មនុស្សភាគច្រើនគ្មានក្តីសុខព្រោះតែភ័យខ្លាចរឿងជុំវិញខ្លួន ទល់តែច្បាស់បានហ៊ានធ្វើ ប៉ុន្តែរឿងជីវិតពីតវាមិនមានដំណើរការល្អនោះទេ។ តាមលោក Hector Garcia និងលោក Francesc Miralles ជានិពន្ធសៀវភៅ The Ikigai Journey បានសរសេរថា បើអ្នកព្យាយាមធ្វើផែនការលម្អិតពេក វានឹងធ្វើឱ្យអារម្មណ៍អ្នកមានភាពធុញទ្រាន់ ហត់នឿយទាំងកាយទាំងចិត្តផងដែរ។
ផែនការលម្អិតពេកអាចសម្លាប់ក្តីស្រឡាញ់ និងចំណង់ចំណូលចិត្តដ៏រីករាយរបស់អ្នកបាន។ សម្រាប់ភាពមិនច្បាស់អាចនាំឱ្យអ្នកមានអារម្មណ៍រំភើបភ្ញាក់ផ្អើលជារៀងរាល់ថ្ងៃចំពោះកិច្ចការដែលអ្នកខំធ្វើ។ នេះជាមូលហេតុដ៏សំខាន់ដែលអ្នកត្រូវការសម្រេចចិត្តខ្លួនឯងក្នុងការស្វែងរក និងអនុវត្តពីក្តីស្រមៃ។
បើអ្នកសម្រេចចិត្តធ្វើដំណើរកម្សាន្តរយៈពេលខ្លី ជំនួសឱ្យការធ្វើផែនការលម្អិតគ្រប់យ៉ាងនៃអ្វីដែលអ្នកចង់ឃើញ ចូរអ្នកផ្តោតលើការសម្រេចចិត្តថា តើអ្នកនឹងធ្វើដំណើរជាមួយនរណាវិញម្តង។ ដូចគ្នានឹងជីវិតប្រចាំថ្ងៃដែរ មនុស្សដែលអមដំណើរជាមួយអ្នក វាជារឿងសំខាន់ជាងអ្វីដែលអ្នកនឹងមើលឃើញទៅទៀត។ ដូចជាមិត្តភក្តិ ដៃគូ និងប្តីប្រពន្ធជាដើម។ បើអ្នករើសត្រូវ អ្នកនឹងមានសុភមង្គល។
ដូចជាដៃគូដែលបានរួមដំណើរទៅជាមួយអ្នកអាចជាអ្នកជួយបន្ថែម ឬរារាំងបទពិសោធរបស់អ្នកក៏ថាបានដែរ។ ដូច្នេះ អ្នកត្រូវគិតថា អ្នកជ្រើសរើសដោយឈ្លាសវៃនៅជាមួយនរណាម្នាក់ដែលអ្នកអនុញ្ញាតឱ្យរួមដំណើរជាមួយដោយមានក្តីសុខ។ វាក៏មានសារៈសំខាន់ណាស់ដែរ ប្រសិនបើពួកគេមានចិត្តគំនិតដូចអ្នក នៅពេលចាំបាច់ត្រូវធ្វើសេចក្តីសម្រេចចិត្តណាមួយខណៈពេលអ្នកកំពុងធ្វើដំណើរជាមួយគ្នានោះ។ ពេលអ្នកគិតរបៀបនេះ ជីវិតរបស់អ្នកនឹងមានក្តីសុខ មានភាពរឹងមាំ និងជោគជ័យផងដែរ៕ អត្ថបទដោយ៖ ទ្រ សុភាព