សុខភាពផ្លូវចិត្ត ពិតជាសំខាន់មិនចាញ់សុខភាពរាងកាយឡើយ ដែលគ្រប់គ្នាត្រូវយកចិត្តទុកដាក់។ ប្រសិនបើអ្នកបណ្ដោយឱ្យសុខភាពផ្លូវចិត្តមិនល្អ នោះយូរៗទៅនឹងវិវត្តទៅជាជំងឺបាក់ទឹកចិត្ត ឬថប់បារម្ភក៏អាចថាបាន។
ដើម្បីទទួលបានសុខភាពផ្លូវចិត្តល្អប្រសើរ អារម្មណ៍ដ៏សំខាន់មួយដែលអ្នកត្រូវមាន គឺក្ដីស្រលាញ់ពិតប្រាកដពីមនុស្សជុំវិញខ្លួន និងជាពិសេសពីដៃគូជីវិតរបស់អ្នក។ បើយោងតាមលោកគ្រូ «ស៊ាង លាប» ជាអ្នកជំនាញចិត្តសាស្ត្រ និងជាអ្នកនិពន្ធសៀវភៅ «ព្រហ្មវិហារធម៌» បានមានប្រសាសន៍ថា បេះដូងជាអ្នកកំណត់ភាពរឹងមាំនៃផ្លូវចិត្ត ដែលមានន័យថា បេះដូងរឹងមាំ នោះផ្លូវចិត្តនឹងរឹងមាំ។ បើបេះដូងទន់ជ្រាយ នោះផ្លូវចិត្តនឹងទន់ជ្រាយដូចគ្នា។
លោកគ្រូ «ស៊ាង លាប» បានបន្ដទៀតថា ការដែលមានបេះដូងល្អ គឺជារឿងចាំបាច់បំផុត ខណៈបេះដូងល្អ មានន័យថា បេះដូងមានចំណី មានទ្រនំ និងមានសេរីភាព។ បេះដូងត្រូវការអារម្មណ៍៥ រួមមានអារម្មណ៍មានតម្លៃ យល់ចិត្ត គិតគូពីសុខទុក្ខ សុវត្ថិភាព និងត្រេកអរ។ ចំណីបេះដូងគឺមាន២ គឺអារម្មណ៍ស្រលាញ់ និងសេចក្ដីសុខផ្លូវភេទ។ បុរសមួយចំនួនឱ្យអាទិភាពទៅលើក្ដីសុខផ្លូវភេទ តែនារីមួយចំនួនឱ្យអាទិភាពទៅលើអារម្មណ៍ស្រលាញ់។ ក្នុងចិត្តសាស្ត្រ នៅពេលនារីទទួលបានអារម្មណ៍ស្រលាញ់ នោះនឹងបើកចំហរទៅរកផ្លូវភេទ។ ចំណែកបុរសវិញ ឱ្យតម្លៃផ្លូវភេទ។ នៅពេលទទួលបានផ្លូវភេទ នោះទើបបើកចំហរទៅរកក្ដីស្រលាញ់។
លោកគ្រូបានលើកឡើងទៀតថា នៅពេលផ្លូវចិត្តទទួលបានអារម្មណ៍ស្រលាញ់ នោះផ្លូវចិត្តនឹងរឹងមាំ។ តែអ្វីដែលបេះដូងត្រូវការពិតប្រាកដ គឺក្ដីស្រលាញ់ពិត មិនមែនក្លែងក្លាយ។ ចំពោះក្ដីស្រលាញ់ពិតមានមេត្តា ករុណា មុទិតា និងឧបេក្ខា៕ អត្ថបទដោយ៖ មាស ចាន់ដារ៉ា