ក្រុមជម្រើសជាតិកម្ពុជាឈុតU22ពិតជាធ្វើបានល្អកាលពីយប់ថ្ងៃទី២៩ ខែមេសា ម្សិលមិញដោយយកឈ្នះប្រទេសទីម័រក្នុងលទ្ធផល៤ទល់នឹង០ ដែលជាការរួមចំណែកយ៉ាងសំខាន់ពីសំណាក់យុវជនឡេង ណូរ៉ា ដែលបានដូរចូលក្នុងតង់ទី២ និងបានបញ្ចូនបាល់ឱ្យកីឡាករ ស រតនា ខ្សែប្រយុទ្ធកណ្តាលស៊ុតបញ្ចូលទីគ្រាប់បាល់ទី៣ឱ្យកម្ពុជា។
បើនិយាយអំពីលទ្ធផលការប្រកួតបើកឆាកដំបូងគឺជាការរួមចំណែកពីក្រុមកីឡាករទាំងអស់គ្នា ទើបកម្ពុជាធ្វើបានល្អ តែចាបបៃតងនឹងនិយាយអំពីខ្សែជីវិតតស៊ូខ្លះៗរបស់កីឡាករឡេង ណូរ៉ា ដែលខ្លួនបានវិវត្តន៍ខ្លួនពី ក្មេង នៅមណ្ឌលកុមារកំព្រាសង្កាត់ភ្នំពេញថ្មី រហូតក្លាយជាជម្រើសជាតិកម្ពុជាដ៏លេចធ្លោម្នាក់ផងដែរ។
បើយោងតាមការចុះផ្សាយកន្លងមករបស់ទទក បានឱ្យដឹងថា ឡេង ណូរ៉ា បាត់បង់ឪពុកជនជាតិហ្គាណា តាំងពីគេអាយុ៦ឆ្នាំ។ យុវជនរូបនេះ ស្ថិតក្នុងបន្ទុកគ្រួសារដែលមានកូន៤នាក់ មុនពេលម្តាយយកទៅដាក់នៅមណ្ឌលកុមារកំព្រាមួយនាសង្កាត់ភ្នំពេញថ្មី។
កាលនៅអង្គការនោះ ណូរ៉ា ទទួលបានការមើលថែ រៀនសូត្រ និងមានឱកាសលេងបាល់នៅតារាងធម្មតា ហើយក៏ទទួលបានការហ្វឹកហាត់ពីសំណាក់គ្រូបង្វឹកម្នាក់អំពីបច្ចេកទេសបាល់ទាត់ ដោយមានការស្រឡាញ់ និងចូលចិត្តធ្វើឱ្យគេអាចយល់ដឹងច្រើន និងវិវត្តន៍ខ្លួនទៅមួយកម្រិតទៀត។
ដោយមើលឃើញពីនិស្ស័យ និងក្តីស្រឡាញ់របស់ខ្លួនឯង យុវជនឡេង ណូរ៉ា បានចូលធ្វើតេស្តហ្វឹកហាត់នៅក្រុមយុវជនរបស់ក្លឹបបាល់ទាត់វិសាខា និងផ្តើមលេងបាល់ទាត់រហូតវិវត្តខ្លួនមកជាប់ក្រុមយុវជន U15 វិសាខា នាឆ្នាំ 2019។
ក្នុងអំឡុងពេលប្រកបអាជីពបាល់ទាត់នេះ យុវជនណូរ៉ា ធ្លាប់បានឈ្នះពានមួយចំនួននៅទីនោះដូចជា ពានជើងឯកវិទ្យាល័យ, Soccer League, ជើងឯកយុវជន FFC, KMH CUP U18 មុនផ្ទេរទៅព្រៃវែង នៅឆ្នាំ២០២១ និងទើបត្រឡប់មកក្រុមធំវិសាខាវិញនៅឆ្នាំ២០២២នេះ និងបន្តលេងនៅក្លឹបវិសាខារហូតដល់ពេលបច្ចុប្បន្ន។
ដោយសារតែសមត្ថភាពកាន់តែល្អ ក្នុងក្រុមជម្រើសជាតិវិញ គេជាប់តាំងពីឈុត U15, U23, U22 និងក្លាយជាកីឡាករក្មេងជាងគេបង្ហាញខ្លួនអោយក្រុមធំក្នុងជំនួបតទល់អ៊ីរ៉ាក់ ប្រចាំវគ្គជម្រុះវើលខាប់។
បច្ចុប្បន្នគេមានវ័យ ១៨ ឆ្នាំក្មេងជាងគេទី២ក្នុងក្រុម U22 បន្ទាប់ពី ស៊ិន សុវណ្ណមករា។ ហើយគេមានឱកាសជាប់ឈុតU22 ដែលមានការដឹកនាំដោយអ្នកចាត់ការទូទៅ ជនជាតិជប៉ុន លោកហុងដា ក្នុងឱកាសព្រឹត្តិការណ៍ស៊ីហ្គេមលើកទី៣២ដែលកម្ពុជាកំពុងធ្វើជាម្ចាស់ផងដែរ។
សូមបញ្ជាក់ថា នៅយប់មិញនេះក្រុមគោព្រៃជម្រើសជាតិកម្ពុជាឈុតU22បានយកឈ្នះគូប្រកួតទីម័រក្នុងលទ្ធផល៤ទល់និង០ ជាការប្រកួតបើកឆាកនៅព្រឹត្តិការណ៍ស៊ីហ្គេមលើកទី៣២ដែលកម្ពុជាបានធ្វើជាម្ចាស់ផ្ទាល់ ធ្វើឱ្យកម្ពុជាឈរនៅកំពូលតារាបណ្តោះអាសន្តនៅពូលAដែលមានឥណ្ឌូនេស៊ីនៅលេខ២។
ប្រែសម្រួលអត្ថបទដោយ៖ម៉ន វុទ្ធា
