ការប្រើប្រាស់ថ្នាំរបស់ប្រជាជនកម្ពុជាហាក់មិនទាន់អនុវត្តបានត្រឹមត្រូវនៅឡើយ បើតាមការឱ្យដឹងរបស់វេជ្ជបណ្ឌិតដែលធ្លាប់ជួបអ្នកជំងឺកន្លងមក មានករណីអ្នកជំងឺទិញថ្នាំតាមគ្នាផង ប្រើថ្នាំលើសកម្រិតវេជ្ជបញ្ជាផង និងមានករណីខ្លះអ្នកជំងឺខ្វះវេជ្ជបញ្ជាពីពេទ្យក្នុងការប្រើប្រាស់ថ្នាំ។ តែថ្នាំគឺជាអាវុធមុខ២ ប្រើត្រូវគឺជួយព្យាបាល តែបើប្រើមិនត្រូវក៏មិនខុសពីសម្លាប់អ្នកជំងឺដូចគ្នាដែរ។

យោងតាមការសម្ភាសជាមួយ ឱសថការី ស សំពិសិដ្ឋ ជាម្ចាស់ឱសថស្ថានយើងចំនួន៧សាខានៅក្នុងប្រទេសកម្ពុជាបានឱ្យដឹងថា “បងបានជួបអ្នកជម្ងឺជាច្រើនដែលគាត់មានការយល់ខុសពីការប្រើប្រាស់ថ្នាំផ្សះ។ ដោយសារតែយើងបកប្រែពីពាក្យបច្ចេកទេសថាជាថ្នាំផ្សះ ទើបធ្វើឲ្យប្រជាជនយើងច្រឡំ តាមពិតថ្នាំផ្សះ ឬ អង់ទីប៊ីយូទិក មិនមានជាថ្នាំផ្សះមុខរបួសឲ្យឆាប់ជានោះទេ។” ដោយឡែកវាគឺជាប្រភេទឱសថដែលប្រើប្រាស់សម្រាប់ការបង្ការោគដែលបង្ករដោយបាក់តេរី ហើយការផ្សះមុខរបួសគឺជាចលនានៃការរៀបចំរបស់រូបរាងកាយរបស់យើងនោះទេ។ ជាទូទៅថ្នាំផ្សះមានច្រើនណាស់ មានច្រើនជាង១០០មុខ ដែលចែកជា៧ក្រុមធំៗ យោងតាម (Medical Author: Everett Stephens, MD Medical Editor: William C. Shiel Jr., MD, FACP, FACR Reviewed on 9/27/2019)។

ដូចនេះ ប្រសិនបើក្នុងករណីដែលមានបញ្ហារបួសក្លាយ បងប្អូនទូទៅគឺមិនគួរប្រើប្រាស់ថ្នាំដោយខ្លួនឯងទេ តែត្រូវទៅជួបគ្រូពេទ្យជំនាញដើម្បីពិភាក្សា ហើយម៉្យាងវិញទៀត ពីជម្ងឺមួយទៅជម្ងឺមួយមិនអាចប្រើប្រាស់ថ្នាំដែលដូចគ្នាបានទេ។ ជាទូទៅការប្រើប្រាស់ថ្នាំផ្សះត្រូវប្រើប្រាស់រយៈពេលចន្លោះពី៥ ទៅ៧ថ្ងៃ អាស្រ័យទៅលើថ្នាំសម្លាប់មេរោគនោះ ឬ ស្ថានភាពរបស់អ្នកជម្ងឺ។ ការប្រើប្រាស់ថ្នាំផ្សះមិនបានត្រឹមត្រូវគឺអាចបណ្តាលឲ្យមានបញ្ហាប្រឈមធំមួយនោះគឺការស៊ាំនឹងថ្នាំអង់ទីប៊ីយូទិក ដែលអាចពេលក្រោយមេរោគដែលបង្កជម្ងឺ មិនត្រូវបានបន្ថយភាពកាចសាហាវ ឬ សម្លាប់មេរោគនោះបានឡើយ ហើយអាចធ្វើឲ្យបាក់តេរីមានឥទ្ធិពលខ្លាំងទៅពីមួយថ្ងៃទៅមួយថ្ងៃ។

ជាចុងក្រោយ ប្រសិនបើអ្នកមានបញ្ហាដែលបង្ករោគដោយបាក់តេរី សូមអញ្ជើញទៅជួបគ្រូពេទ្យជំនាញដើម្បីធ្វើរោគវិនិច្ឆ័យ ហើយទៅជួបឱសថការីជំនាញក្នុងការផ្តល់ប្រឹក្សាបន្ថែមអំពីឱសថអង់ទីប៊ីទិក ដើម្បីធ្វើយ៉ាងណាឲ្យការព្យាបាលរបស់អ្នកជម្ងឺកាន់តែបានល្អ និង មានប្រសិទ្ធភាពខ្ពស់។ ហើយក្រុមការងារចាបបៃតង ក៏សូមសំណូមពរដល់ ឱសថការីឬគ្រូពេទ្យដែលចេញថ្នាំឱ្យអ្នកជំងឺ សូមណែនាំឱ្យបានក្បោះក្បាយ ខណៈប្រជាជនមួយចំនួនខ្វះខាតនូវចំណេះដឹងលើការប្រើប្រាស់ថ្នាំ ដែលអាចបង្ករជាហេតុធ្វើឱ្យពួកគាត់ប្រើថ្នាំខុសវេជ្ជបញ្ជា៕