លាបSkincare មិនបានផលត្រូវអត់? លាបយ៉ាថម៉េចក៏មិនស្អាតត្រូវអត់? ថ្ងៃនេះសូមលើកយកបញ្ហា៣ដែលប្រៀបដូចជាមេរោគចាំបំផ្លាញស្បែកអ្នកទាំងអស់គ្នារាល់ថ្ងៃ។ ខ្ញុំសុំប្រៀបវាទៅនឹងមេរោគចុះ ព្រោះបើមិនកម្ចាត់វាចេញទេ ស្បែក សម្រស់របស់អ្នកទាំងអស់គ្នា ពិតជាគ្មានថ្ងៃស្អាតនោះឡើយ។ ប្រសិនបើអ្នកច្បាស់ថា បានជ្រើសរើសផលិតផលមកប្រើបានត្រឹមត្រូវហើយ ប៉ុន្តែនៅតែមិនទទួលបានប្រសិទ្ធភាពអ្វីសោះ ចូរសង្កេតមើលខ្លួនឯងឡើងវិញ ថាអាចមានបញ្ហាដូចខាងក្រោមនេះឬអត់?
១ បញ្ហាផ្លូវចិត្ត ៖ ប្រើផលិតផលតែមួយមុខ មិនអាចធ្វើឱ្យស្បែកអ្នកទាំងអស់គ្នាស្អាតបានទេ បើអ្នកទាំងអស់គ្នាមានផ្លូវចិត្តមិនល្អ។ ព្រោះនៅពេលដែលផ្លូវចិត្តរបស់យើងមិនល្អ វានឹងនាំយើងធ្វើអីដែលងាយៗ ស្រួលៗ ខ្ជិលច្រើន គិតច្រើន គិតអវិជ្ជមានច្រើន គេងមិនលក់ ប៉ះពាល់ដល់ការប្រែប្រួលអរម៉ូន អាចនឹងស្ដែងចេញជាមុន ស្បែកមិនស្រស់ថ្លា និងបញ្ហាផ្សេងៗទៀត...។ បើឬសខាងក្នុងស្អុយ រលួយ មិនល្អហើយ តើឱ្យដើម ស្លឹកខាងក្រៅល្អតាមរបៀបណា។ ហេតុនេះចូលស្វែងរកដំណោះស្រាយបញ្ហាផ្លូវចិត្តជាមុន។
២ ដាច់យប់៖ ដាច់យប់មានមូលហេតុ២ មូលហេតុទី១មិនព្រមគេង មូលហេតុទី២មានបញ្ហាធ្វើឱ្យគេងមិនលក់។ ប្រសិនបើអ្នកទាំងអស់គ្នានៅក្នុងលក្ខខណ្ឌទី១ ដាច់យប់ដោយសារមិនចង់គេង ឆាប់កែទម្លាប់មិនល្អនេះចេញទៅ ពេលវ័យនៅក្មេងៗមិនជាអ្វីទេ ប៉ុន្តែបើអាយុកាន់តែច្រើនស្បែកក៏មិនស្អាត ចាស់លឿន ហើយងាកឈឺៗទៀត ដោយសារភាពសាំខ្សោយ។ បើដាច់យប់ដោយសារបញ្ហាគេងមិនល្អ អាចមកពីមេរោគទី១ដែល គឺបញ្ហាផ្លូវចិត្តរបស់យើង ព្យាយាម ហាត់ប្រាណ សមាធិ អានសៀវភៅ ឈប់ចុចទូរស័ព្ទមុនគេងឱ្យបាន២ទៅ៣ម៉ោង រកវិធីផ្សេងៗទៀតដើម្បីឱ្យខ្លួនឯងគេងលក់ឡើងវិញ។
៣ អាហារដែលអ្នកញ៉ាំ៖ Skincare ថ្លៃយ៉ាងណាក៏ទប់មិនជាប់ដែរ បើយើងញ៉ាំរបស់មិនល្អច្រើនពេក។ អាហារដែលប៉ះពាល់ស្បែក ធ្វើឱ្យស្បែកមិនស្អាត ឡើងមុនមិនឈប់មានអីខ្លះ ជាតិស្ករ ជាតិប្រៃ អាហារកែច្នៃ ចៀនបំពង របស់ផ្អាប់ ផឹកទឹកតិចទេ មិនសូវចេះញ៉ាំបន្លែអីទេ ញ៉ាំតែក្រៀមក្រោះៗ ទាំងអស់នឹងហើយ ដែលបំផ្លាញប្រសិទ្ធភាពរបស់Skincareយើង។
សរុបមកវិញ មេរោគ៣នេះ បើស្ដាប់ទៅដូចតែមួយទេ បើយើងបំបាត់ទី១ ដោះស្រាយបញ្ហាផ្លូវចិត្តយើងបាន ទី២ ទី៣ សឹងតែថាបាត់អូតូដែរហើយ។ ហេតុនបើចង់ស្អាត ក្រៅពីប្រឹងលាបផលិតផល កុំភ្លេចបំបាត់មេរោគទាំង៣នេះផង៕
អត្ថបទដោយ៖ សេងហុង-Senghong