ជំងឺទឹកនោមផ្អែមសព្វថ្ងៃកំពុងកើនឡើងខ្លាំងដោយសារតែមនុស្សភាគច្រើនញ៉ាំរបបអាហារខុស។ ក្នុងនោះដែរ អង្គការសុខភាពពិភពលោក (WHO) បាននិយាយថា អត្រាជំងឺទឹកនោមផ្អែមជាសាកលក្នុងចំណោមមនុស្សពេញវ័យដែលមានអាយុលើសពី១៨ ឆ្នាំបានកើនឡើងពី ៤.៧% ដល់ ៨.៥% ក្នុងឆ្នាំ ២០១៤។ វាមិនបញ្ចប់ត្រឹមនេះទេ ព្រោះ WHO ក៏បាននិយាយផងដែរថាជំងឺទឹកនោមផ្អែម អាចជាមូលហេតុទី៧នៃការធ្វើឱ្យមនុស្សស្លាប់ច្រើននៅឆ្នាំ ២០៣០។

ជាការពិតណាស់ យោងតាមការចុះផ្សាយនៅលើគេហទំព័រ scitechdaily វេជ្ជបណ្ឌិត Kang Chen បាននិយាយថា របបអាហារគឺជាកត្តាសំខាន់បំផុតដែលមនុស្សគ្រប់រូបត្រូវយកចិត្តទុកដាក់ញ៉ាំឱ្យបានត្រឹមត្រូវ។ ជាពិសេសសម្រាប់អ្នកដែលមានទម្លាប់ចូលចិត្តញ៉ាំផ្អែម ញ៉ាំខ្លាញ់ មិនសូវហាត់ប្រាណ នេះសុទ្ធតែជាសញ្ញាបំផ្លាញសុខភាពនាំអ្នកទៅរកជំងឺទឹកនោមផ្អែម។

វេជ្ជបណ្ឌិតបានបន្តថា ដំណោះស្រាយសម្រាប់ អ្នកដែលចូលចិត្តញ៉ាំផ្លែ ញ៉ាំសាច់ច្រើន ខ្លាញ់ច្រើន ផឹកគ្រឿងកំប៉ុងជាប្រចាំ មិនសូវហាត់ប្រាណ អ្នកត្រូវបង្កើតទម្លាប់ញ៉ាំប្រភេទបន្លែពណ៌ស្វាយឱ្យបានរាល់ថ្ងៃ។ តាមរយៈការសិក្សាថ្មីបានរកឃើញថា ប្រភេទបន្លែពណ៌ស្វាយមានផ្ទុកសារធាតុ anthocyanins ដែលសារធាតុនេះមាននាទីក្នុងការរំលាយជាតិស្ករដែលលើសនៅក្នុងឈាមបញ្ចេញមកតាមការបន្ទោរបង់ និងតាមទឹកនោម។ បន្លែពណ៌ស្វាយទាំងនោះមានដូចជា៖

១. ដំឡូងពណ៌ស្វាយ៖ គេបានរកឃើញថានៅក្នុងដំឡូងពណ៌១០០ក្រាម មានផ្ទុកសារធាតុ anthocyanins ប្រឆាំងការរលាក និងស្រូបជាតិស្ករ រហូតដល់ទៅ ៥៧ មីលីក្រាម។ គេណែនាំឱ្យញ៉ាំដំឡូងពណ៌ស្វាយ១ម៉ើម ៣០០ក្រាម នៅពេលព្រឹកជារៀងរាល់ថ្ងៃ ដើម្បីស្រូបជាតិស្ករលើសឱ្យអស់ពីក្នុងឈាម។

២. ការ៉ុតពណ៌ស្វាយ៖ ផ្ទុកសារធាតុ anthocyanins ប្រឆាំងជាមួយជំងឺទឹកនោមផ្អែមប្រភេទទី២ ញ៉ាំរាល់ថ្ងៃជួយស្រូបជាតិស្ករលើសនៅក្នុងឈាម សម្រួលប្រព័ន្ធរំលាយអាហារឱ្យដំណើរការបានល្អ។ របៀបញ៉ាំ អ្នកអាចញ៉ាំស្រស់១ថ្ងៃ ១ទៅ៣ម៉ើម ឬអាចយកទៅអាំងដោយផ្សំគ្រឿងជាមួយប្រេងអូលីវ និងល្ងរខ្មៅ អាំងរយៈពេល២៥នាទី រួចសឹមញ៉ាំ។

៣. ស្ពៃក្តោបពណ៌ស្វាយ៖ ការសិក្សាបានរកឃើញថា ការញ៉ាំស្ពែក្តោបពណ៌ស្វាយរាល់ថ្ងៃក្នុងបរិមាណ៩០ក្រាម ទៅ១០០ក្រាម គឺជួយកាត់ជាតិស្ករលើសក្នុងឈាមបានយ៉ាងល្អ ជំនួយក្រពះ ពោះវៀន ធ្វើឱ្យប្រព័ន្ធរំលាយអាហារដំណើរការបានល្អ។ ស្ពៃក្តោមពណ៌ស្វាយអ្នកអាចយកទៅញ៉ាំធ្វើជាសាឡាដ ញ៉ាំជាមួយប្រេងអូលីង ទឹកម៉ាយូណែស ល្ងរខ្មៅ ឬចម្អឹនជាអាហារផ្សេងៗទៅតាមចំនូលចិត្ត។

៤. ខាត់ណាពណ៌ស្វាយ៖ បើប្រៀបធៀបជាមួយខាត់ណាពណ៌ស និងពណ៌ខៀវ ខាត់ណាពណ៌ស្វាយគឺមានផ្ទុកសារធាតុជំនួយដល់សុខភាពច្រើនជាង។ ដូច្នេះប្រសិនជាទម្លាប់ប្រចាំថ្ងៃរបស់អ្នកចូលចិត្តញ៉ាំខាត់ណាស ឬខាត់ណាខៀវ គួរផ្លាស់ប្តូរមកញ៉ាំខាត់ណាពណ៌ស្វាយវិញម្តង គឺវាជួយកាត់ជាតិស្ករដែលលើសនៅក្នុងឈាម ល្អបំផុតសម្រាប់អ្នកដែលចូលចិត្តញ៉ាំផ្អែម ញ៉ាំសាច់ច្រើនជាប្រចាំ។ ខាត់ណាពណ៌ស្វាយ អ្នកអាចយកវាទៅចម្អឹនជាម្ហូបគ្រប់មុខបានដូចខាត់ណាសនិងខាត់ណាខៀវដែរ។

សរុបជារួមមកវិញ បន្លែពណ៌ស្វាយទាំង៤មុខខាងលើគឺមានគុណប្រយោជន៍ខ្លាំងណាស់ សម្រាប់អ្នកជំងឺទឹកនោមផ្អែម និងអ្នកដែលចង់ការពារខ្លួនពីជំងឺទឹកនោមផ្អែម។ ការញ៉ាំអាហារឱ្យបានត្រឹមត្រូវ និងការការពារខ្លួនទុកមុនជាជម្រើសដ៏ល្អបំផុត ពីព្រោះយើងមិនដឹងទេថាក្នុងរាងកាយរបស់យើងរាល់ថ្ងៃលើសជាតិស្ករឬក៏អត់ដូច្នេះគួរញ៉ាំបង្ការទុកមុនឱ្យហើយ៕

អត្ថបទដោយ៖ មឿន គន្ធា