ការរស់នៅគ្មានក្បួនទម្លាប់ទេ នាំឱ្យអ្នកខូចសុខភាព ខូចអនាគត និងជីវិតរបស់អ្នកក៏ស្មុគ។ ពេលហូបអាហារតាមអារម្មណ៍ចេះឃ្លាន ហើយចេះតែហូបរហូតនោះ គ្រាន់តែ ១ឬ២ឆ្នាំ អ្នកនឹងធាត់។ បើអ្នករស់នៅតាមក្បួនជប៉ុនបែបនេះ ខ្ញុំជឿថា ការរស់នៅរបស់អ្នកមានភាពរីករាយទាំងកាយទាំងចិត្តមិនខានឡើយ។ តាមលោកស្រី Shloka Shah ជាអ្នកនិពន្ធនៅគេហទំព័រ Medium បានលើកឡើងពី ៤របៀបឱ្យអ្នករស់នៅមានក្តីសុខទាំងកាយនិងចិត្ត។
លោកស្រីបានយល់ឃើញពីសៀវភៅ Ikigai: The Japanese Secret to a Long and Happy Life ថា បុគ្គលដែលរស់នៅតាមក្តីស្រមៃរបស់ខ្លួន ព្រោះតែគេមានហេតុផលក្រោកពីដំណេកនៅពេលព្រឹកជាប្រចាំនោះឯង។ ពាក្យពីរដែលដកជាប់ក្នុងចិត្តរបស់លោកស្រី គឺពាក្យ Wabi-sabi និង Ichi-go Ichi-e។ វាជាពាក្យសាមញ្ញ តែមានន័យជ្រៅ។
១. ពាក្យថា Wabi-sabi៖ វាជាគំនិតរបស់ជប៉ុនដែលពន្យល់ពីភាពស្រស់ស្អាតកើតចេញភាពមិនល្អឥតខ្ចោះ។
២. ពាក្យថា Ichi-go Ichi-e៖ វាបង្រៀនយើងឱ្យចេះរីករាយក្នុងពេលបច្ចុប្បន្ននេះ។ នេះជាពាក្យឱ្យអ្នកផ្តោតអារម្មណ៍រស់នៅក្នុងបច្ចុប្បន្ន។
៣. ទម្លាប់ញ៉ាំអាហារ ៨០%៖ ពេលអ្នកញ៉ាំឆ្អែតពេក តើអ្នកមានអារម្មណ៍បែបណា? នៅក្នុងប្រទេសជប៉ុនមានពាក្យមួយថា Hara Hachi bu វាមានន័យថា “ចូរបំពេញពោះ ៨០%បានហើយ”។ វាសង្កត់ធ្ងន់ថា មនុស្សយើងម្នាក់ៗ គួរតែឈប់ញ៉ាំនៅពេលមានអារម្មណ៍ថា “ឆ្អែតល្មម” ទើបអ្នកមានអារម្មណ៍ល្អ ហើយមិនងាយធាត់នោះទេ។
៤. ស្វែងរកលំហូរចិត្ត នៅក្នុងអ្វីគ្រប់យ៉ាងដែលអ្នកខំធ្វើ៖ លោកស្រីបានលើកឡើងពីសៀវភៅនេះថា ពេលអ្នករកឃើញ ikigai ឬក្តីស្រមៃរបស់ខ្លួនហើយ អ្នកគួរតែជ្រមុជទាំងស្រុងនៅក្នុងបទពិសោធន៍ការងារដោយមិនគិត និងគ្មានការរំខានអ្វីទាំងអស់។ មានវិធីផ្សេងៗ និងករណីសិក្សាជាច្រើននៅក្នុងសៀវភៅនេះឱ្យអ្នកចេះស្វែងរក”លំហូរ”៕ អត្ថបទដោយ៖ ទ្រ សុភាព