បងប្អូនណាខ្លះ នៅចាំរឿងជីវិតនារីនូយ៉ា ជឿថាតាំងពីជំនាន់មុន មកលូវអីលូវមានហ្វេនតួឯកស្រីមិនតិចទេ វ័យកាន់តែកៀក៥០ឆ្នាំហើយ តែសម្រស់តួឯកស្រីល្បីប្រចាំសិង្ហបុរីរូបនេះនៅតែស្រស់ស្អាត សឹងតែថាមើលទៅក្មេងជាងមុនទៀត ខាងក្រោមនេះដឹងពីគន្លឹះថែសម្រស់និងរបៀបតុបតែងខ្លួនឱ្យមានភាពទាក់ទាញរបស់គាត់ទាំងអស់គ្នា។
Jeanette Aw តួសម្ដែងស្រីល្បីម្នាក់ ជើងចាស់តែប្រជាប្រិយភាពនៅតែខ្លាំង មានអ្នកគាំទ្រជុំវិញពិភពលោក។ ឆ្នាំនេះគាត់មានវ័យ ៤៥ ឆ្នាំហើយ តែបើយករូបពីមុន មកប្រៀបនឹងអីលូវមិនត្រឹមតែមិនឃើញចាស់ទេ បែរជាឃើញកាន់តែស្អាតជាងមុនទៀត ស្បែកក៏នៅតែស្អាត រាងក៏នៅតែអេម។
គន្លឹះថែសម្រស់របស់គាត់គួរឱ្យទាក់ទាញមែនទែន គាត់ធ្លាប់បានចែករំលែកថាសម្រាប់គាត់ផាត់មុខកាន់តែតិច កាន់តែល្អ ហើយគាត់មិនប្រើFundation ឬម្សៅទ្រនាប់ទេ ជាច្រើនឆ្នាំមកហើយ លើកលែងតែចាំបាច់ណាស់ ប៉ុន្តែជាទូទៅសូម្បីតែពេលគាត់ថតរឿងក៏គាត់មិនប្រើម្សៅទ្រនាប់ដែរ គាត់បាននិយាយថា ពេលដែលគាត់មិនប្រើម្សៅទ្រនាប់ គាត់សង្កេតឃើញថាធ្វើឱ្យស្បែករបស់គាត់មានសុខភាពល្អជាងមុន ហើយមិនស្ទះរន្ធរោមទេ។ សម្រាប់គាត់ផ្ដោតសំខាន់លើស្អាតបែបធម្មជាតិជាង ការផាត់មុខជាជម្រើសរបស់យើង មិនមែនជាការបិទបាំងឬផ្លាស់ប្តូរសម្រស់យើងទេ គួរតែជាការបន្ថែមភាពទាក់ទាញឱ្យខ្លួនឯង។ ចឹងហើយបានជាយើងឃើញថា ការផាត់មុខរបស់គាត់គឺស្ដើងៗ ធម្មជាតិ គ្មានMake up ក្រាស់ទេ ដោយសារគាត់ភាគច្រើនលាបតែឡេផ្ដល់សំណើម និងឡេការពារកម្ដៅថ្ងៃតែប៉ុណ្ណោះ។
ហេតុនេះអ្វីដែលគាត់ឱ្យអាទិភាពបំផុតគឺការថែរក្សាស្បែកឱ្យស្អាត របៀបដែលគាត់ថែស្បែកគឺផ្ដោតលើធ្វើម៉េច លាងស្បែកមុខឱ្យស្អាត ផ្ដល់ជាតិសំណើមឱ្យស្បែកគ្រាន់គ្រាន់តែការប្រើគ្រីមឬសេរ៉ូមផ្ដល់សំណើម និងមិនអាចអត់បានគឺឡេការពារកម្ដៅថ្ងៃ។ បន្ថែមពីនោះគាត់ក៏ចូលចិត្តបិទម៉ាសសន្លឹកប្រភេទផ្ដល់សំណើម និងតែងតែប្រើម្រាមដៃម៉ាស្សាស្បែកមុខជាប្រចាំ ឆ្លៀតពេលហាត់ប្រាណ និងញ៉ាំទឹកគឺសំខាន់បំផុត។
គន្លឹះសំខាន់មួយទៀត នោះគឺសម្រាប់គាត់ភ្នែករបស់គាត់គឺចំណុចទាក់ទាញបំផុត ហេតុនេះការថែរក្សាកុំឱ្យភ្នែកមានស្នាមជ្រួញច្រើន ដកខ្មៅច្រើនគឺជារឿងចាំបាច់ ត្រង់ចំណុចនេះគឺពិតមែន កាលណាដែលភ្នែករបស់យើងស្លក់គឺនឹងឃើញថាចាស់ជាងវ័យតែម្ដង។
គន្លឹះតុបតែងខ្លួនឱ្យមានភាពទាក់ទាញរបស់គាត់ Jeanette គាត់ចូលចិត្តពណ៌បែបស្រាល សូម្បីតែក្រែមរបស់គាត់ភាគច្រើន គឺមិនងាយលាបពណ៌ដិតទេ អាយុគាត់ច្រើនមែនតែគាត់ចូលចិត្តប្តូរស្ទាយម៉ូសក់ និងប្តូរពណ៌សក់ច្រើនទៀត ចឹងហើយសក់គាត់ច្រើនម៉ូដណាស់ ម្ដងវែង ម្ដងខ្លី ម្ដងត្រង់ ម្ដងរួញ លើកចង ម្ដងទម្លាក់ ដោយសារតែម៉ូដសក់គឺជាផ្នែកសំខាន់មួយនៃការលើកសម្រស់ឱ្យមើលទៅក្មេងជាងវ័យ។ គន្លឹះសំខាន់មួយទៀតរបស់គាត់គឺធ្វើម៉េចឱ្យក្លិនខ្លួនក្រអូបជាប់ ធ្វើឱ្យខ្លួនឯងមានអារម្មន៍ថាស្រស់ស្រាយ និងបង្កើនភាពទាក់ទាញទៀត។
សារដ៏ន័យដែលគាត់ផ្ដាំទៅមនុស្សគ្រប់គ្នាគឺ សម្រស់ជាភាពជឿជាក់ ហើយភាពជឿជាក់នោះគឺការស្គាល់ពីចំណុចពិសេសរបស់ខ្លួនឯង ហើយរឹងមាំពីខាងក្នុង។