ មានទំនាក់ទំនងជាមួយមនុស្សជុំវិញខ្លួនឱ្យបានច្រើន ដើម្បីរក្សាភាពវិជ្ជមានក្នុងខ្លួន និងកាត់បន្ថយហានិភ័យនៃជំងឺភ្លេចភ្លាំងបានផងដែរ។

៤ មិនតាមដានសម្ពាធឈាម៖ សម្ពាធឈាមឡើងខ្ពស់ ឬចុះទាបសុទ្ធតែជះឥទ្ធិពល មុខងារយល់ដឹងនៃខួរក្បាល។ សម្ពាធ​ឈាម​ខុស​ប្រក្រតី​អាច​បណ្តាល​ឱ្យ​ឈាម​មិន​គ្រប់គ្រាន់​ទៅ​ដល់​ខួរក្បាល រឹង និង​រួម​តូច​នៃ​សរសៃឈាម ។ ដូច្នេះ ការរក្សាសម្ពាធឈាមឱ្យនៅកម្រិតថេរ (ជាធម្មតា 120/80 mmHg ឬទាបជាងបន្តិច) ជួយឱ្យឈាមគ្រប់គ្រងស្ថិរភាព ខួរក្បាលត្រូវបានផ្គត់ផ្គង់ដោយអុកស៊ីសែន និងឈាមគ្រប់គ្រាន់ដើម្បីដំណើរការ។

៥ គេងមិនគ្រប់៖ គេងតិចជាង៦ម៉ោងក្នុង១យប់ ជាញឹកញាប់ជាប់គ្នា នឹងធ្វើឱ្យខួរក្បាលថយចុះការយល់ដឹងលឿន នឹងប្រឈមជាមួយជំងឺវង្វេង។ ហេតុនេះអ្នកគួរតែគេងឱ្យបានគ្រប់ម៉ោងដើម្បី សុខភាពខួរក្បាលល្អ។

៦ ស្ត្រេសពេក៖ ស្ត្រេសអាចរួមចំណែកដល់ការភ្លេចភ្លាំង ធ្លាក់ទឹកចិត្ត ថប់បារម្ភ និងពិបាកក្នុងការផ្តោតអារម្មណ៍។ ការងារហួសកម្លាំង និងភាពតានតឹងអាចបណ្តាលឱ្យមានអ័ព្ទខួរក្បាល។ ប្រសិនបើ​មិន​បាន​ព្យាបាល​ទេ អ័ព្ទ​នៃ​ខួរក្បាល​អាច​ប៉ះពាល់​ដល់​គុណភាព​ជីវិត និង​នាំ​ឱ្យ​មាន​លក្ខខណ្ឌ​ផ្សេង​ទៀត​ដូចជា​ជំងឺ​ផាកឃីន​សុន ជំងឺ​វង្វេង និង​ជំងឺ​ភ្លេចភ្លាំង​។

៧ អសកម្ម ៖ ភាពអសកម្មរាងកាយអាចបង្កើនល្បឿននៃការថយចុះការយល់ដឹង និងធ្វើឱ្យអាយុខួរក្បាលកាន់តែលឿន។ សកម្មភាពរាងកាយមានប្រយោជន៍សម្រាប់ hippocampus (ផ្នែកនៃខួរក្បាលដែលដើរតួក្នុងការរក្សាការចងចាំ) ។ យុវជន​ត្រូវ​ឧស្សាហ៍​ហាត់ប្រាណ​យ៉ាង​ហោច​ណាស់​៣០​នាទី​ក្នុង​មួយថ្ងៃ ដើម្បី​រក្សា​ចិត្ត និង​រាង​កាយ​ឱ្យ​នៅ​ក្មេង​បានយូរ ជួយ​ឱ្យ​ខួរក្បាល​បង្កើន​ការចងចាំ។

ជារួមមកទម្លាប់ទាំងអស់នេះ អាចមានមនុស្សជាច្រើនកំពុងតែអនុវត្តជាប្រចាំ ដែលវាបានជះឥទ្ធិពលមិនល្អដល់ខួរក្បាលគ្រប់ពេលវេលា។ បើចង់ឱ្យខួរក្បាលមានសុខភាព គិតរហ័សរហួន ចងចាំបានល្អ គួរតែឈប់ធ្វើទម្លាប់មិនល្អខាងលើនេះទៀតទៅ៕

អត្ថបទដោយ៖ Senghong