បើចិត្តអ្នកស្មុគស្មាញ គ្មានកម្លាំងចិត្តធ្វើការ និងគ្មានក្តីរីករាយទេនោះ នេះជាបញ្ហាតូចនៅពេលឥឡូវនេះ តែវាជាបញ្ហាធំបើអ្នកចេះតែពន្យាពេលយូរនោះ គឺអ្នកនឹងកើតបញ្ហាផ្លូវចិត្ត។ បញ្ហាធំរបស់យុវជននោះគឺបញ្ហាការងារ។ ប៉ុន្តែបើអ្នកគិតរបៀបនេះ ខ្ញុំជឿថា អ្នកនឹងមានអារម្មណ៍រីករាយមិនខានឡើយ។ តាមលោក Andrew Matthews បានលើកឡើងគតិមួយថា បេសកកម្មជីវិតរបស់អ្នក មិនមែនខំប្រឹងរស់ដើម្បីគេចពីបញ្ហានោះទេ តែអ្នកត្រូវខំប្រឹងបែបណាឱ្យជីវិតអ្នកមានក្តីរីករាយ”។ តើអ្នករស់នៅដោយក្តីរីករាយទេ?
តាមលោក Andrew Matthews បានលើកឡើងថា អ្នកជាមនុស្សតែមួយគត់ជាអ្នកជ្រើសរើសពីអត្តចរិតខ្លួនឯង ឱ្យមានក្តីរីករាយគ្រប់ការងារ គឺធ្វើការណាដែលខ្លួនអ្នកស្រឡាញ់ចូលចិត្ត ហើយខំធ្វើវារហូតទទួលបានជោគជ័យ។ ជាពិសេសអ្នកនឹងរកលុយបានច្រើនថែមទៀត។ លោកបានបន្តថា បើអ្នកធ្វើការដែលខ្លួនមិនចូលចិត្តពេលនេះ អ្នកត្រូវតែព្យាយាមវាឱ្យមានលទ្ធផលដែរ។ នេះជាបញ្ហារយៈពេលខ្លី បើអ្នកគិតពីគោលដៅរយៈពេលវែងនោះ។ ហើយពេលនេះជាពេលអ្នកត្រូវរៀបចំផែនការសម្រាប់អនាគត និងសន្សំលុយទុកចំណាយផងដែរ”។
នេះជាគំនិតមួយបង្រៀនអ្នកថា បើអ្នកខំធ្វើការឱ្យគេ មិនអស់ពីសមត្ថភាពទេ អ្នកក៏មិនអាចធ្វើការងារឱ្យខ្លួនក៏គ្មានលទ្ធផលធំដុំដែរ។ ព្រោះអ្វី? អ្នកធ្វើការឱ្យគេ ធ្វើតែមួយជំនាញទេ តែអ្នកធ្វើការឱ្យខ្លួនឯងវិញ អ្នកធ្វើគ្រប់យ៉ាងទាំងគិតពីការចំណាយ ចំណូល គិតពីភ្ញៀវ គិតពីទំនិញ គិតពីសេវាកម្ម និងគ្រប់គ្រងលើបុគ្គល... វាមិនងាយស្រួលទេ។
អ្នកគួរយកផ្នត់គំនិតរបស់លោក Matthews បាននិយាយថា គេផ្តល់ប្រាក់ខែឲ្យអ្នក ដើម្បីធ្វើកិច្ចការណាដែលគេ(ម្ចាស់ក្រុមហ៊ុន)មិនអាចធ្វើបាន ឬពង្រីកទំហំចំនួនការងាររបស់គេ។ អ្នកត្រូវចាំថា ការងារនេះគ្មានបញ្ហាទេ គេក៏មិនជួលអ្នកមិនធ្វើការដែរ។ ដូច្នេះការងាររបស់អ្នក ជាបញ្ហារបស់អ្នកត្រូវរៀនដោះស្រាយ”។ បើអ្នកជួបបញ្ហាហើយ ហើយទៅពឹងថ្នាក់លើឱ្យជួយដោះស្រាយរហូតនោះ អ្នកនឹងគ្មានសមត្ថភាពខ្លាំងទេ គ្រាន់តែជាកូនក្មេងទន់ខ្សោយម្នាក់តែប៉ុណ្ណោះ។
លោកបានបន្ថែមជាចុងក្រោយថា មានហេតុផលមួយដើម្បីអ្នកធ្វើការអ្វីឲ្យអស់ពីសមត្ថភាពគឺពេលអអ្នកប្រឹងឲ្យអស់១០០% អ្នកកាន់តែមានសេចក្តីរីករាយ។ អ្នកនៅចាំទេថា តើមានអារម្មណ៍បែបណាពេលអ្នកកំពុងដើរទៅសាលាជាមួយថ្ងៃដែលអ្នកខំធ្វើកិច្ចការសាលាអស់ពីសមត្ថភាពនោះគឺអ្នកមានអារម្មណ៍រីករាយ និងទំនុកចិត្តលើខ្លួនឯង។ គំនិតមួយនេះវាក៏ដូចគ្នាចំពោះការងារដែរ ពេលអ្នកខំប្រឹង អ្នកនឹងមានក្តីរីករាយមិនខានឡើយ៕ អទ្ថបទដោយ៖ ទ្រ សុភាព