ជីវិតរបស់មនុស្សភាគច្រើនមានបញ្ហាព្រោះតែប្រកាន់ថា អ្នកនេះមើលងាយ អ្នកនោះស្អប់ខ្លួន ហើយអ្នកផ្សេងទៀត មិនឱ្យតម្លៃខ្លួន... និយាយទៅ! ទោះបីអ្នកទៅដល់ទីណាក៏ដោយ ក៏មានបញ្ហាដែរ។ បើអ្នកមានបេះដូងដូចជាលោកតា កុល ផេង ទើបអ្នករស់នៅទាំងធ្វើការឱ្យមានលទ្ធផល និងប្រើជីវិតឱ្យមានក្តីសុខ។ តើលោកតា កុល ផេង មានបេះដូងបែបណា?
លោកតា កុល ផេង បានមានប្រសាសន៍ថា “ខ្ញុំមានក្តីស្រមៃមួយថា ចង់ឱ្យកូនចៅខ្មែរជំនាន់ក្រោយចំនួនច្រើនក្លាយជាអ្នកប្រាជ្ញប្រចាំស្រុកខ្មែរ។ បេសកកម្មជីវិតរបស់ខ្ញុំបណ្តុះគ្រាប់ពូជគុណធម៌ដល់បេះដូងអ្នកដទៃដោយការអប់រំនេះ។ ទោះបីខ្ញុំធ្វើបានខ្លះមែន ប៉ុន្តែខ្ញុំមិនអត់ទាន់ពេញចិត្តនៅឡើយទេ។ ខ្ញុំត្រូវខំប្រឹងបំពេញអ្វីៗ ដោយចិត្តបរិសុទ្ធយកប្រយោជន៍អ្នកដទៃធំជាងខ្លួន”។ បេះដូងមួយហៅបេះដូងមានគុណធម៌ រស់នៅដើម្បីអ្នកដទៃ សម្រាប់អ្នកវិញ អាចរស់នៅដើម្បីកូន ប្តីប្រពន្ធ គ្រួសារ និងនរណាម្នាក់ដែលមានតម្លៃក្នុងជីវិតរបស់អ្នក វាជារឿងគ្រប់គ្រាន់ហើយ។
ហើយលោកតាបានបន្តថា បើយើងចង់រស់នៅបានសុខ យើងកុំធ្វើឱ្យអ្នកដទៃមានការឈឺចាប់ដោយអំពើរបស់យើង។ នៅក្នុងជីវិតខ្ញុំ គ្មានសត្រូវសូម្បីតែម្នាក់ ទោះបីគេស្អប់និងខឹងយើងជារឿងរបស់គេ ប៉ុន្តែយើងកុំចាត់ទុកគេជាសត្រូវ។ យើងត្រូវតែមានក្តីមេត្តា ក្តីស្រឡាញ់ ហើយបើមានឱកាសយើងត្រូវតែជួយគេថែមទៀត។ កុំស្អប់នរណាម្នាក់ ទើបបេះដូងយើងធ្វើឱ្យមានកម្លាំងចិត្តខ្លាំងក្លាបំផុត”។ ការអប់រំចិត្តបែបនេះ សេចកក្តីទុក្ខសោកនឹងរលាយបាត់ចេញចិត្តរបស់អ្នក ឱ្យរស់នៅក្នុងលំហូរក្តីស្រមៃជាសុភមង្គលផ្លូវចិត្តបំផុត។ សូម្បីធ្វើអាជីកម្មលោកតា ក៏ដើរតាមលំហូរចិត្តដែរ។
ជីវិតលោកតាសោយសុខព្រោះតែតម្លៃអប់រំមានក្តីស្រឡាញ់ និងសាងផលប្រយោជន៍ដើម្បីអ្នកដទៃ ជាបេសកម្មពោរពេញដោយលំហូរចិត្តយ៉ាងមានអត្ថន័យ មានភាពសប្បាយរីករាយ និងជួយលើកកម្ពស់ជីវិតអ្នកដទៃក្នុងសង្គម។ ការធ្វើអាជីកម្មផ្លាស់ប្តូរបេះដូងមនុស្សឱ្យធ្វើអំពើល្អជារឿងលំបាកណាស់ ប៉ុន្តែលោកតាដាក់ជីវិតធ្វើការងារហ្នឹង វាមិនមែនលែងលំបាកទៀតហើយ រួចលោកតាបានប្រាប់ថា “ការរកស៊ីលើវិស័យអប់រំហ្នឹង ធ្វើខ្ញុំមានក្តីសុខបំផុត។ ព្រោះបេះដូងខ្ញុំចូលចិត្តជួយមនុស្សតាំងពីដើមមកហើយ”។ ចូរធ្វើការងារជាក្តីស្រមៃដោយមានបេះដូងមានគុណធម៌ អ្នកនឹងរស់នៅក្នុងលំហូរចិត្តអស់មួយជីវិតមិនខានឡើយ៕ អត្ថបទដោយ៖ ទ្រ សុភាព