យោងតាមរយៈវេជ្ជបណ្ឌិត ហម ឆេងអ៊ី គឺជាគ្រូពេទ្យឯកទេសភ្នែក នៅគ្លីនិកភ្នែកភ្នំពេញបានរៀបរាប់អំពី ជំងឺភ្នែកស្រលៀងកើតលើកុមារ គឺជាជំងឺមួយដែលភ្នែក មានអក្ស័មិនស្របគ្នាជាឧទាហរណ៍មួយឡើងលើ មួយចុះក្រោមជាដើម។ គេបានបែងចែកជំងឺស្រលៀងភ្នែកជា៤ប្រភេទគឺ ភ្នែកស្រលៀងចេញ ស្រលៀងចូល ឡើងលើ និងស្រលៀងចុះក្រោម។
វេជ្ជបណ្ឌិតហម ឆេងអ៊ី បានរៀបរាប់បន្ដថាជំងឺស្រលៀងភ្នែកចូលកើតមានច្រើនជាងជំងឺភ្នែកស្រលៀងចេញលើកុមារ។ ចំពោះមូលហេតុទី១ ដែលធ្វើឱ្យស្រលៀងភ្នែកលើកុមារនោះបណ្ដាលមកពីគាត់មានបញ្ហាកំហុកកំណុំហៅថា (Hyperopia) មានន័យថាភ្នែករបស់គាត់ពិបាកក្នុងការមើលជិត មានន័យថាមើលឆ្ងាយច្បាស់ជាងមើលជិត។ ជាហេតុធ្វើឱ្យគាត់ប្រឹងមើលរហូតក្លាយជាជំងឺភ្នែកស្រលៀងចូល។ មូលហេតុពី២មកពីគាត់មានបញ្ហាខួរក្បាលពីកំណើតឬក៏មានជំងឺភ្នែកពីកំណើត។ ចំណែកឯមូលហេតុទី៣ បណ្ដាលមកពីការលូតលាស់របស់សាច់ដុំភ្នែករបស់គាត់ខ្សោយ មិនដូចគេឯងពីកំណើតជាហេតុធ្វើឱ្យគាត់មានជំងឺភ្នែកស្រលៀងឡើងមក។ មូលហេតុសំខាន់ទី៤ គឺគាត់មានប្រវត្តិគ្រួសារកើតជំងឺនេះ ដែលជាហេតុធ្វើឱ្យគាត់ស្រលៀងពីកំណើតឡើងមកដែរ។ ចំពោះមូលហេតុចុងក្រោយនោះគឺ មិនទាន់ដឹងពីមូលច្បាស់លាស់នោះទេ តែគាត់មានបញ្ហាស្រលៀងភ្នែកឡើងមកដូចក្មេងដែលមានបញ្ហាដែរ។
ម្យ៉ាងវិញទៀត វេជ្ជបណ្ឌិតហម ឆេងអ៊ី បានបន្ដថាកុមារដែលមានបញ្ហាភ្នែកស្រលៀងនេះភាគច្រើនកើតមានឡើងលើកុមារអាយុ៣ឆ្នាំទៅ៤ឆ្នាំ។ហើយពួកគាត់ត្រូវជួបប្រទះបញ្ហាច្រើនប្រសិនណាគាត់មិនបានទទួលការព្យាបាលត្រឹមត្រូវ។ ទី១គាត់នឹងវិវត្តទៅជាភ្នែកខ្ជិល មានន័យថាភ្នែករបស់គាត់មិនបានបញ្ហាអ្វីនោះទេ តែយូរទៅៗភ្នែកណាមួយនឹងថយចុះគំហើយមើលលែងច្បាស់។ ទី២ធ្វើឱ្យគាត់ជួបប្រទះបញ្ហាឈឺក្បាល ចុករោយកជាដើម។ មួយវិញទៀត ក្មេងដែលមានបញ្ហាភ្នែកស្រលៀងនេះនឹងធ្វើឱ្យក្មេងបាត់បង់សមត្ថភាពក្នុងការមើលឃើញ3D។ ចំណែកឯមូលហេតុចុងក្រោយនោះគឺ ប៉ះពាល់ដល់សុខភាពផ្លូវចិត្តនិងសម្រស់របស់គាត់ មានគេសើចចំអក ឬក៏មានក្មេងខ្លះគាត់នឹងលែងហ៊ានទៅសាលារៀនព្រោះខ្មាសគេ។
វិធីសាស្រ្តព្យាបាលភ្នែកស្រលៀង៖ វេជ្ជបណ្ឌិត ហម ឆេងអ៊ី បានរៀបរាប់ថាការព្យាបាលភ្នែកស្រលៀងគឺអាស្រ័យលើអាយុ និងស្ថានភាពជាក់ស្ដែង។ ក៏ប៉ុន្ដែវេជ្ជបណ្ឌិតបានណែនាំថាប្រសិនណាឪពុកម្ដាយសង្កេតមើលកូនឱ្យទាន់ពេល ឬក៏ដឹងថាកូនមានបញ្ហាភ្នែកហើយ គួរតែប្រញាប់ទៅជួបពេទ្យដើម្បីព្យាបាលកុំព្យាយាមពន្យារពេលព្រោះបើភ្នែកស្រលៀងយូរទៅៗធ្វើឱ្យក្មេងក្លាយជាភ្នែកខ្ជិល ធ្វើឱ្យគាត់មើលលែងច្បាស់។ ចំពោះការព្យាបាលភ្នែកស្រលៀងគឺមាន២ប្រភេទ ទី១ឱ្យគាត់ពាក់វ៉េនតា ។ ទី២គឺវះកាត់ប្រសិនបើពាក់វ៉េនតាមិនធ្វើឱ្យភ្នែកគាត់ត្រង់។វេជ្ជបណ្ឌិត បានបន្តថា សរុបមកគឺអាស្រ័យលើស្ថានភាពជំងឺរបស់ក្មេងផ្ទាល់។ ក្រោយពីវះកាត់រួចមួយថ្ងៃភ្នែកស្រលៀងរបស់កុមារនឹងត្រឡប់មកត្រង់ស្អាតដូចភ្នែកក្មេងធម្មតាវិញហើយគ្រាន់តែនៅឡើងក្រហម។
ជាចុងក្រោយវេជ្ជបណ្ឌិតបានបន្ដថា ប្រសិនបើសង្កេតឃើញកូនអ្នកអាយុ៣ខែ មានបញ្ហាភ្នែកស្រលៀងខុសធម្មតាគឺមិនអីនោះទេ។ តែប្រសិនណាភ្នែកក្មេងអាយុ៦ខែហើយនៅតែដដែលគួរតែពិគ្រោះជាមួយគ្រូពេទ្យជំនាញដើម្បីធ្វើការព្យាបាលឱ្យបានទាន់ពេលវេលា។ ចំណុចពិសេសមួយទៀតវេជ្ជបណ្ឌិត ហម ឆេងអ៊ី ណែនាំឱ្យឪពុកម្ដាយគួរតែនាំកូនៗគួរឱ្យស្រឡាញ់របស់អ្នកពិនិត្យភ្នែកម្ដង មុនអាយុដែលគេត្រូវចូលរៀនដំបូង៕
អត្ថបទដោយ៖ ប៉ែត ធីតា
មានបញ្ហាភ្នែកអាចទាក់ទងទៅគ្លីនិកវេជ្ជបណ្ឌិតផ្ទាល់បាន៖ PHNOMPENH.EYE.CLINIC
