នៅសុខៗស្រាប់តែឈឺក្បាលដោយមិនដឹងមូលហេតុ ហើយនៅពេលឈឺក្បាលម្តងៗប្រើប្រាស់ថ្នាំអ្វីក៏មិនបាត់ឈឺដែរ។ តើអ្នកធ្លាប់ជួបបញ្ហាឈឺក្បាលបែបនេះទេ? តើការឈឺក្បាលនេះបណ្ដាលមកពីមូលហេតុអ្វីទៅ?

ជាទូទៅអាការឈឺក្បាលនេះ ហៅថាជំងឺឈឺក្បាលប្រកាំង(Migraine Headache) គឺឈឺក្បាលដោយមិនមានហេតុផល ឈឺក្បាលដោយមិនមានមុខសញ្ញា ឈឺក្បាលដែលយើងមិនដឹងថា កើតមកពីបញ្ហាអ្វី ក៏ប៉ុន្តែភាគច្រើនជំងឺនេះកើតកើតទៅលើនារីៗ ដែលភាគច្រើនកើតនៅលើបរិវេលាដែលគាត់រស់នៅជុំវិញ ឬកើតចេញពីពូជ ហើយនារីដែលកើតជំងឺនេះ តែងតែមានបញ្ហាផ្សេងៗពាក់ព័ន្ធទៅនឹងជំងឺផ្លូវចិត្តផងដែរ។

នៅក្នុងនោះដែរ លោកវេជ្ជបណ្ឌិត គួច ម៉េងលី បានមានប្រសាសន៍ថា ជាធម្មតាឱ្យតែគាត់មានបញ្ហា ឈឺក្បាលប្រកាំង ជំងឺនេះអាចធ្វើឱ្យយើងមានជំងឺផ្លូវចិត្តដូចជា ភ័យស្លន់ស្លោ ពិបាកចិត្ត មានបញ្ហា សតិអារម្មណ៍ផ្សេងៗទៀត ដែលជំងឺទាំងអស់នឹងធ្វើឱ្យយើងងាយនឹងមានរោគសញ្ញានៃជំងឺឈឺក្បាលប្រកាំងខ្លាំងជាងគេ។

ជាក់ស្ដែង លោកវេជ្ជបណ្ឌិត គួច ម៉េងលី បានលើកឡើងបន្ថែមថា ជាធម្មតាឈឺក្បាលប្រកាំងពេលដែលកើតឡើងរូបយើង ជាពិសេសនារីៗ វាមានសញ្ញាឱ្យយើងដឹងដូចជា ការស្រមើស្រមៃ ការភាំងស្មរតី ដែលវាជាសញ្ញាចាប់ផ្ដើម ហើយជាទូទៅសញ្ញាចាប់ផ្ដើមនេះហើយស្ដែងឱ្យយើងដឹងបានថា កំពុងកើតជំងឺឈឺក្បាលប្រកាំង។

មួយវិញទៀត លោកវេជ្ជបណ្ឌិត គួច ម៉េងលី បានប្រាប់បន្ថែមថា ជំងឺឈឺក្បាលប្រកាំងនេះអាចមានកត្តារួមផ្សំដូចជា កត្តាទី១៖ នៅពេលមានពន្លឺភ្លឺពេក គឺយើងចាប់ផ្ដើមឈឺក្បាល។ កត្តាទី២៖ នៅពេលមានក្លិនប្លែកធ្វើឱ្យយើងចាប់ផ្ដើមឆាប់ឈឺក្បាល។ កត្តាទី៣៖ នៅពេលលឺសំឡេងខ្លាំង ឬប្លែកដឹងតែធ្វើឱ្យយើងឆាប់ឈឺក្បាលដូចគ្នាដែរ។ ដែលកត្តាទាំងប៉ុន្មាននេះសុទ្ធតែជាសញ្ញានៃជំងឺប្រកាំង។

លោកវេជ្ជបណ្ឌិត គួច ម៉េងលី បានបញ្ជាក់បន្ថែមថា ជាទូទៅបុគ្គលដែលមានជំងឺឈឺក្បាលប្រកាំង គឺគាត់មិនចូលចិត្តក្មេងឡូឡាទេ ប៉ុន្តែមិនមែនមានន័យថាគាត់ស្អប់ក្មេងទេ ពីព្រោះថាក្មេងនោះរញ៉ែររញ៉ៃនឹងធ្វើឱ្យគាត់មានជំងឺឈឺក្បាលប្រកាំងនឹងតែម្តង។ លោកវេជ្ជបណ្ឌិត បានបន្ថែមថា ការឈឺក្បាលនេះអាចឈឺពី ៣ឬ៤ម៉ោង ពេលខ្លះអាចដល់ ៣ឬ៤ថ្ងៃ បានបាត់។ ដែលភាគច្រើនចាប់ផ្ដើមពី ជំហៀងក្បាល ដែលមានសភាពឈឺខុសគេ ដែលភាគច្រើនឈឺមួយជំហៀងក្បាល ហើយស្មុគស្មញពេញខ្លួន ដែលអាការទាំងនេះតែងមកជាមួយគ្នា។ ជាក់ស្ដែងនៅពេលដែលឈឺម្តងៗគឺមានអារម្មណ៍ថា ចង់ក្អួតបង្អោរ ពិបាកក្នុងខ្លួនជាដើម។

លោកវេជ្ជបណ្ឌិត គួច ម៉េងលី បាននិយាយបន្ថែមថា​ បច្ចុប្បន្ននេះយើងសង្កេតឃើញថា នៅទូទាំងពិភពលោកមានមនុស្សប្រមាណជា ១៥% ដែលមានជំងឺឈឺក្បាលប្រកាំង ដែលពិតជាគួរឱ្យអាណិតពួកគេណាស់ ពីព្រោះឈឺក្បាលម្តងៗគាត់ពិបាករកថ្នាំញុំា ពីព្រោះថ្នាំធម្មតាៗផឹកមិនជានោះទេ។

ជាចុងក្រោយ លោកវេជ្ជបណ្ឌិត គួច ម៉េងលី បានប្រាប់ថា ប្រសិនបើអ្នកមានជំងឺនេះ សូមអ្នករកកន្លែងណាដែលស្ងាមស្ងាត់ ឬរកកន្លែងស្ងាប់អារម្មណ៍ ឬក៏ប្ដូរបរិយាកាសស្ដាប់ភ្លេច ឬក៏ត្រូវដកថយពីភាពស្មុគស្មញពីភាពឡូឡាទាំងនោះដើម្បីឱ្យធូរចិត្ត។

ចំណាំ៖ មួយវិញទៀតប្រសិនបើគាត់ឈឺខ្លាំងមែនទែន(មិនបាត់សោះ)រហូតដល់ទ្រាំមិនបានអាចឈានដល់ការស្រែកយំ សូមប្រញាប់ទៅពិគ្រោះជាមួយគ្រូពេទ្យ ដើម្បីស្កេនមើលខួរក្បាលរបស់អ្នកជំងឺ ពីព្រោះថាជូនកាលវាអាចមកពីអ្នកមានបញ្ហាមហារីកខួរក្បាល ឬស្ទះសរសៃឈាមក្នុងខួរក្បាល និងក៏មានរោគសញ្ញាផ្សេងៗជាដើម។



អត្ថបទដោយ៖ Daddy_Rath