ការសិក្សាបានឱ្យដឹងថា គ្រាប់ធញ្ញជាតិ គឺជាអាហារក្នុងក្រុមដែលរាងកាយមនុស្សត្រូវការជាប្រចាំ ដោយសារតែសារធាតុល្អៗមាននៅក្នុងគ្រាប់ធញ្ញជាតិនីមួយៗអាចផ្តល់អត្ថប្រយោជន៍ឱ្យរាងកាយយ៉ាងច្រើនមហាសាល។ ជាក់ស្តែង គ្រាប់អាល់ម៉ុន ក៏ត្រូវបានការសិក្សាជាច្រើនលើកឡើងឱ្យញ៉ាំជាប្រចាំ ខណៈវាមានរសជាតិឆ្ញាញ់ អត្ថប្រយោជន៍វិញក៏មានច្រើនជាអនេក។ ខាងក្រោមនេះគឺជាអត្ថប្រយោជន៍ដែលគេហទំព័រសុខភាពអន្តរជាតិHealthline បានចុះផ្សាយឱ្យដឹងអំពីគ្រាប់ធញ្ញជាតិ អាល់ម៉ុន។
ការទទួលទានគ្រាប់អាល់ម៉ុនជាប្រចាំ ត្រូវបានផ្សារភ្ជាប់ជាមួយនឹងការថយចុះហានិភ័យនៃជំងឺរ៉ាំរ៉ៃមួយចំនួនដូចជា ជំងឺទឹកនោមផ្អែមប្រភេទទី២និងងជំងឺបេះដូង។ នៅក្នុងគ្រាប់អាល់ម៉ុនត្រូវបានគេរកឃើញថា វាមានខ្លាញ់monounsaturated ដែលមានសុខភាពល្អ ជាតិសរសៃ និងសារធាតុប្រឆាំងអុកស៊ីតកម្មផ្សេងៗ។ សារធាតុប្រឆាំងអុកស៊ីតកម្មទាំងនោះ អាចការពារកោសិការបស់អ្នកពីការរលាកដែលបង្កគ្រោះថ្នាក់ដែលអាចនាំឱ្យមានជំងឺរ៉ាំរ៉ៃទាំងនេះ។
លើសពីនេះទៅទៀត អាល់ម៉ុនក៏អាចជួយបង្កើនគុណភាពនៃការគេងក្នុងពេលយប់របស់អ្នកផងដែរ។ គ្រាប់អាល់ម៉ុន ក៏ដូចជាគ្រាប់ធញ្ញជាតិផ្សេងៗទៀតជាប្រភពនៃអ័រម៉ូនមេឡាតូនីន។ មេឡាតូនីននេះនឹងចូលទៅធ្វើនិយ័តកម្មនាឡិកាខាងក្នុងរាងកាយរបស់អ្នក និងផ្តល់សញ្ញាឱ្យរាងកាយថាដល់ពេលវេលាត្រូវទទួលយកការគេងដែលមានគុណភាព គេងស្ងប់ និងស្កប់ស្កល់ល្អផងដែរ។
គ្រាប់អាល់ម៉ុន ក៏ជាប្រភពនៃម៉ាញេស្យូមដ៏ល្អ, គ្រាន់តែញ៉ាំអាល់ម៉ុន១អោនជាប្រចាំអ្នកនឹងទទួលបាន ម៉ាញេស្យូមប្រមាណ១៩% នៃតម្រូវការប្រចាំថ្ងៃ។ ខណៈការទទួលទានបរិមាណម៉ាញេស្យូមគ្រប់គ្រាន់អាចជួយបង្កើនគុណភាពនៃការគេង ជាពិសេសសម្រាប់អ្នកដែលមានបញ្ហាការគេងមិនលក់ គេងមិនស្ងប់ជាដើម។ លើសពីនេះទៀត វាអាចជួយកាត់បន្ថយកម្រិតអរម៉ូនស្ត្រេស cortisol ដែលត្រូវបានគេស្គាល់ថាជាអ័រម៉ូនស្រេ្តសម្យ៉ាងដែលចូលទៅរំខានដំណេកពេលយប់។
ការសិក្សាមួយដែលគេធ្វើដើម្បីទទួលបានលទ្ធផលដូចខាងលើនោះគឺ គេបានផ្តល់ អាហារដែលមានសារធាតុចម្រាញ់ពីអាល់ម៉ុនទៅដល់កណ្តុរ ៤០០មីលីក្រាមជារៀងរាល់ថ្ងៃ។ គេរកឃើញថា សត្វកណ្ដុរគេងបានយូរ និងស្កប់ជាង កណ្តុរដែលមិនបានប្រើប្រាស់សារធាតុចម្រាញ់ពីអាល់ម៉ុន។
ដូចនេះ បើអ្នកមានបញ្ហាគេងមិនលក់ អាចសាកញ៉ាំអាល់ម៉ុនជាប្រចាំបាន បងប្អូនអាចជ្រើសរើសញ៉ាំជាគ្រាប់ក៏បាន ឬជាទឹកដោះគោអាល់ម៉ុនក៏បាន។ ប្រសិនបើបងប្អូនចង់ញ៉ាំគ្រាប់អាល់ម៉ុនមុនពេលចូលគេង ដើម្បីកំណត់ថាតើវាប៉ះពាល់ដល់គុណភាពនៃការគេង បងប្អូនអាចទទួលទាន ១អោនស្មើនឹង២៨ក្រាម ឬប្រហែលមួយក្តាប់ដៃ៕
អត្ថបទដោយ៖ កញ្ញា លីហួយ