មាតាបិតាគ្រប់រូបតែងចង់ឃើញកូនរស់នៅដោយសុខភាពល្អ មានប្រាជ្ញាឆ្លាតវៃ មានអនាគតល្អ។ហើយថ្ងៃនេះចាបបៃតងនឹងពាំនាំគន្លឹះខ្លះៗដែលជួយជាចំណែកជួយឱ្យកូនៗរបស់លោកអ្នកមានភាពវៃឆ្លាតនិងលូតលាស់កាន់តែប្រសើរ។

បើតាមការឱ្យដឹងពីគេហទំព័រConnection Academy ដែលផ្ដោតលើការបណ្ដុះបណ្ដាលកុមារ បានបង្ហើបទិកនិកចិញ្ចឹមកូនមួយចំនួនដូចខាងក្រោម៖

១.មានសកម្មភាពអាន ជាមួយពួកគេជារឿយៗ ពិសេសពេលពួកគេនៅតូចៗ ព្រោះការអានមានអត្ថប្រយោជន៍ខ្លាំងណាស់ដល់ការអភិវឌ្ឍការស្ដាប់ ការផ្ចង់អារម្មណ៍ ការនិយាយ ការយល់ដឹងកាន់តែខ្ពស់ ពិសេសគំនិតនៃការច្នៃប្រឌិតជាដើម។

២.ឱ្យពួកគេចេះដោះស្រាយជាមួយកំហុសដែលពួកគេបង្កើត។ មានមាតាបិតាច្រើនណាស់ដែលខ្លាចកូនធ្វើខុស ហើយតែងការពារកូនៗ នេះមិនមែនជារឿងខុសទាំងស្រុងទេ ប៉ុន្តែអ្នកក៏ត្រូវតែឱ្យពួកគេចេះស្គាល់ពីកំហុស ហើយឱ្យពួកគេរៀនដោះស្រាយផងដែរ។

បងប្អូនប្រហែលធ្លាប់ដឹងហើយថា កំហុសដែលមនុស្សម្នាក់ៗបង្កើតគឺជាគ្រូបង្រៀនដ៏មានន័យសម្រាប់ជីវិត ហេតុនេះពេលកូនៗនៅតូច កុំខ្លាចក្នុងការអនុញ្ញាត ឱ្យកូនអ្នកបង្កើតកំហុស និងឱ្យពួកគេរៀនដោះស្រាយ។

៣.ឱ្យកូនៗមានសកម្មភាពរាងកាយខ្លះ នៅពេលពួកគេមានសកម្មភាពបែកញើសខ្លះៗ វាបីដូចជាមនុស្សត្រូវបានហាត់ប្រាណ ហើយការមានចលនានេះនឹងជួយឱ្យរាងកាយកុមាររឹងមាំ បូកផ្សំនឹងប្រាជ្ញាស្មារតីផងដែរ។តែបើកុមារអសកម្មភាពរាងកាយនោះ ភាពរេផ្លិច សុខភាពរាងកាយក៏មានការអន់ខ្សោយដែរ។

៤.ញុំាអាហារពេលព្រឹកជាមួយកូនៗ អាចជួយឱ្យចំណងទំនាក់ទំនងរបស់កូនកាន់តែប្រសើរ និងមានការគោរព ក៏ដូចជាភាពកក់ក្ដៅផងដែរ។ជាពិសេសទៅទៀត ការញុំាអាហារពេលព្រឹកក៏ជាគន្លឹះថែរក្សាការពារជំងឺជាច្រើនមុខចូលមកក្នុងរាងកាយផងដែរ។ ជាក់ស្ដែងមហាសេដ្ឋីលំដាប់ពិភពលោក លោកMark Zuckerberg ជាមេធំរបស់ហ្វេសប៊ុក ក៏ធ្លាប់អះអាងថារឿងដែលចាំបាច់មួយរបស់លោកនាពេលព្រឹកព្រលឹមក៏ចំណាយពេលទទួលទានអាហារពេលព្រឹកជាមួយកូនៗនិងភរិយារបស់លោក បើទោះបីជាលោករវល់ការងារជាច្រើនក្ដី។

៥.បង្រៀនកូនៗឱ្យលេងល្បែងកំសាន្ត ដែលអាចបង្វឹកដល់ការគិតនិងដោះស្រាយបញ្ហា ដើម្បីឱ្យខួរក្បាលពួកគេបានហាត់ប្រាណខ្លះ។ល្បែងកំសាន្តនោះអាចជាការលេង អុក ល្បែងខ្មែរយើង ខ្លាស៊ីគោ និងល្បែងកំសាន្តផ្សេងទៀតដែលធ្វើឱ្យខួរក្បាលពួកគេរេផ្លិចល្អ។

បន្ថែមពីនេះមាតាបិតាក៏ត្រូវគិតគូរដល់ការរស់នៅដោយ នាំពួកគេឱ្យប្រឡូកជាមួយទំនាក់ទំនងសង្គមខាងក្រៅខ្លះ ការរក្សាអនាម័យ បរិស្ថានរស់នៅ ការគេង ការញុំា ការផឹកឱ្យបានគ្រប់ និងមានចម្រុះសារធាតុចិញ្ចឹម ពិសេសដែលមិនអាចខ្វះបានគឺការចាក់វ៉ាក់សុំាងការពារជំងឺផ្សេងៗឱ្យបានគ្រប់ជាដើម សកម្មភាពទាំងអស់នេះហើយនឹងជំរុញទាំងសុខភាពនិងភាពឆ្លាតវៃរបស់កុមារបានប្រសើរឡើង និងបង្ការកត្តាហានិភ័យផ្សេងៗទៅថ្ងៃអនាគតបានច្រើនផងដែរ។