មនុស្សយើងរស់នៅមានអារម្មណ៍តានតឹង ព្រួយបារម្ភ ស្រ្តេស និងអារម្មណ៍ប្រញាប់ប្រញាល់ បញ្ហាផ្លូវអារម្មណ៍បែបនេះ មុនដំបូងជារឿងធម្មតាទេ ប៉ុន្តែរយៈពេលក្រោយមកផ្លូវចិត្តកាន់តែធ្ងន់ក៏ក្លាយជាជំងឺគ្រាំចិត្តដែរ។ អ្នកជំនាញចិត្តសាស្រ្តខាងក្រោមនេះ មានវិធីល្អៗ ធ្វើឱ្យចិត្តលោកអ្នករស់នៅតាមលំហូរចិត្តយ៉ាងរីករាយ និងមានក្តីសុខ៖
បើអ្នកកំពុងតែរស់នៅក្នុងស្ថានភាពអារម្មណ៍តានតឹង និងទុក្ខព្រួយខ្លាំងនោះ មកពីអ្នកធ្វើការងារលើសមត្ថភាព មកពីអ្នកលេងទូរស័ព្ទ មកពីអ្នកមានបញ្ហាច្រើនគលើគ្នា ហើយដើម្បីដោះស្រាយបញ្ហាទាំងអស់នេះ គួរធ្វើបែបណា? តាម លោក Mihaly បាននិពន្ធសៀវភៅ flow នេះ លើកឡើងថា ការរស់នៅឱ្យមានលំហូរចិត្តស្ថិតក្នុងចំណោមមនុស្សគ្រប់វ័យ គ្រប់ភេទ និងគ្រប់វប្បធម៌ទាំងអស់។ ដូចជាអ្នកលេងអុកក៏ឈានដល់អារម្មណ៍លំហូរបានដែរ។ អ្នកជក់អារម្មណ៍អានសៀវភៅ ក៏ឈានដល់លំហូរចិត្តបានដែរ។ ពេលអ្នកដាក់អារម្មណ៍ស្តាប់បទចម្រៀងយ៉ាងពិរោះ ស្លុងអារម្មណ៍ក្នុងបទហ្នឹង ក៏ជាលំហូរចិត្តបានដែរ។ លំហូរចិត្ត នៅពេលអ្នកបានចូលរួមសកម្មភាពទាំងស្រុង(ដាក់ចិត្តដាក់កាយ)ចំពោះរឿងណាមួយឱ្យកើតជាប្រយោជន៍ឱ្យមានលទ្ធផលកើតឡើង។
សម្រាប់លោក Héctor García បាននិពន្ធសៀវភៅដ៏ល្បីមួយក្បាល ikigai លើកឡើងថា អ្នករស់នៅលើកោះអូគីណាវ៉ា ចំពោះអ្នកមានបញ្ហាផ្លូវចិត្ត គឺកម្រណាស់។ ព្រោះលោកយាយ លោកតា និងយុវជនគ្រប់រូប មានវិធីរស់នៅប្រើជីវិតឱ្យមានអត្ថន័យ។ មានលោកតាម្នាក់រស់នៅលើកោះនោះ បាននិយាយថា ខ្ញុំរស់នៅបានយូរហើយមានក្តីសុខបែបនេះ គឺចិត្តខ្ញុំគ្មានការប្រញាប់ប្រញាល់អ្វីទេ។ ខ្ញុំជាអ្នកត្បាញ នេះជាគោលបំណងក្នុងកិច្ចការប្រចាំថ្ងៃរបស់ខ្ញុំ។ ពេលខ្ញុំភ្ញាក់ពីគេងតែងតែធ្វើការអធិដ្ឋាន ឬសមាធិឱ្យចិត្តស្ងប់។ បន្ទាប់មកខ្ញុំចាប់ផ្តើមពង្រឹងរាងកាយដោយការធើលំហាត់ប្រាណ ហើយញ៉ាំអាហារពេលព្រឹកត្រឹមតែ ៨០%។ ហើយក៏ដល់ម៉ោងខ្ញុំទៅធ្វើការងារនៅ ៧ព្រឹកដែរ ខ្ញុំចាប់ផ្តើមធ្វើការងារតាមលំហូរចិត្តយ៉ាងស្ងៀមស្ងាត់ជាអ្នកតម្បាញ។ ដល់ម៉ោង ៥ល្ងាច ខ្ញុំចាប់ផ្តើមអស់កម្លាំង ខ្ញុំក៏ទៅលេងជាមួយមិត្តភក្តិ និងបងប្អូនកូនចៅរបស់ខ្ញុំយ៉ាងមានក្តីសុខ។”
នៅពេលអ្នកស្ថិតក្នុងស្ថានភាពលំហូរ អ្នកត្រូវតែផ្តោតអារម្មណ៍លើការងារដោយគ្មានការំខានខាងក្រៅ ដើម្បីធ្វើបែបនេះបាន អ្នកត្រូវចេះរៀបចំសណ្តាបធ្នាប់ចិត្តគំនិតរបស់អ្នកឱ្យមានរបៀបរៀបរយជាមុនសិនដែរ។ លោក Cal Newport បានបញ្ជាក់ថា ចូរអ្នកព្យាយាមផ្តោតអារម្មណ៍លើអ្វីដែលកំពុងតែធ្វើឱ្យស៊ីជម្រៅ ដើម្បីបន្ធូរអារម្មណ៍តានតឹង និងស្រ្តេសចេញពីចិត្ត។ ហើយអ្វីដែលជ្រើសរើសផ្តោតអារម្មណ៍ឱ្យមានលំហូរចិត្តនោះ ជាតួអង្គកំណត់គុណភាពជីវិត និងក្តីសុខរបស់អ្នកផងដែរ៕ អត្ថបទដោយ ទ្រ សុភាព