វីតាមីន គឺជាសារធាតុចិញ្ចឹមដ៏សំខាន់និងចាំបាច់បំផុតសម្រាប់រាងកាយរបស់មនុស្សគ្រប់វ័យ។ វីតាមីនជួយឱ្យកុមារលូតលាស់ល្អ ឆ្អឹងរឹងមាំ ជួយឱ្យមនុស្សពេញវ័យមានសុខភាពល្អ បំប៉នខួរក្បាល បង្កើនIQ គិតរហ័ស មិនងាយឆ្លងជំងឺផ្តេសផ្តាស។ ចំពោះមនុស្សចាស់ជួយឱ្យមានការចងចាំល្អ ការពារជំងឺវង្វេង មិនឆាប់កោងឆ្អឹង មិនបាក់កម្លាំង និងជាពិសេសជួយសម្រស់ឱ្យនៅក្មេងជាងវ័យ ស្បែកភ្លឺថ្លាថែមទៀតផង។

ជាការពិតណាស់ បើតាមការឱ្យដឹងគេហទំព័រ cnbc លោកស្រីវេជ្ជបណ្ឌិត uma naidoo ជំនាញផ្នែកចំណីអាហារ បានបញ្ជាក់ច្បាស់ៗថា ក្នុងចំណោមវីតាមីនទាំងអស់ វីតាមីនB គឺជាវីតាមីនដែលដើរតួនាទីសំខាន់បំផុត និងជំនួយដល់ខួរក្បាលបានខ្លាំងបំផុត។ លោកស្រីវេជ្ជបណ្ឌិត បានប្រាប់ច្បាស់ៗថា វីតាមីនB មានតួនាទី ចម្បងគឺជំនួយដល់ខួរក្បាលខួរក្បាល ការពារជំងឺធ្លាក់ទឹកចិត្ត ជំងឺវង្វេង និងបញ្ហាផ្លូវចិត្តផ្សេងៗ។

តាមរយៈការសិក្សាពីសកវិទ្យាល័យ វេជ្ជសាស្ត្រ Wayne State University សហរដ្ឋអាមេរិក បានរកឃើញថា មនុស្សដែលមានរាងកាយខ្វះវីតាមីនB គឺមានផ្លូវចិត្តទន់ខ្សោយបំផុត ឆាប់បាក់ទឹកចិត្ត ងាយស្រ្តេស និងប្រឈមមុខខ្លាំងជាមួយជំងឺសរសៃប្រសាទ រួមទាំងជំងឺវង្វេងនៅពេលចាស់។ លោកស្រីវេជ្ជបណ្ឌិតបានបន្ថែមទៀតថា នៅក្នុងវីតាមីនB គេបែងចែកជា ៨ប្រភេទផ្សេងៗគ្នា និងមានអត្ថប្រយោជន៍ផ្សេងៗគ្នាដូចជា៖

១. វីតាមីន B1៖ គឺមានសារៈសំខាន់សម្រាប់មុខងារជាមូលដ្ឋាននៃកោសិការបស់មនុស្ស និងបំប្លែងសារជាតិចិញ្ចឹមសម្រាប់ផ្តល់ជាថាមពលដល់រាងកាយផងដែរ។ ជាពិសេសខួរក្បាលគឺជាសរីរាង្គសកម្មមេតាបូលីសមួយនៅក្នុងរាងកាយ វាត្រូវការជាតិ thiamin ពីវីតាមីនដើម្បីការពារការខ្វះខាតដែលអាចនាំឱ្យមានបញ្ហាសរសៃប្រសាទ។

២. វីតាមីន B2៖ ដើរតួជាជំនួយអង់ស៊ីមនៅក្នុងកោសិកា ដែលមានប្រតិកម្មសំខាន់ៗដូចជានៅក្នុងរាងកាយ និងខួរក្បាល។ វាក៏ជួយដល់ការលូតលាស់កោសិកា ផលិតថាមពល និងបំបែកខ្លាញ់ផងដែរ។

៣. វីតាមីន B3៖ ធ្វើការជាមួយអង់ស៊ីមជាង៤០០ប្រភេទដើម្បីផលិតវត្ថុធាតុដូចជាកូលេស្តេរ៉ុល និងខ្លាញ់ដែលត្រូវការក្នុងរាងកាយ និងបំប្លែងថាមពលសម្រាប់ប្រព័ន្ធសរីរាង្គទាំងអស់របស់យើង។

៤. វីតាមីន B5៖ គឺចាំបាច់សម្រាប់បង្កើតសមាសធាតុម៉ូលេគុលហៅថា coenzyme A ដែលជួយអង់ស៊ីមក្នុងរាងកាយ បង្កើត និងបំបែកអាស៊ីតខ្លាញ់សម្រាប់ថាមពល។ វាក៏ជួយកោសិកាបង្កើតប្រូតេអ៊ីន acyl carrier ជួយផលិតខ្លាញ់ចាំបាច់។ ខួរក្បាលមានជាតិខ្លាញ់ជាចម្បង ដូច្នេះអាស៊ីត pantothenic គឺជាវីតាមីនដ៏សំខាន់បំផុតក្នុងការជួយដល់សុខភាពខួរក្បាល។

៥. វីតាមីន B6៖ តួនាទីក្នុងការការពារជំងឺ បានផ្សារភ្ជាប់ជាមួយនឹងការថយចុះហានិភ័យនៃជំងឺមហារីកមួយចំនួន។ លើសពីនេះ pyridoxine ជួយដល់ប្រតិកម្មគីមីជាច្រើនក្នុងរាងកាយដែលជួយដល់មុខងារប្រព័ន្ធភាពស៊ាំ និងសុខភាពខួរក្បាល។

៦. វីតាមីន B7៖ មាននាទីគ្រប់គ្រងកោសិកាទំនាក់ទំនង ឱ្យមានការឆ្លើយតបរហ័ស មានសារៈសំខាន់ណាស់សម្រាប់ការបញ្ជូនសញ្ញាកោសិកាតាមរយៈប្រព័ន្ធបញ្ជូនសរសៃប្រសាទ។

៧. វីតាមីន B9៖ គឺជាអាហារបំប៉នដ៏សំខាន់ និងជាវីតាមីនសម្រាប់ជំនួយដល់សុខភាពខួរក្បាល និងសរសៃប្រសាទ មុខងារបញ្ជូនសរសៃប្រសាទដ៏ប្រសើរ និងសុខភាពផ្លូវចិត្តមានតុល្យភាព។ អត្ថប្រយោជន៍មួយទៀតគឺថាវាជួយលើកទឹកចិត្តដល់ការបន្សាបជាតិពុលកោសិកា។

៨. វីតាមីន B12៖ គឺជាវីតាមីនសំខាន់សម្រាប់បង្កើតកោសិកាឈាមក្រហម និង DNA និងគាំទ្រដល់ការវិវត្ត និងមុខងារនៃប្រព័ន្ធសរសៃប្រសាទ។ វីតាមីន B12 ក៏គាំទ្រដល់ការបំបែក homocysteine ​​ផងដែរ ដែលជាប្រូតេអ៊ីនជំនួយដល់សុខភាពសរសៃឈាមបេះដូង។

ទន្ទឹមនឹងនេះផងដែរ ដើម្បីបំពេញជាតិវីតាមីនB ដល់រាងកាយរបស់អ្នកឱ្យបានគ្រប់គ្រាន់គឺអ្នកអាចប្រើវិធី២យ៉ាង វិធីទី១គឺកាលេបថ្នាំគ្រាប់វីតាមីនB ប៉ុន្តែសម្រេចចិត្តលេបអ្នកត្រូវទៅពិគ្រោះយោបល់ជាមួយគ្រូពេទ្យជំនាញឱ្យបានច្បាស់ ដើម្បីដឹងពីរបៀបក្នុងការញ៉ាំ និងញ៉ាំត្រឹមត្រូវទៅតាមបរិមាណ។ វិធិទី២ គឺអ្នកអាចបំពេញជាតិវីតាមីនB ឱ្យរាងកាយរបស់អ្នកប្រចាំថ្ងៃបាន តាមរយៈការញ៉ាំអាហារដែលផ្ទុកជាតិវីតាមីនB ដែលអាហារទាំងនោះមានដូចជា៖

·  ស៊ុត៖ ស៊ុតមានផ្ទុកវីតាមីន B7 ដែលអ្នកគួរញ៉ាំប្រចាំថ្ងៃ។

·  ទឹកដោះគោយ៉ាអួ៖ សម្បូរទៅដោយវីតាមីន B2 និងវីតាមីន B12 ក៏ដូចជានៅក្នុង probiotics ធម្មជាតិដែលជួយទាំងសុខភាពពោះវៀន និងសុខភាពផ្លូវចិត្ត។ ខ្ញុំ

·  គ្រាប់ធញ្ញជាតិ៖ ដូចជា សណ្តែកខ្មៅ សណ្តែកសៀង អេដាម និង សណ្តែកដី សុទ្ធតែជួយបង្កើនអារម្មណ៍ និងសុខភាពខួរក្បាលរបស់អ្នក។ វាជាប្រភពដ៏ល្អនៃវីតាមីន B9 ហើយរួមបញ្ចូលនូវបរិមាណតិចតួចនៃវីតាមីន B1 វីតាមីន B2 វីតាមីន B3 វីតាមីន B5 និងវីតាមីន B6 ។

·  ត្រីសាម៉ុង៖ សម្បូរទៅដោយវីតាមីន B ជាពិសេសវីតាមីន B2 វីតាមីន B3 វីតាមីន B6 និងវីតាមីន B12។

·  គ្រាប់ផ្កាឈូករ័ត្ន៖ គឺជាប្រភពរុក្ខជាតិដ៏ល្អបំផុតមួយនៃវីតាមីន B5 ។

·  បន្លែស្លឹកបៃតង៖ ដូចជា spinach, chard និងស្ពៃក្តោបគឺជាប្រភពដ៏អស្ចារ្យនៃវីតាមីន B9 ៕

អត្ថបទដោយ៖ មឿន គន្ធា