ជំងឺបាក់ស្បាតអាចមកពីការរងការប៉ះទង្គិចផ្លូវចិត្តដែលកើតឡើងក្នុងស្ថានភាពដែលមនុស្សម្នាក់មានអារម្មណ៍ថា រាងកាយ ឬអារម្មណ៍ ស្មារតី ស្ថិតនៅក្រោមការគម្រាមកំហែងដែលប៉ះពាល់ដល់អាយុជីវិតកម្រិតធ្ងន់ធ្ងរ។ អ្នកមានអារម្មណ៍មិនល្អពេលឃើញហេតុការណ៍អាក្រក់ណាមួយ។ ហើយអ្នកខ្លះមិនអាចបំភ្លេចរឿងរ៉ាវរំខានចិត្តទាំងនោះបានទេ វាជារូបភាពដក់ជាប់ក្នុងផ្ទៃចិត្ត។
តាមលោកវេជ្ជបណ្ឌិត សុង ម៉ិញហុង ឯកទេសផ្លូវចិត្តបានប្រាប់ពីជំងឺបាក់ស្បាតកើតឡើងតាមរូបភាពមានដូចជា៖ ការប្រើនូវអំពើហិង្សា (ទាំងការវាយដំផ្ទាល់ ឬប្រើពាក្យសម្តីដោយប្រយោល) គ្រោះមហន្តរាយធម្មជាតិ ការរំលោភបំពានលើរាងកាយ (ផ្លូវភេទ...) គ្រោះថ្នាក់ចរាចរណ៍ធ្ងន់ធ្ងរ ការវាយប្រហារភារវកម្ម ការធ្វើទារុណកម្ម សង្គ្រាម គ្រោះធម្មជាតិ មួយវិញទៀតអាចជា ការបាត់បង់មនុស្សជាទីស្រលាញ់ ក៏ធ្វើឱ្យប៉ះពាល់ដល់បញ្ហាផ្លូវចិត្តធ្ងន់ធ្ងរដែរ។ នៅខាងក្រោមនេះ អ្នកនឹងឃើញមានរោគសញ្ញានៃជំងឺបាក់ស្បាតដែលគួរស្វែងយល់បន្ថែម៖
>>> អ្នកចេះតែគិត ឬនឹកឃើញអំពីហេតុការណ៍នោះនាំឱ្យប៉ះទង្គិចផ្លូវចិត្តច្រើនម្តង
>>> ពេលអ្នកគេងចេះតែសុបិនអាក្រក់អំពីហេតុការណ៍ធ្លាប់ជួបហ្នឹង
>>> មានអារម្មណ៍ក្រៀមក្រំច្រើន មានអារម្មណ៍ឆាប់ខឹង ឆាប់ភ័យខ្លាច ចេះសោកស្តាយ ហើយរន្ធត់
>>> អ្នកមានចេះបន្ទោសខ្លួនឯងឬអ្នកដទៃចំពោះរឿងដែលបានកើតឡើងនោះ
>>> មានអារម្មណ៍ថា ទុក្ខព្រួយនឹងផ្តាច់ទំនាក់ទំនងពីអ្នកខាងក្រៅ
>>> រោគសញ្ញាផ្នែកផ្លូវកាយ៖ ចេះតែញ័រដើមទ្រូង ញ័រដៃជើង អស់កម្លាំងល្ហិតល្ហៃ រាងវិលមុខ ចេះតែធីងធោងរសាប់រសល់ បែកញើសពេញខ្លួន ត្រជាក់ចុងដៃចុងជើង ឈឺក្បាល ចុកចាប់ពេញរាងកាយគ្មានមូលហេតុ និងធ្វើឱ្យអ្នកជំងឺអាចក្អួតចង្អោរ...។ នេះជារោគសញ្ញាដែលអ្នកគួរតែចាប់អារម្មណ៍ហើយរកជំនួយពីគ្រួពេទ្យ ឬមួយពីអ្នកចិត្តសាស្រ្តផងដែរ៕ អត្ថបទដោយ៖ ទ្រ សុភាព