តើស្រ្តីមានផ្ទៃពោះគួរញុំាទុរេនទេ? ញុំាហើយប៉ះពាល់ដល់កូនក្នុងផ្ទៃឬអត់? ជាការពិតណាស់ យោងតាមរយៈការចែករំលែករបស់វេជ្ជបណ្ឌិត ប៉ាត់ សុភ័ក្ក្រា ឯកទេសរោគកុមារ និងទារកនៅមជ្ឍមណ្ឌលជាតិ គាំពាមាតានិងទារក មានបទពិសោធន៍លើសពី៧ឆ្នាំ បានធ្វើកិច្ចសម្ភាសន៍ផ្ទាល់ជាមួយក្រុមការងារចាបបៃតង ទាក់ទងនឹង ប្រធានបទ១តើស្រ្តីមានផ្ទៃពោះអាចញុំាទុរេនបានឬអត់?
ផ្សារភ្ជាប់ជាមួយខ្លឹមសារនេះដែរ លោកវេជ្ជបណ្ឌិត បានធ្វើការចែករំលែកឱ្យបានដឹងផងដែរថា នៅពេលពពោះ ស្រ្តីចង់ញុំាទុរេនអាចញុំាបាននៅអំឡុងត្រីមាសទី១និងត្រីមាសទី២ តែបើចូលដល់ត្រីមាសទី៣ហើយ ត្រូវប្រយ័ត្នពេលញុំាទុរេន ព្រោះត្រីមាសទី៣នេះ ទារកក្នុងផ្ទៃកំពុងចាប់ផ្ដើមលូតលាស់ខ្លាំងជាងត្រីមាស១និងទី២ ហើយស្រ្តីពពោះក៏ងាយនឹងប្រឈមកើតជំងឺទឹកនោមផ្អែមប្រភេទទី២មកដូចគ្នា ព្រោះក្នុងទុរេនមានជាតិស្ករខ្ពស់។ ចំពោះចំនួនដែលអាចញុំាបានមិនបង្កគ្រោះថ្នាក់វិញ វេជ្ជបណ្ឌិតណែនាំឱ្យញុំាបានក្នុងបរិមាណសមស្រប កុំញុំាលើសកំណត់ ដូចជា ១គីឡូទុរេនគឺគ្រោះថ្នាក់ហើយ។ ដូច្នេះស្រ្តីអាចញុំាបាន១គ្រាប់ទុរេនតែកុំធំពេក ព្រោះទុរេនមានច្រើនប្រភេទ អាចនិងមានទំហំគ្រាប់ និងរសជាតិខុសគ្នាផងដែរ។លោកវេជ្ជបណ្ឌិត បានណែនាំស្រ្តីគូរតែញុំាធូរ៉េន ដែលមិនសូវទុំជោខ្លាំង អាចញុំាប្រភេទសាច់នៅរឹងជ្រប់ៗទុរេនប្រភេទនេះ អាចនឹងមិនសូវសម្បូរជាតិស្ករច្រើន ញុំាទៅមិនធ្វើឱ្យស្រ្តីលើសជាតិស្ករ។
តួយ៉ាងលោកវេជ្ជបណ្ឌិតបាន ចែករំលែកបន្ដថា ស្រ្តីការពារខ្លួន កុំឱ្យកើតជំងឺទឹកនោមផ្អែមគឺសំខាន់ខ្លាំងណាស់ដូច្នេះបើញុំាទុរេនត្រូវញុំាកុំឱ្យលើស ព្រោះប្រសិនណាស្រ្តីមានជំងឺទឹកនោមផ្អែមឡើងមក បានបង្កជាផលប៉ះពាល់ដល់ទារកនៅក្នុងផ្ទៃ នាំឱ្យទារកឆាប់រីកធំ ឡើងគីឡូ។ ករណីកូនធំនេះ ប្រសិនណាសម្រាលធម្មជាតិក៏ពិបាកសម្រាប់ស្រ្តីដូចគ្នា។ មួយវិញទៀតប្រសិនណាសម្រាលដោយវះកាត់ កូនចេញមកអាចមានបញ្ហា ចុះជាតិស្ករ( កាលណាស្រ្តីមានផ្ទៃពោះមានជំងឺទឹកនោមផ្អែម ជាតិស្ករនឹងឡើងរហូត តែពេលទារកកើតចេញមកត្រូវប្រឈមបញ្ហាចុះជាតិស្ករវិញ)។ មួយវិញទៀតទារកដែលកើតមកអាចសន្លប់ កូនហត់ កូនបាត់បង់ស្មារតីទាំងអស់នេះសុទ្ធសឹងជាកត្តាប្រឈមគ្រោះថ្នាក់ខ្លាំងណាស់ ពេលខ្លះស្រ្តីដែលមានផ្ទៃពោះ មានជំងឺទឹកនោមផ្អែម ក៏ប្រឈមមានករណីកូនស្លាប់ក្នុងផ្ទៃដូចគ្នា។
សរុបមកវិញស្រ្តីមានផ្ទៃពោះអាចញុំាទុរេនបាន ក្នុងពេលពពោះត្រីមាសទី១និងទី២ តែចូលដល់ត្រីមាសទី៣ត្រូវប្រយ័ត្នក្នុងការញុំាព្រោះងាយប្រឈមកើតជំងឺទឹកនោមផ្អែមប្រភេទទី២ បង្កគ្រោះថ្នាក់ដល់ខ្លួនឯងនិងកូនក្នុងផ្ទៃ។ ចំពោះបរិមាណគ្រូពេទ្យណែនាំឱ្យញុំាទុរេនគឺ១គ្រាប់តែ១គ្រាប់តូចបានហើយកុំញុំាច្រើនពេក ចំពោះប្រភេទទុរេនវិញ កុំញុំាសាច់ទុំជោរគួរញុំាប្រភេទសាច់ជ្រប់ៗល្អជាង៕
អត្ថបទដោយ៖ ប៉ែត ធីតា