រដូវកាលផ្លែមៀនបានឈានចូលមកដល់ ប៉ុន្តែទិន្នផលបែរជាត្រូវខ្វះទីផ្សារ ជាប់គាំងលក់មិនចេញដោយសារតែបញ្ហាកូវីដ១៩។ ទោះបីផ្លែមៀនកម្ពុជាជាប់គាំងមែនពិត ប៉ុន្តែអត្ថប្រយោជន៏របស់ផ្លែមៀនចំពោះសុខភាពនៅតែច្រើនមហាសាល ដូចជា  បង្កើនប្រព័ន្ធភាពស៊ាំ, ប្រឆាំងនឹងជំងឺរ៉ាំរ៉ៃ, ទ្រទ្រង់ដំណើរការរំលាយអាហារ, កាត់បន្ថយការរលាក, ដោះស្រាយបញ្ហានៃការគេងមិនលក់, គ្រប់គ្រងសម្ពាធឈាម និងការពារភាពស្លេកស្លាំងជាដើម។

ដើម្បីជាចំណេះដឹងបន្ថែម ករណីបងប្អូនមានការធុញថប់ជាមួយនឹងការញ៉ាំផ្លែមៀនស្រស់រាល់ថ្ងៃ អាចសាកច្នៃទៅជាដំណាប់ផ្លែមៀន រសជាតិប្លែក ទុកបានយូរតែគុណភាពនៅតែដដែល ដោយមិនចាំបាច់ត្រូវមានជំនាញឬឧបករណ៍ច្រើននោះទេ។

របៀបធ្វើដំណាប់មៀន

១.គ្រឿងផ្សំ៖ ផ្លែមៀនស្រស់ ២ គីឡូក្រាម(តាមតម្រូវការ)

វិធីធ្វើ៖ 

-ត្រូវយកផ្លែមៀនទៅលាងទឹកឱ្យស្អាតដើម្បីជម្រះសត្វល្អិតទុំលើផ្លែ(Mulybugs)

-បន្ទាប់មកបកសំបកមៀនឱ្យស្អាត

-យកចុងស្លាបព្រាឆ្កឹះយកគ្រាប់ចេញ

-យកទៅសម្ងួតចំនួន៣-៣ម៉ោងកន្លះ ក្នុងទូរសំងួត(បើមាន)បើកស៊ីតុណ្ហភាព១០០អង្សាសេ

-បើមិនមានទូរសំងួតទេបងប្អូនអាចយកទៅហាលថ្ងៃចន្លោះ ៣-៤ថ្ងៃឬច្រើនជាងនោះដើម្បីឱ្យបានស្ងួតល្អ

-ការសំងួតយើងត្រូវហាល/ដាក់ក្នុងម៉ាស៊ីនសំងួតជាកញ្ច្រែងដោយរាយៗផ្លែមៀនកុំឱ្យជាន់គ្នា

-បន្ទប់មកអាចយកវាទៅទុកក្នុងកែវថ្មឬវេចខ្ចប់ដាក់ថង់ដែលអាចរក្សាបាន

ការកែច្នៃបែបនេះអាចធ្វើសម្រាប់ទុកពិសារជាមួយក្រុមគ្រួសារឬលក់សម្រាប់អ្នកស្គាល់គ្នា ប្រសិនបើចង់ដាក់លក់ទីផ្សារត្រូវគិតគូរលើការវេចខ្ចប់ ក៏ដូចជាការរក្សាទុកឱ្យបានត្រឹមត្រូវជាងនេះ៕