នាយកដ្ឋានពាណិជ្ជកម្មអន្តរជាតិជាតិរបស់ថៃ(DITP) កំពុងជម្រុញការនាំចេញចេកថៃទៅកាន់ទីផ្សារជប៉ុន ដើម្បីបំពេញតម្រូវការ។ លោក Phusit Ratanakul Sereroengrit អគ្គនាយក DITP បាននិយាយកាលពីថ្ងៃអង្គារថា ផ្លែចេកជាផ្លែឈើដែលសម្បូរទៅដោយសារធាតុចិញ្ចឹមគឺមានប្រជាប្រិយភាពនៅក្នុងប្រទេសជប៉ុន ព្រោះមិនត្រឹមតែជាអាហារសម្រន់ដែលមានរសជាតិឈ្ងុយឆ្ងាញ់ ផ្តល់សុខភាពប៉ុណ្ណោះទេ ប៉ុន្តែក៏អាចប្រើប្រាស់ជាគ្រឿងផ្សំនៅក្នុងបង្អែមជាច្រើនមុខផងដែរ នេះបើផ្អែកតាមការឱ្យដឹងពីប្រភពThe Nation ។
លោកបានបន្តថា ទោះជាផ្លែឈើអាចដាំដុះបាននៅប្រទេសជប៉ុនក៏ដោយ ប៉ុន្តែទិន្នផលតែងមានកម្រិតទាបដោយសារអាកាសធាតុ ដោយលោកបានបន្ថែមថា ប្រទេសនេះត្រូវការនាំចូលចេកជាង ១លានតោនក្នុងមួយឆ្នាំ។ ទោះជាយ៉ាងណាក៏ដោយ លោកបាននិយាយថា ប្រទេសថៃបាននាំចេញចេកត្រឹមតែ ២,៨៩០តោនទៅប្រទេសជប៉ុនក្នុងមួយឆ្នាំ បើទោះបីជាកិច្ចព្រមព្រៀងភាពជាដៃគូសេដ្ឋកិច្ចជប៉ុន-ថៃ (JTEPA) លើកលែងពន្ធសម្រាប់ចេកថៃចំនួន ៨,០០០តោនក៏ដោយ។
ប្រទេសថៃប្រឈមនឹងបញ្ហាក្នុងការនាំចេញចេកទៅកាន់ប្រទេសជប៉ុន ខណៈដែលប្រទេសហ្វីលីពីនកាន់កាប់ចំណែកទីផ្សារចេក ៧៦% នៅទីនោះ។ យ៉ាងណាមិញ ពេលនេះជាពេលវេលាល្អសម្រាប់ប្រទេសថៃក្នុងការវាយលុកទីផ្សារចេកនៅប្រទេសជប៉ុន ដោយសារប្រទេសហ្វីលីពីនបានដំឡើងថ្លៃចេក Cavendish ហើយកំពុងតែជួបបញ្ហាដំណាំចេកផងដែរ។ ហេតុនេះប្រទេសថៃកំពុងតែធ្វើការដុតដៃដុតជើង ចរចារនាំចេញនាំចូលទៅប្រភេទជប៉ុនដើម្បីជម្រុញការលក់ឱ្យកាន់តែខ្លាំង៕
អត្ថបទដោយ៖ Seghong
