បច្ចុប្បន្ន បញ្ហាគេងស្រម៉ុក ត្រូវបានគេរាប់បញ្ជូលជាជំងឺថ្មីមួយដែលទើបតែរកឃើញក្នុងមួយរយៈពេលចុងក្រោយនេះប៉ុណ្ណោះ បញ្ហាស្រម៉ុកនេះត្រូវបានគេឱ្យឈ្មោះពេញថា Obstructive sleep apnea (OSA) ដែលជាទូទៅកើតមានឡើងភាគច្រើនលើមនុស្សប្រុស វ័យចាប់ពី៤០ឆ្នាំឡើងទៅ និងមាន១ចំនួនទៀតផងដែរកើតមានទៅលើមនុស្សពេញវ័យក្រោមអាយុ៤០ឆ្នាំ។​

ផ្អែកទៅតាមការចែករំលែករបស់វេជ្ជបណ្ឌិត Somprasong Liamsombut ឯកទេសសួត ជំងឺទូទៅ និងផ្នែកបញ្ហាដំណេក (Sleep Medicine) បច្ចុប្បន្នកំពុងបម្រើការនៅមន្ទីរពេទ្យរ៉ូយ៉ាល់ភ្នំពេញ បានពន្យល់ឱ្យដឹងដែរថា មូលហេតុដែលបង្កឱ្យមានបញ្ហាស្រម៉ុក ភាគច្រើនបង្កមកពីភាពធាត់។ ពេលណាដែលមនុស្សម្នាក់មានបញ្ហាធាត់ អាចនឹងធ្វើឱ្យខាងក្នុងបំពង់កមានភាពតូចចង្អៀត ធ្វើឱ្យវាមានការរាំងខ្ទប់ទៅលើបំពង់ខ្យល់ ប្រព័ន្ធខ្យល់ដង្ហើមមិនសូវល្អ បង្កឱ្យមានបញ្ហាស្រម៉ុកនាអំឡុងពេលគេង។ ជាមួយគ្នានេះ ចំពោះបុរសដែលមានសរីរាង្គកាយដែលមានលក្ខណៈមិនប្រក្រតីណាមួយចំនួនទៅលើប្រព័ន្ធដង្ហើមដូចជា លលាដ៍ក្បាលតូច ចង្ការតូច ថ្គាមតូច ក៏ត្រូវបានអ្នកជំនាញរកឃើញថា មានបញ្ហាប្រឈមនឹងការកើតបញ្ហាស្រម៉ុកនេះផងដែរ។

ជំងឺស្រម៉ុក (OSA) ជាទូទៅគេឃើញអ្នកជំងឺមានសម្លេងស្រម៉ុកអំឡុងពេលគេង អាចស្រម៉ុកតិច ឬស្រម៉ុកខ្លាំងរហូតរំខានដល់អ្នកគេងក្បែរខ្លួន។ អ្នកមានបញ្ហាស្រម៉ុកនេះភាគច្រើនទទួលរងនូវការភ្ញាក់ដឹងខ្លួនច្រើនដងក្នុង១យប់ៗ ពេលខ្លះគាត់មានការស្ទះដង្ហើម ពេលខ្លះមានការឈប់ដង្ហើមក៏មាន ហើយអ្នកជំងឺក៏អាចកើតមានសញ្ញាមកបន្ថែមជាមួយនឹងការកន្ត្រាក់ ឬដង្ហើមឭឃឹកៗ ធ្វើឱ្យគាត់ភ្ញាក់ដឹងខ្លួនភ្លាមៗ...ជាដើម ដោយបញ្ហានេះ អាចធ្វើឱ្យអ្នកដែលគេងនៅក្បែរគាត់ខ្លាច។ អ្នកមានវិបត្តិគេងស្រម៉ុកភាគច្រើន មានអារម្មណ៍ងងុយគេង ឬអស់កម្លាំងខ្លាំងនៅពេលថ្ងៃ ដែលនេះ​អាច​ជា​សញ្ញា​មួយ​បង្ហាញ​ថា​ គុណភាព​ដំណេក​មិនល្អទេ ទោះបីគាត់គេងគ្រប់ម៉ោងដូចគេងពិតមែន ប៉ុន្តែគាត់មានវិបត្តិអំឡុងពេលគេង។ 

បន្ថែមជាមួយគ្នានេះ វេជ្ជបណ្ឌិត Somprasong ក៏បានលើកឡើងថែមឱ្យដឹងដែរថា ក្នុងលក្ខខណ្ឌអ្នកមានបញ្ហាស្រម៉ុក មិនព្រមទៅទទួលយកការព្យាបាលឱ្យបានត្រឹមត្រូវ ឬនៅតែបន្តទុកវាតទៅមុខទៀត អ្នកជំនាញ​ក៏អាចរកឃើញផលប៉ះពាល់បន្ថែមដែរថា អ្នកជំងឺអាចនឹងប្រឈមមុខជាមួយនឹងការធ្លាក់ខ្សោយមុខងាររាងកាយជាប្រចាំ អាចប្រឈមមុខនឹងការកើតនូវជំងឺសរសៃឈាមបេះដូង ជំងឺលើសឈាម ទឹកនោមផ្អែម ជំងឺដាច់សរសៃឈាមខួរក្បាល និងរោគគាំងបេះដូងផងដែរ៕

អត្ថបទដោយ៖ ប៉ាវ ភក្តី (Nuk)