ក្រលៀនឬតម្រងនោម ជាអវយុវៈសំខាន់មួយនៃរាងកាយ កាលណាតែខូចហើយ ត្រូវការលាងឈាមឬប្តូរក្រលៀនដើម្បីអាចបន្តអាយុជីវិតបាន។ ជំងឺនេះ យើងអាចនិយាយថាជាជំងឺអ្នកមានបានផងដែរ ព្រោះតែត្រូវការចំណាយលុយច្រើនណាស់នៅក្នុងការព្យាបាលម្តងៗ។ តាមវេជ្ជបណ្ឌិត Nguyen Van Tuyen ប្រធាននាយកដ្ឋាន Endocrinologyក៏បានឱ្យដឹងថា មានទម្លាប់មួយក្នុងការទទួលទានថាមពលលើសកម្រិត អាហារកែច្នៃដែលមានសារធាតុរក្សាទុកច្រើន ការផឹកភេសជ្ជៈ និងកង្វះលំហាត់ប្រាណក៏ជាមូលហេតុនៃជំងឺខ្សោយតម្រងនោមរ៉ាំរ៉ៃផងដែរ។ សមាមាត្រនៃអ្នកជំងឺបុរសដែលមានជំងឺខ្សោយតម្រងនោមរ៉ាំរ៉ៃគឺខ្ពស់ជាងអ្នកជំងឺស្រី។ ខាងក្រោមនេះជាសញ្ញាសំខាន់ៗ ចំនួន ៤ ដែលបង្ហាញថា អ្នកប្រហែលជាកើតជំងឺក្រលៀន៖
១. អស់កម្លាំងញឹកញាប់៖ មុខសញ្ញាមួយក្នុងចំណោមសញ្ញាដំបូងនៃបញ្ហាតម្រងនោម ឬបញ្ហាក្រលៀនគឺអ្នកមានអារម្មណ៍ថា រាងអស់កម្លាំងជាប់លាប់។ ពេលដែលតម្រងនោមរបស់អ្នកដំណើរការមិនត្រឹមត្រូវ ជាតិពុលអាចកកកុញនៅក្នុងខ្លួនរបស់អ្នក។ ជាតិពុលដែលកកកុញច្រើន អាចនាំឱ្យអ្នកមានអារម្មណ៍អស់កម្លាំងជាប់ៗ គ្នា ជាលក្ខខណ្ឌកំណត់ដោយការថយចុះការផលិតចំនួនកោសិកាឈាមក្រហម ឬការថយចុះនៃអេម៉ូក្លូប៊ីនផងដែរ។
២. រាងហើមៗ៖ តម្រងនោមដែលមានសុខភាពល្អ ជួយរក្សាតុល្យភាពសារធាតុរាវ និងអេឡិចត្រូលីតនៅក្នុងខ្លួនរបស់អ្នកបានល្អ។ ពេលក្រលៀនរបស់អ្នកមិនដំណើរការល្អទេ វាធ្វើឱ្យក្នុងរាងកាយអ្នកមានជាតិអំបិលច្រើន មិនអាចកម្ចាត់ចេញមកខាងក្រៅ ហើយវាបណ្តាលឱ្យមានការហើម ជាពិសេសនៅតំបន់ដៃ ជើង និងកជើងជាដើម។
៣. សម្ពាធឈាមខ្ពស់៖ តម្រងនោមដើរតួនាទីយ៉ាងសំខាន់ក្នុងការគ្រប់គ្រងបរិមាណឈាម និងបញ្ចេញអង់ស៊ីម Renin ដើម្បីគ្រប់គ្រងកម្រិតសម្ពាធឈាម។ នៅពេលដែលតម្រងនោមរបស់អ្នកដំណើរការមិនបានត្រឹមត្រូវទេ វាអាចនាំឱ្យមានសម្ពាធឈាមកើនឡើងខ្ពស់ ឬលើសឈាម។ សម្ពាធឈាមខ្ពស់អាចបំផ្លាញតម្រងនោមរបស់អ្នកដែរ។
៤. ឈឺខ្នង៖ ជំងឺខ្សោយក្រលៀនអាចបណ្តាលឱ្យអ្នករាងឈឺខ្នងដែលជាធម្មតាស្ថិតនៅជ្រៅនិងស្ថិតនៅខាងក្រោមនៃឆ្អឹងខ្នង។ ហើយវាអាចត្រូវបានអ្នកដឹងនៅផ្នែកខាងមុខនៃតំបន់ក្រលៀនរឬត្រគាកជាដើមផងដែរ។ សម្រាប់ការឈឺខ្នងនេះ អាចបណ្តាលមកពីក្រលៀនចុះខ្សោយ ហើយវានឹងធ្វើឱ្យអ្នកកើតជំងឺតម្រង់នោមឬក្រលៀនហ្នឹងឯង៕
អត្ថបទដោយ៖ ទ្រ សុភាព
សៀវភៅ "លំហូរចិត្ត" លោកអ្នកអាចកក់មុន មានតម្លៃបញ្ចុះពិសេសតាម https://t.me/hangchhengH24
