ជង្គង់របស់អ្នកម្នាក់ៗជាធម្មតា តែមានជាតិទឹកនិងប្រេងក្នុងកម្រិតសមល្មមមួយ ប៉ុន្តែនៅពេលណាដែលមានប្រតិកម្មអ្វីមួយកើតឡើង នឹងធ្វើឱ្យទឹកឬប្រេងកើនឡើងខុសធម្មតា ជង្គង់របស់អ្នកជំងឺនឹងឈឺចាប់ឡើងហើមជាដើម។ អ្នកជំងឺខ្លះកើតមានទឹកមានឈាម ខ្លះមានខ្ទុះ និងខ្លះទៀតទឹកថ្លា អាស្រ័យទៅតាមមូលហេតុដែលបង្កនីមួយៗ នេះបើផ្អែកតាមការចែករំលែកពីវេជ្ជបណ្ឌិត សុខ ពុទ្ធី ឯកទេស ជំងឺសន្លាក់និងឆ្អឹង ប្រចាំការនៅគ្លីនិកវឌ្ឍនៈវិជ្ជាហ្រ្គេនភ្នំពេញ។

វេជ្ជបណ្ឌិត បានឱ្យដឹងផងដែរថា ជំងឺនេះគឺអាចកើតឡើងលើមនុស្សគ្រប់វ័យទាំងអស់។ វេជ្ជបណ្ដិត សុខ ពុទ្ធី បានបន្ថែមថាចំពោះរោគសញ្ញាអាចបង្កឡើងតាមស្ថានភាពជាក់ស្ដែង អាចមានការឈឺជង្គង់ មានអារម្មណ៍ថាអួលៗ តឹង ហើម ពិបាកបត់ជង្គង់ បើធ្ងន់ធ្ងរអាចមើលទៅឃើញហើមខ្លាំង ក្រហម អមជាមួយការគ្រុនក្ដៅជាដើម។ ចំពោះករណីមានបញ្ហាទឹកដក់ជង្គង់តែមិនបានព្យាបាលត្រឹមត្រូវ ចេះតែលេបថ្នាំបំបាត់ការឈឺចាប់ អាចនាំជាផលវិបាក ខូចសន្លាក់តែម្ដង សឹក រិចរិល គាំងសន្លាក់ សាច់ដុំស្វិត ធ្វើចលនាមិនបាន អាចបង្កជាការបង្កមេរោគក្នុងសន្លាក់ រាលដាលទៅកន្លែងផ្សេងៗទៀតបាន។

ដោយឡែកក្រុមមនុស្សដែលប្រឈមនឹងជំងឺនេះរួមមាន៖

១ អ្នកលេងកីឡា ដែលងាយដួល ងាយប៉ះទង្គិចសន្លាក់

២ ស្ត្រីពេលអស់រដូវ ធ្វើឱ្យសន្លាក់របស់គាត់ស្ងួត យូរៗក្លាយទៅជាសឹកងាយបង្កជាការរលាក នាំឱ្យមានបញ្ហាទឹកដក់ក្នុងជង្គង់។

៣ អ្នកធាត់ លើសគីឡូ ធ្វើឱ្យមានការដាក់សម្ពាធទៅជង្គង់របស់គាត់ យូរៗងាយបង្កជាការរលាក អាចធ្វើឱ្យមានការឈឺ ហើម ឬមានទឹកដក់ក្នុងជង្គង់ផងដែរ។

៤ មនុស្សចាស់ក៏ប្រឈមនឹងជំងឺនេះដូចគ្នា។

ជារួមមកវិញ ប្រសិនបើធ្លាប់ឆ្លងកាត់ការប៉ះទង្គិត ដួល ឬមានអាការណាមួយសង្ស័យ គួរតែស្វែងរកការពិនិត្រនិងព្យាបាលពីគ្រូពេទ្យជំនាញឱ្យបានឆាប់រហ័ស៕

អត្ថបទដោយ៖ Senghong