ការរលាកក្នុង(inflammation) គឺជាស្ថានភាពមួយដែលប្រព័ន្ធការពាររាងកាយធ្វើការឆ្លើយតប ទៅនឹងមេរោគ បាក់តេរី ឬបញ្ហាសុខភាពផ្សេងៗទៀត ។ ការរលាកក្នុងដែលមានលក្ខណៈរ៉ាំរ៉ៃ អាចបង្កឲ្យខូចខាតកោសិកា ដែលជាមូលហេតុដ៏ចម្បងនាំឲ្យកើតជំងឺមហារីក បង្កឲ្យកើតជំងឺទឹកនោមផ្អែម ជំងឺសរសៃឈាមបេះដូង ជំងឺរលាកសន្លាក់ និងជំងឺខ្សោយតម្រងនោមរ៉ាំរ៉ៃ -ល- ។ មូលហេតុដ៏សំខាន់ដែលបង្កឲ្យមានការរលាកក្នុងរ៉ាំរ៉ៃ (Chronic Inflammatory) គឺបណ្ដាលមកពីរបបចំណីអាហារទាំង៤ដូចខាងក្រោមនេះ ។

១. អាហារមានជាតិស្ករខ្ពស់៖ អាហារមានជាតិស្ករខ្ពស់ បាននាំឲ្យកើនឡើងជាតិខ្លាញ់នៅក្នុងថ្លើម ហើយនៅពេលដែលរាងកាយខំរំលាយជាតិខ្លាញ់ទាំងនេះ វាក៏បង្កឲ្យមានការរលាកក្នុង(Inflammation) កើតឡើង ។ ម៉្យាងទៀត ចំណីអាហារដែលមានជាតិស្ករខ្ពស់បាននាំឲ្យរាងកាយផលិតអ័រម៉ូនអាំងស៊ុយលីនកាន់តែច្រើនទ្វេដង ។ ជាលទ្ធផល វាក៏បានជម្រុញឲ្យកោសិកាខ្លាញ់ក្នុងរាងកាយផលិតសារធាតុគីមី ដែលជាមូលហេតុមួយទៀតដែលនាំឲ្យមានការរលាកក្នុងផងដែរ ។

២. ប្រភេទសាច់ក្រហម និងអាហារកែច្នៃ៖ អាហារកែច្នៃដែលមានដាក់សារធាតុរក្សាទុកឲ្យបានយូរ មានការបន្ថែមអំបិល ឬសារធាតុគីមីផ្សេងៗ ហើយពួកវាពោរពេញទៅដោយខ្លាញ់ឆ្អែត ដែលអាចបង្កឲ្យឡើងទម្ងន់ និងការរលាកក្នុងរ៉ាំរ៉ៃបានផងដែរ។

៣. ប្រេងសម្រាប់ចំអិនអាហារមួយចំនួន៖ ការប្រើប្រាស់ ប្រេងសម្រាប់ចំអិនអាហារដែលមានផ្ទុក Omega-6 ខ្ពស់ អាចបង្កឲ្យមានអតុល្យភាពរវាងសារធាតុ Omega-3 ក្នុងរាងកាយ ហើយក៏ជាមូលហេតុនាំឲ្យមានការរលាកក្នុងផងដែរ ។

៤. អាហារចៀន ឬឆា៖ អាហារដែលត្រូវបានចំអិនដោយប្រើប្រេងឆា គឺងាយបង្កឲ្យកើនឡើងទម្ងន់ ដុះខ្លាញ់ក្បាលពោះ និងបង្កឲ្យមានការរលាកក្នុងរ៉ាំរ៉ៃ ។

ដើម្បីកាត់បន្ថយការរលាកក្នុង លោកអ្នកគួរទម្លាប់ញ៉ាំអាហារដែលសម្បូរដោយ វីតាមីន ប្រូតេអីន និងមានជាតិសរសៃឱ្យបានច្រើន ដូចជា បន្លែ ផ្លែឈើ សាច់ត្រី និងគ្រាប់ធញ្ញជាតិជាដើម ៕

អត្ថបទដោយ៖ ហួ ភារ៉ា

ប្រភព៖ www.insider.com