តើនរណាខ្លះចង់ស្រកគីឡូលឿន? សព្វថ្ងៃនេះ ម្ហូបអាហារសម្បូរបែប សុទ្ធតែឆ្ញាញ់ៗជាហេតុនាំឱ្យមនុស្សញុំាច្រើនរាល់ថ្ងៃ។ តែការញុំាច្រើននេះ​យើងសង្កេតឃើញថាមិនមកពីចំនួនច្រើនតែម្យ៉ាងទេ តែមកពីញុំាប្រភេទអាហារ សម្បូរខ្លាញ់(អាហារចៀន បំពង) សម្បូរកាល់ឡូរីខ្ពស់ សាច់ក្រហម ផលិតផលទឹកដោះគោផ្សេងៗផងដែរ។

ជាមួយគ្នានេះដែរមានរបបអាហារ2ប្រភេទ កំពុងពេញនិយមខ្លាំង សម្រាប់អ្នកសម្រកគីឡូនិងអ្នកមានបំណងចង់សម្រកឱ្យទទួលបានផលដូចចិត្ត៖

របបអាហារទាំង២នោះមានដូចជា៖

១.របបអាហារ(IF)៖ នេះបើយោងតាមរយៈគេហទំព័រ healthline.com គឺជាក្បូនសម្រកគីឡូ ល្បីមួយនៅទូទាំងពិភពលោក ដែលធ្វើការតមអាហារអាហារ១៦ម៉ោង ឬ២៤ម៉ោងរយៈពេល២ដងក្នុង១សប្ដាហ៍។ វិធីក្នុងរបបអាហារនេះមាន2ដូចជា៖

-ក្បូន១៦/៨៖ ក្បូននេះគេអនុវិត្តន៍ដោយកំណត់ម៉ោង ក្នុងការញុំាអាហារប្រចាំថ្ងៃរ 8 ម៉ោង ដូចជាម៉ោង 1-9 យប់។ បន្ទាប់មកអ្នកតមអាហាររយៈពេល 16 ម៉ោងនៅចន្លោះនោះ។ ជាឧទាហរណ៍ប្រសិនបើអ្នកញុំាអាហារម៉ោង៥ល្ងាច ត្រូវតមអាហាររយៈពេល១៦ក្រោយចាំញុំាវិញ តែប្រភេទជាទឹកធម្មតា​អាចញុំាបាន។

-ក្បូន៥:២៖ វិធីនេះមានន័យថា១សប្ដាហ៍មាន៧ថ្ងៃ ៥ថ្ងៃអ្នកអាចញុំាអាហារជាធម្មតា តាមចិត្ត តែ រយៈពេល២ថ្ងៃទៀត អ្នកត្រូវកំណត់ របបអាហារត្រឹមតែ៥០០-៦០០កាឡូរីប៉ុណ្ណោះ គឺ(៥ថ្ងៃញុំា ២ថ្ងៃតម)។

២.របបអាហារបែប(keto)៖ យ៉ាងណាមិញ ដើម្បីជាដំណោះស្រាយក្នុងការសម្រកទម្ងន់ដែលត្រឹមត្រូវសមស្របនឹងរាងកាយ ផ្អែកតាមរយៈកិច្ចសម្ភាសន៍របស់ក្រុមការងារចាបបៃតង ជាមួយលោកគ្រូ លន់ ដារិន អ្នកជំនាញផ្នែកអាហារ Keto បានពន្យល់ប្រាប់ក្រុមការងារចាបបៃតងថា បើចង់សម្រកគីឡូលឿនដូចចិត្ត គឺត្រូវចេះតមអាហារចំនួន៣ប្រភេទ ដោយទី១. អាហារមានជាតិផ្អែម ទី២. អាហារមានជាតិម្សៅ និងទី៣. ប៊ីចេង។

- ចំពោះអាហារផ្អែម ប្រសិនបើនិយាយឱ្យចំក្នុងរូបមន្តអាហារ Keto សូម្បីតែប្រភេទផ្លែឈើមួយចំនួនក៏ត្រូវបានរាប់បញ្ចូលក្នុងលក្ខខណ្ឌហាមប្រាមផងដែរ ដូចជា ផ្លែចេក ឪឡឹក ទុរេន... និងក្រុមទឹកផ្លែឈើស្រស់ ទឹកម្នាស់ ទឹកអំពៅ … និយាយជារួមគឺលើកលែងតែផ្លែឈើ៣មុខប៉ុណ្ណោះ ដែលអ្នកសម្រកគីឡូបែបketoអាចញុំាបានមាន បឺរ ក្រូចឆ្មារ និងផ្លែអូលីវ។

- ចំពោះអាហារមានជាតិម្សៅ មានដូចជា ម្សៅមី ម្សៅដំឡូង បាយស្រូបខ្លាញ់ គុយទាវ ឱ្យតែជាប្រភេទម្សៅអ្វីក៏ដោយ គឺមិនអាចញុំាទេ បើញុំាប្រាកដជាឡើងគីឡូ មិនបានស្រកដូចចិត្តមិនខាន ដូច្នេះត្រូវតែព្យាយាម ដើម្បីបានរាងស្អាតរាងដែលខ្លួនប្រាថ្នា។

- ចំពោះអាហារប្រើប៊ីចេង៖ យើងបានដឹងហើយថា សម្លយើងប្រើប៊ីចេង ដើម្បីទទួលបានរសជាតិឆ្ងាញ់ កាលណាម្ហូបឆ្ងាញ់ គឺបណ្ដាលឱ្យយើងញុំាច្រើន កាលណាញុំាច្រើនប្រាកដជាធាត់មិនខានឡើយ។ មួយវិញទៀត ចំពោះប្រូតេអ៊ីនដែលអ្នកសម្រកគីឡូតាម Keto គឺត្រូវញុំាប្រូតេអ៊ីនតាមគីឡូដោយដកយកខ្លាញ់ចេញ ជាឧទាហរណ៍៖ យើងមានគីឡូ១០០ មានខ្លាញ់៣០គីឡូ គឺត្រូវញុំា៧០ក្រាមប្រូតេអ៊ីនក្នុងមួយថ្ងៃ។

គូសបញ្ជាក់ផងដែរថា របបអាហារទាំង២ក្បូននេះ មិនត្រឹមតែជួយឱ្យអ្នកស្រកគីឡូដូចចិត្តនោះទេ ថែមទាំងផ្ដល់ប្រយោជន៍ល្អ សុខភាពខ្លាំងផងដែរ ដូចជា ការពារជំងឺលើសឈាម ទឹកនោមផ្អែម បេះដូង ការពារជំងឺមហារីក ជំនួយខួរក្បាល និងថែសម្រស់៕

អត្ថបទដោយ៖ ប៉ែត ធីតា