នាពេលបច្ចុប្បន្នមានបងប្អូនជាច្រើនតែងយល់ច្រឡំថា បើចង់ឡើងគីឡូត្រូវតែញ៉ាំឱ្យច្រើន ជាមួយនឹងរបបអាហារដែលមានសម្បួរទៅដោយសារជាតិផ្អែម កាឡូរីខ្ពស់ ទើបអាចឡើងទម្ងន់បាន។ ដោយឡែកការយល់ឃើញបែបនេះ មិនបានជួយដល់រូបរាងកាយដែលស្គមទាំងស្រុងនោះទេ​ ហើយពេលឡើងគីឡូទៀតសោត បែរទៅដុះក្បាលពោះមានរូបរាងអាក្រក់មើលលើសដើម។

អាស្រ័យហេតុនេះហើយ ថ្ងៃនេះ Healthy Cambodia សូមលើកយកនូវតិចនិកមួយចំនួនដែលជួយរាងកាយអ្នកស្គមឱ្យមានរូបរាងស្អាតមាំមួន សមស្របទៅនឹងកម្ពស់ដោយលើកយកនូវវត្តមានរបស់លោក Gap Su An ដែលបានចែករំលែកនៅក្នុងគណនីផេក 힘콩의재미어트 មកធ្វើជាឧទាហរណ៍ជាក់ស្តែងផ្ទាល់៖

១. ជាដំបូងនៅក្នុងការហាត់ប្រាណ Gap Su An សូមឱ្យអ្នកលោកប្តេជ្ញាចិត្ត បង្កើតទម្លាប់ធ្វើលំហាត់ ដោយរៀបចំផែនការជាក់លាក់មួយសមស្របទៅនឹងពេលវេលាផ្ទាល់

២. ការហាត់ប្រាណ Gap Su An ជ្រើសយកលំហាត់ប្រាន២ ថ្ងៃសំរាកម្តង ទម្លាប់ហាត់ព្រឹកល្ងាច បើមានពេលច្រើនហាត់កាន់តែល្អ មិនតែប៉ុណ្ណោះសម្រាប់ទម្លាប់ញ៉ាំអាហារវិញក៏មានរបៀបរបបទទួលទានត្រឹមត្រូវផងដែរ ទើបទទួលរាងកាយសមសួនមួយនេះ។

ភ្ជាប់ជាមួយគ្នានេះដែរ យោងទៅតាមប្រភព azcentral.com ក៏បានបង្ហាញឱ្យដឹងទៀតថា ភាពស្គមស្គាំងមិនមែនមានន័យណាបុគ្គលម្នាក់នោះមិនសូវទានអាហារនោះទេ តែអាចបណ្ដាលមកពីសកម្មភាពប្រចាំថ្ងៃទម្លាប់គេងមិនសូវល្អ ឬបណ្ដាលមកពីបញ្ហាស្ត្រេស...ជាដើម។ មិនតែប៉ុណ្ណោះប្រសិនបើអ្នកទៅជួបជាមួយក្រុមគ្រូពេទ្យជំនាញគេមិនឱ្យអ្នកញ៉ាំតែអាហារមួយមុខដើម្បីធាត់នោះដែរ ព្រោះមនុស្សស្គមជាទូទៅមិនមែនចង់បានភាពធាត់ឡើងគីឡូនោះទេគ្រាន់តែស្រឡាញ់រូបរាងដែលសមទៅស្របមួយនឹងសរីរាង្គខ្លួនឯងប៉ុណ្ណោះ។ ហើយខាងក្រោមនេះជាជំហានទាំង៥ ដែលជួយអ្នកមានរាងកាយស្គមទាញយកនូវរូបរាងដែលខ្លួនពេញចិត្តបាន៖

ជំហានទី ១៖ ទទួលទានរបបអាហារដែលមានសុខភាពល្អរួមមាន ប្រូតេអ៊ីន បន្លែផ្លែឈើស្រស់ គ្រាប់ធញ្ញជាតិ និងទឹកដោះគោមានជាតិខ្លាញ់ទាប ឬទឹកដោះគោគ្មានជាតិខ្លាញ់ ដើម្បីផ្គត់ផ្គង់រាងកាយរបស់អ្នកជាមួយនឹងសារធាតុចិញ្ចឹមដែលផ្តល់ថាមពល។ បង្អែម ឬអាហារសម្រន់ អាចញ៉ាំម្តងម្កាលបាន។

ជំហានទី ២៖ ផឹកទឹកឱ្យបានច្រើន ៨ ទៅ ១០ កែវក្នុងមួយថ្ងៃ ដើម្បីបំពេញជាតិទឹកក្នុងរាងកាយរបស់អ្នកឱ្យបានគ្រប់គ្រាន់ទាំងពេលថ្ងៃនិងពេលធ្វើលំហាត់ប្រាណ។

ជំហានទី ៣៖ ធ្វើលំហាត់ប្រាណសម្រាប់ជំនួយដល់សុខភាពបេះដូងជាមុនសិន ខណៈពេលដែលលោកអ្នកចាប់ផ្តើមហាត់ដំបូង។ បន្ទាប់អាចជ្រើសរើសយកលំហាត់ប្រាណណាមួយដែលខ្លួនចូលចិត្ត ដូចជា ជិះកង់ រត់ លេងកីឡា...។ ក្រោយមកទៀត ចាប់ផ្តើមផ្សាំទម្លាប់ហាត់ប្រាណរបស់ខ្លួនដោយហាត់ក្នុងរយៈពេល៣០នាទីម្តងក្នុង១ថ្ងៃ មិនចាំបាច់ហាត់ខ្លាំងពេកដូចអ្នកដែលគេធ្លាប់ហាត់ពីមុនមកនោះទេព្រោះវាអាចប៉ះពាល់ដល់ចង្វាក់បេះដូង សរសៃ និងសាច់ដុំ។

ជំហានទី ៤៖ បន្ទាប់ពីស៊ាំនឹងការហាត់នេះ ចាប់ផ្តើមហ្វឹកហាត់យកកម្លាំង និងសាច់ដុំរាងកាយដែលត្រូវការ​ ដោយលោកអ្នកអាចជ្រើសយកក្បួនហាត់ប្រាណយកសាច់ដុំដៃ ស្មា ទ្រូង ចង្កេះ ត្រគៀក...ជាដើម (អាចហាត់២ ទៅ៣ដងក្នុង១សប្តាហ៍ ហាត់ម្តងរយៈពេល២០នាទី)។

ជំហានទី ៥៖ ការពារការឈឺសាច់ដុំ និងជួយបង្កើនការបត់បែន មុនហាត់ប្រាណកុំភ្លេចកម្តៅសាច់ដុំជាមុនសិន ក្នុងរយៈពេល៥ ទៅ ១០នាទី ដោយមានការពន់ពែនដងខ្លួន សម្រួលសាច់ដុំដៃជើង ចង្កេះ...ជាដើម។

ជាការលើកទឹកចិត្តបន្ថែម ការហាត់ប្រាណនឹងទទួលទានអាហារដូចដែលបានរៀបរាប់ខាងលើនេះ សូមលោកអ្នកតាំងចិត្តធ្វើវាឱ្យជាប់លាប់ ព្រោះមិនថា ការហាត់ប្រាណ រៀបចំរបបអាហារសម្រាប់ឡើងគីឡូ ឬចុះគីឡូនោះទេ តម្រូវឱ្យអ្នកដែលធ្វើមានការតាំងចិត្តខ្ពស់ ជាមួយនឹងពេលវេលាដែលអ្នកចំណាយលើវា។ ម្យ៉ាងវិញទៀត ជាលទ្ធផលដែលទទួលបានលោកអ្នកនឹងមានរាងកាយមាំមួន សុខភាពល្អ សមប្រកបចិត្ត ក្នុងរយៈពេលវែងដូចគ្នា៕