ការគេងមិនលក់ឬគេងមិនបានគ្រប់គ្រាន់ក្លាយជាជំងឺរ៉ាំរ៉ៃមួយប្រភេទដែលមនុស្សស្ទើរគ្រាប់គ្នាកំពុងជួបប្រទះ។ ការគេងមិនលក់ និងគេងមិនគ្រប់គ្រាន់យូរៗទៅវាបង្កទៅជាជំងឺវាយលុកសារពាង្គខាងក្នុងជាច្រើន និងមានបញ្ហាដល់អាយុជីវិតផងដែរ។
បើតាមការបញ្ជាក់ពីអ្នកឧកញ៉ាវេជ្ជបណ្ឌិត គួច ម៉េងលី បានប្រាប់ឱ្យដឹងថា ការគេងមិនលក់ឬគេងមិនគ្រប់គ្រាន់ ត្រូវបានបែងចែកជា២ប្រភេទខុសៗគ្នា។ ប្រភេទទី១ អ្នកដែលគេងមិនបានគ្រប់គ្រាន់ឬគេងមិនគឺដោយសារតែពួកគាត់មានជំងឺប្រចាំកាយដូចជាជំងឺផ្លូវចិត្ត ជំងឺបាក់ទឹកចិត្ត និងជំងឺផ្សេងៗទៀតដែលវាយលុកសារពាង្គកាយនៅពេលយប់ធ្វើឱ្យអ្នកជំងឺគេងមិនលក់។ ប្រភេទទី២ ការគេងមិនគ្រប់គ្រាន់គឺមកពីបុគ្គលខ្លះមិនមានពេលគេង ឬមានពេលគេងហើយតែមិនគេងព្រោះរវល់ជាមួយស្មាតហ្វូន រវល់ជាមួយគ្រឿងអេឡិចត្រូវនិក ភ្លេចគេង ក៏ធ្វើឱ្យគេងមិនគ្រប់គ្រាន់។
បញ្ហាគេងមិនលក់ៗឬគេងមិនគ្រប់គ្រាន់២ប្រភេទខាងលើនេះ គឺមានផលប៉ះពាល់ខ្លាំងដូចគ្នាចំពោះសុខភាព និងសារពាង្គខាងក្នុង។ វេជ្ជបណ្ឌិត គួច ម៉េងលី បានបន្តទៀតថា បុគ្គលដែលគេងមិនគ្រប់គ្រាន់ គេងមិនគ្រប់៧ម៉ោងក្នុងមួយយប់ នៅថ្ងៃខាងមុខ មានភាគរយខ្ពស់នឹងកើតជំងឺរ៉ាំរ៉ៃជាច្រើនមុខដូចជា គេងមិនលក់យូរៗទៅធ្វើឱ្យរាងកាយចុះខ្សោយ ប្រព័ន្ធភាពស៊ាំចុះខ្សោយ ធ្វើឱ្យប្រឈមមុខជាមួយជំងឺ ទឹកនោមផ្អែម លើសឈាម ដាច់សរសៃឈាមខួរក្បាល គាំងបេះដូង ជាដើម។
មួយវិញទៀត បញ្ហាប្រឈមខ្លាំងចំពោះមនុស្សដែលគេងមិនគ្រប់គ្រាន់ គឺធ្វើឱ្យសមត្ថភាពខួរក្បាលមានការថយចុះ ឆាប់ភ្លេច ស្ពឹកខួរក្បាល ចាស់មុនអាយុ ស្បែកស្រអាប់មិនភ្លឺថ្លាផងដែរ។
ម្យ៉ាងវិញទៀត ចំពោះស្រ្តីវិញកាលណាគេងមិនបានគ្រប់គ្រាន់ គឺធ្វើឱ្យអរម៉ូនប្រែប្រួល ងាយធ្វើឱ្យកើតជំងឺដូចជា កើតគីសពេញខ្លួនជាពិសេសគីសស្បូន រដូវមកមិនទៀង ហើយអាចនឹងគ្មានកូនផងដែរ។
ប្រសិនករណីអ្នកពិបាកគេងខ្លាំង គេងយ៉ាងណាក៏មិនលក់ វេជ្ជបណ្ឌិត គួច ម៉េងលី ប្រាប់វិធីសាស្រ្ត គឺត្រូវយកទឹកដោះគោឆៅ ឬទឹកដោះគោស្រស់មួយកែវ ទៅកម្តៅឱ្យក្តៅឧណ្ហៗហើយផឹកជារៀងរាល់ថ្ងៃ។ ការផឹកទឹកគោក្តៅឧណ្ហៗមួយកែវមុនចូលគេង ជួយឱ្យអ្នកគេងឆាប់លក់ ១០ ទៅ ១៥ នាទីបន្ទាប់ពីផឹកអ្នកនឹងទន់ត្របកភ្នែក គេងលក់មិនខាន៕
អត្ថបទដោយ៖ មឿន គន្ធា