ជាការពិតណាស់ ប្រសិនណាជាប្រចាំថ្ងៃរបស់អ្នក ពោរពេញដោយ របបអាហារសម្បូរសារធាតុចិញ្ចឹមគឺអាចជួយឱ្យសក់ របស់អ្នក ដុះលូតលាស់បានល្អមិនងាយជ្រុះមក ។ ចំពោះរបបអាហារដែលសក់ត្រូវការគឺមានដូចជា១អាហារសម្បូរប្រូតេអ៊ីន អាស៊ីតខ្លាញ់អូមេហ្គា ៣ ជាតិដែក វីតាមីនរលាយជាតិខ្លាញ់ និងវីតាមីន B-complex ព្រោះសារធាតុទាំងប៉ុន្មាននេះបើ អ្នកខ្វះនោះចង់ឬមិនចង់ ប្រាកដជាជួបបញ្ហាជ្រុះសក់ទាំងមិនដឹងខ្លួនជាក់ជាមិនខាន។
នេះបើយោងតាមរយៈគេហទំព័រ verywellhealth.com គេបានណែនាំរបបអាហារកំពូលៗមួយចំនួនដែលសក់របស់អ្នកត្រូវការខ្លាំងមិនអាចខ្វះបាន ព្រោះថាបើខ្វះសក់នឹងចាប់ផ្ដើមជ្រុះ។
-ត្រីខ្លាញ់ ៖ ត្រីដែលមានជាតិខ្លាញ់រួមមាន ត្រី salmon, herring និង mackerel ។ពពួក ត្រីទាំងនេះគឺមានសារធាតុចិញ្ចឹមច្រើនណាស់ សុទ្ធសឹងញុំាទៅអាចជួយសក់របស់អ្នកដុះល្អ មានដូចជាអាស៊ីតខ្លាញ់អូមេហ្គា 3 ប្រូតេអ៊ីន សេលេញ៉ូម វីតាមីន D3 និងវីតាមីន B ដែលអាចជួយជំរុញការលូតលាស់សក់រឹងមាំ ប្រឆាំងនឹងការរលាក និងការពារឫសសក់ពីការខូចខាតកាត់បន្ថយ ការជ្រុះសក់ ជួយឱ្យសក់ដុះល្អ និងមានសុខភាពល្អ។
-ស៊ុត៖ នៅក្នុង ស៊ុតមានសារធាតុចិញ្ចឹមជាច្រើនដែលអាចរួមចំណែកដល់សក់មានសុខភាពល្អ។ ទាំងនេះរួមមាន biotin ប្រូតេអ៊ីន choline ជាតិដែក និងវីតាមីន A, D និង B12។ សុទ្ធដសឹងជាសារធាតុប្រឆាំងអុកស៊ីតកម្ម ជួយថែរក្សាសុខភាពភ្នែក សក់ និងស្បែក។
-បន្លែស្លឹកបៃតង ៖ ស្លឹកបៃតងគឺសម្បូរដោយសារធាតុចិញ្ចឹមដែលមានសុខភាពល្អ សម្រាប់សក់ដូចជា វីតាមីន B វីតាមីន C ជាតិ folate ជាតិដែក និងសារធាតុប្រឆាំងអុកស៊ីតកម្ម quercetin និង kaempferol ។ មួយវិញទៀត តាមរយៈការសិក្សាមួយបានរកឃើញថា របបអាហារមេឌីទែរ៉ាណេ ដែលរួមមានបន្លែដូចជា ស្លឹកបៃតងខ្មៅ អាចជួយលើកកម្ពស់ការលូតលាស់សក់ចំពោះអ្នកដែលមានបញ្ហាសក់ជ្រុះ។
-គ្រាប់ធញ្ញជាតិ៖ បងប្អូនមានដឹងអត់ថា គ្រាប់ធញ្ញជាតិ គឺសម្បូរទៅដោយវីតាមីន E វីតាមីន B ស័ង្កសី និងខ្លាញ់ដែលមានសុខភាពល្អ។ តាមរយៈការសិក្សាមួយចំនួនបានបង្ហាញថា វីតាមីន E អាចលើកកម្ពស់សុខភាពសក់ដោយការពារកោសិកាឫសសក់ប្រឆាំងនឹងការខូចខាតអុកស៊ីតកម្មផ្សេងៗដែលធ្វើឱ្យសក់បងប្អូនចេះតែជ្រុះ។
-ផ្លែបឺរ ៖ ជាការពិតណាស់ ផ្លែបឺរគឺមានសារធាតុចិញ្ចឹមជាច្រើននៅខាងក្នុង មានដូចជា វីតាមីន E អាស៊ីតហ្វូលិក នី ម៉ាញេស្យូម និងវីតាមីន C អាស៊ីតខ្លាញ់។ ដូច្នេះហើយ ការញុំាផ្លែប័រមិនត្រឹមតែល្អសម្រាប់ជួយការពារសក់ កុំឱ្យជ្រុះជួយសក់មានសុខភាពល្អតែម្យ៉ាងនោះទេ តែអាចជួយការពារជំងឺបេះដូងផងដែរ។
-អយស្ទ័រ ៖ នៅក្នុង អយស្ទ័រគឺជាប្រភពដ៏ល្អនៃ ស័ង្កសី ដែលជាសារធាតុរ៉ែដែលជួយដល់វដ្តនៃការលូតលាស់សក់។មួយវិញទៀត តាមរយៈការស្រាវជ្រាវមួយចំនួនគេក៏បានបង្ហាញថា មនុស្សដែលកង្វះស័ង្កសី អាចនាំឱ្យជ្រុះសក់។ ទោះជាយ៉ាងនេះក្ដីញុំាល្មមៗបានហើយកុំញុំាច្រើនពេក ព្រោះអាចបង្កផលប៉ះពាល់វិញ។
-យ៉ាអួ ៖ ទឹកដោះគោយ៉ាអួ ផ្តល់សារធាតុចិញ្ចឹមសុខភាពសក់ជាច្រើនព្រោះវាផ្ទុកដោយ ប្រូតេអ៊ីន វីតាមីន B សេលេញ៉ូម និងវីតាមីន D។ ដោយហេតុថាសារធាតុវីតាមីន ប្រូតេអ៊ីនទាំងនេះគឺមានប្រយោជន៍ច្រើនសម្រាប់សក់។
ជាចុងក្រោយ របបអាហាទាំង៧ខាងលើនេះគឺពិតជាមាប្រយោជន៍ច្រើនជួយសក់របស់អ្នកក៏ពិតមែន។ ក៏ប៉ុន្ដែប្រសិនណាបងប្អូនមានបញ្ហាជ្រុះសក់មិនបាត់ ក្រៅពីញុំាអាហារទាំងនេះ រឿងមួយទៀតបងប្អូនត្រូវទៅគឺ ទៅជួបពេទ្យឯកទេសដើម្បីព្យាបាលប្រសិនណាចេះតែជ្រុះមកទាំងដៃៗ ព្រោះបើមិនទប់ស្កាត់ទុកមុនអាចជ្រុះអស់ពីក្បាលពិបាកព្យាបាលជាងជ្រុះតិចៗ៕