អ្នកជំងឺមានផ្ទៃពោះម្នាក់ ដែលសម្រាកព្យាបាលនៅមន្ទីរពេទ្យ DonSak ក្នុងខេត្ត Surat Thani ប្រទេសថៃ បានរកឃើញដង្កូវពោះវៀនធំចំនួន២ ដែលដង្កូវៗនីមួយៗមានប្រវែងលើសពី ១០-១៥សង់ទីម៉ែត្រ នៅក្នុងក្អួតរបស់នាង ខណៈគ្រូពេទ្យជឿជាក់ថាដង្កូវដែលចេញពីក្អួតរបស់អ្នកជំងឺនោះគឺបណ្ដាលមកពីនាងបរិភោគអាហារឆៅច្រើន និងហូបបន្លែ ផ្លែឈើដែលលាងមិនបានស្អាតទើបធ្វើឲ្យមានបរាសិត។ នេះបើយោងតាមការចុះផ្សាយរបស់សារព័ត៌មាន Thehaiger ។
ប្រភពព័ត៌មានបានបញ្ជាក់ឲ្យដឹងទៀតថា ស្ត្រីមានផ្ទៃពោះ៨ខែ នោះមានអាយុ២៧ ដោយនាងមានអាការឈឺពោះ ក្អួតចង្អោរ អស់រយៈពេល១ថ្ងៃមុនពេលនាងទៅមន្ទីរពេទ្យ។ លុះពេលមកដល់មន្ទីរពេទ្យស្ត្រីរូបនេះបានក្អួតចំនួន២ដងទៀត ដោយក្អួតនោះគេឃើញមានដង្កូវប្រវែង១០ទៅ១៥សង់ទីម៉ែត្រចំនួន២ក្បាល។
ផ្អែកលើការធ្វើតេស្តមន្ទីរពិសោធន៍បានបង្ហាញពីវត្តមានរបស់ដង្កូវមួយប្រភេទឈ្មោះ Ascaris lumbricoides ដែលជាប្រភេទដង្កូវមូលពោះវៀន។ តាមការសាកសួរអ្នកជំងឺបានសារភាពថា ខ្លួនបានហូបអាហារឆៅស្ទើរតែជារៀងរាល់ថ្ងៃ រួមជាមួយនឹងបន្លែស្រស់ៗ។
យ៉ាងណាមិញវេជ្ជបណ្ឌិតបានសន្និដ្ឋានថា ស្ត្រីនោះបានឆ្លងមេរោគដង្កូវទឹកក្នុងពោះវៀនដោយទទួលទានផ្លែឈើ និងបន្លែដែលមានពងដង្កូវមូល។ ខណៈរាងកាយរបស់មនុស្សអាចលេបស៊ុតទាំងនេះតាមរយៈអាហារដែលមានមេរោគ ហើយពួកវាញាស់ទៅជាដង្កូវនៅក្នុងបរិស្ថានដែលសើម នៅពេលដែលដង្កូវចូលទៅក្នុងពោះវៀនតូច ពួកគេអាចវិវត្តទៅជាដង្កូវពេញវ័យ។
ខាងមន្ទីរពេទ្យក៏បានណែនាំកុំឱ្យបរិភោគសាច់ឆៅ ឬមិនទាន់ឆ្អិន និងអាហារសមុទ្រ។ នៅពេលរៀបចំបន្លែ និងផ្លែឈើស្រស់ គួរតែលាងសម្អាតឱ្យបានច្រើនដង ដើម្បីធានាសុវត្ថិភាព កុំឲ្យមានដង្កូវ ឬបរាសិតមិនល្អចូលទៅក្នុងពោះវៀន ៕
អត្ថបទដោយ៖ ស្រីណុច