ការរស់នៅសុខភាពល្អ ឬអាក្រក់ស្ថិតនៅលើយើងជាអ្នកបង្កើតទម្លាប់នេះឯង។ មនុស្សឈឺ មានជំងឺ និងខ្សោយរាងកាយច្រើន មានកត្តាជាច្រើនក្នុងចំណោមនោះក៏មានរបបអាហារដែរ។ ជាពិសេសគ្រឿងស្រវឹង ជាអ្នកសម្លាប់កោសិកាខួរក្បាល និងឱ្យកើនជំងឺរាប់មុខ។ តាមលោកគ្រូ សំបូរ សោភ័ណ្ឌ បញ្ជាក់ថា តើយើងគួរធ្វើរឿង១នេះ ១ជីវិតដែរទេ?

លោកគ្រូ សំបូរ សោភ័ណ្ឌ ជាម្ចាស់មេដៃមាសអន្តរជាតិផ្នែកកាយវប្បកម្ម បាននិយាយថា ពេលអ្នកហាត់ប្រាណស្រកគីឡូហើយ និងហាត់ឡើងសាច់ដុំ តើយើងគួរឈប់ហាត់ប្រាណដែរទេ? គាត់បន្តថា យើងធ្វើលំហាត់ប្រាណនេះ កំពុងតែប្រឆាំងជាមួយធម្មជាតិ។ ព្រោះធម្មជាតិផ្តល់រាងកាយអ្នកមកទន់ខ្សោយ ឬស្គម ដើម្បីឡើងសាច់ដុំ ឱ្យមានរាងស្អាតនោះ បងប្អូនត្រូវការហាត់ប្រាណ។ ដូចជាអ្នកលើសគីឡូ និងឧស្សាហ៍ឈឺក្បាល លំហាត់ប្រាណជាថ្នាំពូកែឱ្យអ្នកស្រឡះខួរក្បាល និងកម្ចាត់ជាតិខ្លាញ់ ការពារជំងឺ។

សម្រាប់១ជីវិតយើងនេះ មិនអាចធ្វើហាត់ប្រាណទទួលបានអ្វីដែលយើងចង់បានហើយឈប់ហាត់នោះទេ។ លោកគ្រូបានបន្តថា “វ័យយើងកាន់តែចាស់ពីមួយថ្ងៃទៅមួយថ្ងៃ មានតែការហាត់ប្រាណ និងរបបអាហារល្អទេ ទើបរាងកាយ និងចៀសពីជំងឺឱ្យមានសុខភាពល្អ”។ ការហាត់ប្រាណនេះ អ្នកត្រូវតែហាត់មួយជីវិត ក៏មានរបៀបហាត់ដែរ អាចមួយសប្តាហ៍ ៣ទៅ៥ថ្ងៃ ចំនួន៣០នាទីទៅ១ម៉ោងជាដើម។ ពេលអ្នកធ្វើរបៀបនេះ បញ្ហាឈឺក្បាលក៏លែងមានដែរ។ ជំងឺកម្រចូលរាងកាយអ្នក។ សូម្បីអារម្មណ៍អ្នកក៏រីករាយ ឱ្យអ្នកអាយុវែងទៀត។

យោងតាមការស្រាវជ្រាវពី UCLA បានបង្ហាញថា “ការធ្វើលំហាត់ប្រាណ ជួយបង្កើតកត្តាលូតលាស់កោសិកាខូរក្បាល ដើម្បីតភ្ជាប់ជាមួយប្រព័ន្ធប្រសាទថ្មី”។ ការឈឺក្បាលអាចផ្តើមចេញពីស្រ្តេសច្រើន។ តាមគេហទំព័រសុខភាពខួរក្បាល BrainHQ បានចុះផ្សាយថា ការធ្វើលំហាត់ប្រាណ ពេលព្រឹក និងល្ងាច ជួយដេញស្រ្តេស ហើយដឹកនាំខួរក្បាលរីកលូតលាស់ ហើយរក្សាឃ្លាំងការចង់ចាំបានល្អ៕ អត្ថបទដោយ៖ ទ្រ សុភាព